ప్రపంచవ్యాప్తంగా తెలుగు వారిదే డామినేషన్
Andhra Pradesh Telugu | Suryaa Desk | Published : Sun, Oct 19, 2025, 08:39 PM
ఏపీ ఐటీ, విద్యా శాఖల మంత్రి నారా లోకేశ్ ఆస్ట్రేలియాలో అడుగుపెట్టారు. ఆయన ఇక్కడి తెలుగు సమాజాన్ని ఉద్దేశించి ప్రసంగించారు. "అమెరికా నుంచి ఆస్ట్రేలియా వరకు ప్రపంచవ్యాప్తంగా తెలుగు వారిదే డామినేషన్. నేను ఎయిర్పోర్ట్లో దిగినప్పటి నుంచి చూస్తున్నాను. ఇక్కడ మీ జోష్, మీ ఉత్సాహం ఒక మాస్ జాతరను తలపిస్తోంది" అని అన్నారు. ఆస్ట్రేలియా ప్రభుత్వం కేటాయించిన ఒక అధికారి సైతం 'మా ప్రధానమంత్రికి కూడా ఇంతటి ఘన స్వాగతం లభించదు' అని ఆశ్చర్యం వ్యక్తం చేశారని లోకేశ్ తెలిపారు. సిడ్నీ క్రికెట్ గ్రౌండ్ ప్రాంగణంలో ఏపీఎన్ఆర్టీ ఆధ్వర్యంలో జరిగిన 'ఆస్ట్రేలియా తెలుగు డయాస్పోరా' సమావేశానికి ఆయన ముఖ్య అతిథిగా హాజరై ప్రసంగించారు.ఈ సందర్భంగా మంత్రి లోకేశ్ మాట్లాడుతూ.. ప్రపంచంలో తెలుగు వారు లేని దేశమంటూ లేదని, ప్రతిచోటా తమదైన ముద్ర వేస్తున్నారని కొనియాడారు. తెలుగుజాతికి ప్రపంచవ్యాప్తంగా గుర్తింపు తెచ్చిన వ్యక్తి దివంగత నందమూరి తారక రామారావు అని, తెలుగువారి పౌరుషాన్ని ఢిల్లీకి పరిచయం చేశారని గుర్తుచేశారు. ఆయన ఆశయాలను స్ఫూర్తిగా తీసుకుని, చంద్రబాబు తెలుగువారి సత్తాను ప్రపంచానికి చాటి చెప్పారని అన్నారు. 1995లో ఆయన తీసుకొచ్చిన సంస్కరణల వల్లే ఐటీ రంగం తెలుగువారికి దగ్గరైందని, 'కంప్యూటర్ అన్నం పెడుతుందా?' అని ఎగతాళి చేసిన వారే ఇప్పుడు సమాధానం చెప్పలేని స్థితిలో ఉన్నారని వ్యాఖ్యానించారు.
|
|