"చాలా బాగున్నారు": జెలెన్‌స్కీ కొత్త జాకెట్‌పై ట్రంప్ ప్రశంసలు

ఉక్రెయిన్ అధ్యక్షుడు వొలోడిమిర్ జెలెన్‌స్కీ అమెరికా అధ్యక్షుడు డొనాల్డ్ ట్రంప్‌తో భేటీ అయ్యేందుకు శుక్రవారం వైట్‌హౌస్‌కు చేరుకున్నారు. ఈక్రమంలోనే ఆయన వేసుకున్న ఓ సూట్ చర్చనీయాంశంగా మారింది. ముఖ్యంగా 2022లో రష్యాతో యుద్ధ ప్రారంభం అయినప్పటి నుంచి జెలెన్‌స్కీ సైనిక యూనిఫామ్ తరహా దుస్తులకే ప్రాధాన్యతను ఇస్తూ.. ఈసారి అధికారిక నలుపు రంగు సూట్‌లో కనిపించారు. క్యాబినెట్ రూమ్‌లో జరిగిన లంచ్ మీటింగ్‌లో ట్రంప్.. ఉక్రెయిన్ నేత వస్త్రధారణపై ఆసక్తికరమైన ప్రశంసలు కురిపించారు. ఈ జాకెట్‌లో ఆయన చాలా అందంగా కనిపిస్తున్నారని చెప్పారు. అక్కడితో ఆగకుండా అవును, చాలా అందంగా అంటూనే ప్రజలు ఈ విషయాన్ని గమనిస్తారని ఆశిస్తున్నానని అన్నారు.

ట్రంప్‌తో భేటీ జరిగిన ప్రతీసారి జెలెన్‌స్కీ తన వస్త్రధారణను మార్చుకోవడం జరుగుతూనే వస్తోంది. ఆగస్టులో ట్రంప్‌, యూరోపియన్ అధికారులతో కలిసి జెలెన్‌స్కీ సమావేశం అయినప్పుడు కూడా ఆయన తన సాధారణ ఆర్మీ గ్రీన్స్ వదిలి నలుపు రంగు ఫార్మల్ జాకెట్, షర్ట్, ప్యాంటు ధరించారు. ఆ సమయంలో కూడా ట్రంప్ నుంచి ఆయనకు సానుకూలత లభించింది.

 ఆగస్టు సమావేశంలో కన్జర్వేటివ్ రిపోర్టర్ బ్రియన్ గ్లెన్.. జెలెన్‌స్కీని ఉద్దేశించి "మీరు ఆ సూట్‌లో అద్భుతంగా కనిపిస్తున్నారు" అని ప్రశంసించారు. అయితే ఇదే రిపోర్టర్ గతంలో ఓవల్ ఆఫీస్‌లో జరిగిన ఫిబ్రవరి సమావేశంలో జెలెన్‌స్కీని విమర్శించారు. ట్రంప్ కూడా ఆ విషయాన్ని గుర్తుచేస్తూ.. "నేను కూడా అదే చెప్పాను. గతంలో నిన్ను విమర్శించింది ఇతనే" అని జెలెన్‌స్కీకి గుర్తు చేశారు. దానికి జెలెన్‌స్కీ కూడా "నాకు గుర్తుంది" అని బదులిచ్చారు.

ట్రంప్ పదవీ బాధ్యతలు చేపట్టిన తర్వాత తొలిసారి ఇరు నేతల మధ్య ఫిబ్రవరిలో సమావేశం జరిగింది. అయితే ఇది అనుకున్నంత ఆశాజనకంగా సాగలేదు. ఆ సమయంలో జెలెన్‌స్కీ ధరించిన నలుపు రంగు పొడవాటి పోలో, సైనిక తరహా ప్యాంటును ట్రంప్ సహా పలువురు అధికారులు వైట్‌హౌస్‌కు అగౌరవ చిహ్నంగా భావించారు. అప్పట్లో ట్రంప్.. జెలెన్‌స్కీని చూసిన వెంటనే వ్యంగ్యంగా "మీరు ఇవాళ బాగా డ్రెస్ చేసుకుని వచ్చారు" అని అన్నారు. అదే సమయంలో రిపోర్టర్ గ్లెన్ కూడా "మీరు సూట్ ఎందుకు ధరించరు? మీరు ఈ దేశంలోనే అత్యున్నత కార్యాలయంలో ఉన్నారు. కానీ సూట్ వేయడానికి నిరాకరిస్తున్నారు. అసలు మీ దగ్గర సూట్ ఉందా? చాలా మంది అమెరికన్లు మీరు ఈ కార్యాలయ గౌరవాన్ని పాటించడం లేదని భావిస్తున్నారు" అని జెలెన్‌స్కీని ప్రశ్నించారు. దానికి జెలెన్‌స్కీ బదులిస్తూ.. ఉక్రెయిన్‌లో శాంతి తిరిగి వచ్చేవరకు తాను సైనిక దుస్తులు మాత్రమే ధరిస్తానని ప్రతిజ్ఞ చేసినట్లు వెల్లడించారు.

జెలెన్‌స్కీ ధరించిన ఈ నలుపు జాకెట్‌ను కైవ్‌కు చెందిన విక్టర్ అనిసిమోవ్ రూపొందించారు. ఈ జాకెట్ ఏప్రిల్‌లో పోప్ ఫ్రాన్సిస్ అంత్యక్రియలకు ఫస్ట్ లేడీ ఒలెనా జెలెన్స్కాతో కలిసి హాజరైనప్పుడు మొదటిసారి కనిపించింది. తర్వాత జూన్‌లో బ్రిటీష్ ప్రధాన మంత్రి కీర్ స్టార్మర్‌తో, అలాగే హేగ్‌లో జరిగిన నాటో సదస్సులోనూ అదే లుక్‌లో కనిపించారు. జెలెన్‌స్కీ-ట్రంప్‌ల భేటీ సరిగ్గా ఒక రోజు ముందు ట్రంప్ రష్యా అధ్యక్షుడు వ్లాదిమిర్ పుతిన్‌తో యుద్ధం గురించి ఫోన్‌లో మాట్లాడటం ఈ భేటీకి మరింత ప్రాధాన్యతను సంతరించింది.