ఉత్కంఠభరితంగా సాగుతున్న భారత్ , ఇంగ్లాండ్ మహిళల క్రికెట్

ఐసీసీ మహిళల ప్రపంచకప్‌లో భాగంగా టీమిండియాతో జరుగుతున్న కీలక మ్యాచ్‌లో ఇంగ్లండ్ జట్టు భారీ స్కోరు సాధించింది. హీథర్ నైట్ (109) అద్భుత శతకంతో కదం తొక్కడంతో, నిర్ణీత 50 ఓవర్లలో 8 వికెట్ల నష్టానికి 288 పరుగులు చేసింది. భారత బౌలర్లలో ఒక్క దీప్తి శర్మ (4/51) మాత్రమే రాణించగా, మిగతావారు తేలిపోయారు. ఈ మ్యాచ్ గెలవాలంటే భారత మహిళల జట్టు 289 పరుగుల భారీ లక్ష్యాన్ని ఛేదించాల్సి ఉంది.ఇండోర్‌లోని హోల్కర్ స్టేడియం వేదికగా జరుగుతున్న ఈ మ్యాచ్‌లో టాస్ గెలిచిన ఇంగ్లండ్ కెప్టెన్ బ్యాటింగ్ ఎంచుకుంది. ఆ జట్టుకు ఆరంభంలోనే టామీ బ్యూమాంట్ (22) రూపంలో ఎదురుదెబ్బ తగిలినా, మరో ఓపెనర్ అమీ జోన్స్ (56), హీథర్ నైట్‌తో కలిసి ఇన్నింగ్స్‌ను చక్కదిద్దింది. ముఖ్యంగా, హీథర్ నైట్ భారత బౌలర్లపై పూర్తి ఆధిపత్యం చెలాయించింది. కేవలం 91 బంతుల్లో 15 ఫోర్లు, ఒక సిక్సర్‌తో 109 పరుగులు చేసి జట్టు భారీ స్కోరుకు బాటలు వేసింది. ఆమెకు అమీ జోన్స్ అర్ధశతకంతో పాటు, కెప్టెన్ నాట్ సీవర్-బ్రంట్ (38) నుంచి మంచి సహకారం లభించింది.భారత బౌలింగ్ విభాగంలో స్పిన్నర్ దీప్తి శర్మ ఒంటరి పోరాటం చేసింది. తన 10 ఓవర్ల కోటాలో కేవలం 51 పరుగులిచ్చి 4 కీలక వికెట్లు పడగొట్టి ఇంగ్లండ్ స్కోరు వేగానికి కళ్లెం వేసే ప్రయత్నం చేసింది. ముఖ్యంగా ప్రమాదకరంగా మారుతున్న భాగస్వామ్యాలను విడదీయడంలో ఆమె సఫలమైంది. మరో బౌలర్ శ్రీ చరణి రెండు వికెట్లు తీసినప్పటికీ, పరుగులు ధారాళంగా సమర్పించుకుంది. మిగతా బౌలర్లు వికెట్లు తీయడంలో విఫలమవడంతో ఇంగ్లండ్ జట్టు 288 పరుగుల భారీ స్కోరును నమోదు చేయగలిగింది. ఈ కఠినమైన లక్ష్యాన్ని భారత బ్యాటర్లు ఎలా ఛేదిస్తారనేది ఆసక్తికరంగా మారింది. ఈ మ్యాచ్ గెలిస్తేనే టీమిండియాకు సెమీస్ అవకాశాలుంటాయి.