పట్టుచీరలకు 'స్నానం' చేయించడం.. మెరుపు చెక్కుచెదరకుండా ఉండేందుకు ఈ సులభమైన చిట్కాలు పాటించండి!

ప్రతి పండుగ, శుభకార్యానికి తెలుగు ఆడపడుచులు పట్టుచీర కట్టుకోవడాన్ని ఆనవాయితీగా భావిస్తారు. అయితే, వేలు ఖరీదు చేసే ఈ పట్టుచీరలను ఎన్నిసార్లు ఉతకాలి, ఎలా సంరక్షించుకోవాలి అనే సందేహం చాలామందికి ఉంటుంది. పట్టు వస్త్రాలు చాలా సున్నితమైనవి. వీటిని తరచూ డిటర్జెంట్ లేదా షాంపూలతో ఉతికితే అవి మెరుపు కోల్పోయి, త్వరగా పాడైపోయే అవకాశం ఉంది. అందుకే, ప్రతిసారీ పూర్తిగా ఉతకకుండా, కొన్ని సులువైన సంరక్షణ పద్ధతులు పాటిస్తే.. పట్టుచీరలు ఎప్పుడూ కొత్త వాటిలానే కళకళలాడుతూ ఉంటాయి.
పట్టుచీరలపై ప్రమాదవశాత్తూ ఏవైనా మరకలు పడితే, మొత్తం చీరను ఉతకాల్సిన అవసరం లేదు. కేవలం మరక పడిన ప్రాంతాన్ని మాత్రమే శుభ్రం చేయాలి. దీనికోసం గాఢత తక్కువగా ఉన్న (mild) డిటర్జెంట్ లేదా షాంపూ ఉపయోగించడం ఉత్తమం. మరకను సున్నితంగా రుద్దుతూ చల్లటి నీటితో శుభ్రం చేయాలి. ఒకవేళ ఇంట్లో ఉతకాలనుకుంటే, వేడి నీటిని వాడకూడదు. చల్లటి నీటిలో సున్నితంగా ఉతికి, గట్టిగా పిండకుండా, నీడలో ఆరబెట్టాలి. ఎట్టిపరిస్థితిలోనూ పట్టుచీరపై సూర్యరశ్మి పడకుండా జాగ్రత్త వహించాలి.
పట్టుచీరలను ఒకసారి కట్టిన తర్వాత, వెంటనే ఉతకకుండా నాలుగైదు సార్లు కట్టుకున్నాక ఉతకడం మంచిది. అలాగే, రెండు వేర్వేరు రంగుల చీరలను ఒకేసారి ఉతకడం లేదా కలిపి నానబెట్టడం చేయకూడదు. రంగులు అంటుకునే ప్రమాదం ఉంది. అందుకే, ప్రతి పట్టుచీరను విడిగా ఉతకడం లేదా డ్రైక్లీనింగ్ చేయించడం శ్రేయస్కరం. ఈ చిన్నపాటి జాగ్రత్తలు పాటించడం వల్ల పట్టుచీరల రంగు, నాణ్యత చెక్కుచెదరకుండా ఎక్కువ కాలం నిలిచి ఉంటాయి.
చీరలను బీరువాలో నిల్వ చేసేటప్పుడు కూడా కొంత శ్రద్ధ చూపాలి. పట్టుచీరలను ప్లాస్టిక్‌ కవర్లలో కాకుండా, మృదువైన కాటన్ లేదా మస్లిన్ వస్త్రంలో చుట్టి ఉంచాలి. ఎక్కువ కాలం ఒకే మడతలో ఉంచితే, ఆ మడతలు బలహీనపడతాయి. అందుకే, ప్రతి నెలా ఒకసారి చీరను బయటకు తీసి, కొత్త మడత వేయడం వలన చీర దెబ్బతినకుండా ఉంటుంది. ఇలాంటి సంరక్షణ పద్ధతులు పాటిస్తే, మీ పట్టుచీరల మెరుపు ఏళ్లు గడిచినా చెక్కుచెదరకుండా భద్రంగా ఉంటాయి.