లేటు వయసులో ఘాటు ప్రేమ.. 70 ఏళ్ల వృద్ధుడిని ప్రేమించి పెళ్లాడిన 35 ఏళ్ల మహిళ

ప్రేమ అనే దోమ ఎప్పుడు ఎవరిని కుడుతుందో ఎవరికీ తెలియదు. చిన్న వయసులోనో కొందరు ప్రేమలో పడితే.. పెళ్లై, పిల్లలు పుట్టి, వారి పళ్లిళ్లు అయి, మనవళ్లు మనవరాళ్లు పుట్టాకా కూడా కొందరిలో ప్రేమ పుడుతుంటుంది. అయితే చాలా మంది ఈ వయసులో అలాంటివేమీ వద్దనుకుని మిన్నుకుండిపోతారు. కావాలంటే తమ ప్రేమను వ్యక్త పరిచినా వారిని దూరంగానే పెడుతుంటారు. కానీ ఈ మధ్య కాలంలో వృద్ధులు కూడా కుర్రాళ్లలా మారిపోతున్నారు. అప్పుడే కాలేజీ అయిపోయిందన్నట్లుగా భావిస్తూ.. తాము ప్రేమించిన వారిని పెళ్లి చేసుకోవాలని తహతహలాడిపోతున్నారు. అందుకోసం ఎంత ధైర్యం అయినా చేస్తున్నారు.

అచ్చంగా ఇలాగే చేశాడో 70 ఏళ్ల వృద్ధుడు. తమ మనవరాలి వయసున్న 35 ఏళ్ల మహిళను ప్రేమించి, ప్రపోజ్ కూడా చేశాడు. ఆమె కూడా ఒప్పుకోగా.. కుటుంబ సభ్యులు, స్థానికులను కూడా ఒప్పించి పెళ్లి కూడా చేసుకున్నాడు. అయితే ఈ వివాహ వేడుకకు దగ్గరి బంధువులు, స్థానికులు కూడా రావడం.. చాలా సరదాగా వివాహ కార్యక్రమం పూర్తి చేయడం అందరినీ ఆశ్చర్యానికి గురి చేస్తోంది. అసలీ ఘటన ఎక్కడ జరిగింది, 70 ఏళ్ల వృద్ధుడి ప్రేమను 35 ఏళ్ల మహిళ ఎలా అంగీకరించిందో మనం ఇప్పుడు తెలుసుకుందాం పదండి.

ఛత్తీస్‌గఢ్ బిలాస్‌పూర్‌లోని సర్కండ చింగ్రాజ్‌పర ప్రాంతానికి చెందిన దాదు రామ్ గంధర్వ అనే 70 ఏళ్ల వృద్ధుడు ప్రతి రోజు కూలీ పనులు చేస్తూ.. జీవితాన్ని వెళ్లదీస్తున్నాడు. ప్రస్తుతం ఆయన ఒంటరిగా జీవిస్తుండగా.. కొంతకాలంగా దాదు రామ్ గంధర్వ అదే ప్రాంతంలో నివాసం ఉంటున్న 35 ఏళ్ల మహిళపై మనసు పడ్డాడు. అయితే కొన్నాళ్ల పాటు ఆ విషయాన్ని మనసులోనే దాచుకున్నాడు. కానీ అమ్మాయిని మాత్రం అదే పనిగా చూసేవాడు. ఆమె కూడా ఇతడిని చూస్తూ నవ్వేది. దీంతో దాదు రామ్‌కు ధైర్యం వచ్చింది. ఆమెకు కూడా తానంటే ఇష్టమని అనిపించింది. దీంతో వెంటనే వెళ్లి ఆమెకు తన ప్రేమ విషయం చెప్పాడు.

వయసులో తనకంటే 35 ఏళ్లు పెద్ద వాడైనప్పటికీ నిజాయితీగా అతడి ప్రేమను వ్యక్తం చేయడం.. ఆమెకు బాగా నచ్చింది. దీంతో అతడి ప్రేమకు అంగీకారం తెలిపింది. మీరు కూడా నాకిష్టమే అంటూ మనసులోని మాటను బయటపెట్టింది. ఇలా వీరిద్దరి మనసులు కవలగా.. కలిసే జీవించాలని నిర్ణయించుకున్నారు. వయసులో ఉన్న భారీ వ్యత్యాసాన్ని పట్టించుకోకుండా, వారిద్దరూ కలిసి అందరినీ ఒప్పించి పెళ్లి చేసుకోవాలనుకున్నారు. ఇదే విషయాన్ని అందరికీ చెప్పగా వారు కూడా దగ్గరుండి తామే పెళ్లి చేస్తామన్నారు. ఇలా ఈ జంట తమ ఆచారం ప్రకారం.. గురువారం రోజు రాత్రి శివాలయంలో పెళ్లి చేసుకున్నారు. ఈ వేడుకకు గ్రామస్థులు పెద్ద ఎత్తున హాజరై.. ప్రేమకు వయసు అడ్డు కాదని నిరూపించిన ఈ జంటకు తోడ్పాటు అందించారు.

స్థానికుల అభినందనల నడుమ ఈ నూతన జంట తమ కొత్త జీవితాన్ని ఉల్లాసంగా ప్రారంభించారు. వయసులో ఇంత వ్యత్యాసం ఉన్నా.. వారి మధ్య చిగురించిన ప్రేమను చూసి స్థానికులు ఆశ్చర్యంగా తిలకించారు. చప్పట్లు కొడుతూ, కొత్త దంపతులకు ఆశీస్సులు అందించారు. ఈ వింత, హృదయాన్ని తాకే ప్రేమకథ ప్రస్తుతం ఛత్తీస్‌గఢ్‌లో హాట్ టాపిక్‌గా మారింది. మరి దీన్ని చూస్తే మీకేమనిపిస్తుందో కామెంట్ల రూపంలో తెలియజేయండి.