మీరు కోల్‌గేట్ టూత్‌పేస్ట్ వాడుతున్నారా.. అది నిజమైందేనా

కోల్‌గేట్ టూత్‌పేస్ట్ . ఈ పేరు చెప్పగానే చాలా మంది ఇళ్లల్లో ఉదయాన్నే ఉపయోగించే వస్తువు అని ఠక్కున గుర్తుకు వస్తుంది. ఇక గత కొన్నేళ్ల నుంచి టూత్‌పేస్ట్‌లలో కోల్‌గేట్‌ బ్రాండ్ వినిపిస్తూనే ఉంది. అయితే చాలా నమ్మకమైన బ్రాండ్ కావడంతో.. దాన్ని ఉపయోగించుకుని.. కొందరు కేడీ గాళ్లు ఈ కోల్‌గేట్‌ టూత్‌పేస్ట్‌కు నకిలీ తయారు చేస్తున్నారు. అయితే ఇలాంటి ముఠాను తాజాగా పోలీసులు పట్టుకోవడంతో.. కీలక విషయం వెలుగులోకి వచ్చింది. ప్రజల ప్రాణాలకు, ఆరోగ్యానికి హాని కలిగించే నకిలీ ఉత్పత్తుల దందా గుజరాత్‌ రాష్ట్రంలోని కచ్‌ పట్టణంలో వెలుగు చూసింది.

రాపర్ తాలూకాలోని చిట్రోడ్ ప్రాంతంలో ఉన్న ఒక ఫ్యాక్టరీపై గడోదర్ పోలీసులు మెరుపు దాడి చేసి.. భారీ ఎత్తున తయారు చేస్తున్న నకిలీ కోల్‌గేట్ టూత్‌పేస్ట్‌ను స్వాధీనం చేసుకున్నారు. ఇక ఈ సందర్భంగా నిజమైన కోల్‌గేట్ కంపెనీని సంప్రదించిన పోలీసులకు షాకింగ్ విషయం తెలిసింది. అసలు తమ కంపెనీ అక్కడ లేదని.. వాటికి కోల్‌గేట్‌ కంపెనీకి ఎలాంటి సంబంధం లేదని చెప్పడంతో అవన్నీ నకిలీవని తేలింది.

నాణ్యతలేని, తక్కువ ధరకు వచ్చే పదార్థాలతో ఈ టూత్‌పేస్ట్‌ను తయారు చేసి వాటికి కోల్‌గేట్ ప్యాకింగ్ చేస్తున్నట్లు పోలీసులు గుర్తించారు. అమాయక ప్రజలను మోసగించి.. ఈ టూత్‌పేస్ట్‌లను.. అచ్చం కోల్‌గేట్ ఉత్పత్తుల్లాగే మార్కెట్‌లో విక్రయిస్తున్నారని పేర్కొన్నారు. తాము చేసిన తనిఖీల్లో సుమారు రూ.9.43 లక్షల విలువైన నకిలీ సరుకును స్వాధీనం చేసుకున్నట్లు పోలీసులు తెలిపారు. ఇందులో నకిలీ టూత్‌పేస్ట్ బ్యాచ్‌లు, ప్యాకింగ్ మెటీరియల్స్, టూత్‌పేస్ట్ తయారీకి ఉపయోగించిన పరికరాలు ఉన్నాయని వెల్లడించారు.

ఈ కేసులో నలుగురు వ్యక్తులు రాజేష్ దియాభాయ్ మక్వానా, సురేష్ మహేష్‌భాయ్ ఉమత్, నత్వర్ అజాభాయ్ గోహిల్, నర్పత్ అలియాస్ నారు దియాభాయ్ మక్వానాలపై కేసు నమోదు చేశారు. ఇలాంటి నకిలీ ఉత్పత్తులు ప్రజల ఆరోగ్యానికి తీవ్రమైన ప్రమాదమని అధికారులు తెలిపారు. ప్రస్తుతం ఈ నకిలీ టూత్‌పేస్ట్‌లను ఎక్కడెక్కడ విక్రయించారు. 

వీటి సప్లై చైన్ ఎలా ఉంది అనే విషయాలను గుర్తించేందుకు పోలీసులు ముమ్మరంగా దర్యాప్తు కొనసాగిస్తున్నారు. ఈ దందా వెనుక మరికొంతమంది ఉన్నారా అనే కోణంలోనూ విచారణ సాగుతోంది. ఈ ఘటనతో చాలా మంది భయపడుతున్నారు.