'ఈ తొక్కలో సోన్ పాపడి మాకొద్దు': దీపావళి గిఫ్ట్‌ను విసిరికొట్టిన ఉద్యోగులు

ప్రతి సంవత్సరం దీపావళి పండుగ సందర్భంగా కార్పొరేట్ కంపెనీలు ఉద్యోగులకు బోనస్‌లు, బహుమతులు ఇచ్చి వారిని సంతోషపెట్టడం సర్వసాధారణం. అయితే హ‌ర్యానా రాష్ట్రంలో ఇటీవల చోటుచేసుకున్న ఓ ఘటన.. దీపావళి కానుకల విషయంలో ఉద్యోగుల ఆలోచనాధోరణి ఎంతగా మారిందో కళ్లకు కట్టింది. తమ కంపెనీ ఇచ్చిన దీపావళి బహుమతి పట్ల అసంతృప్తి చెందిన ఉద్యోగులు ఏకంగా ఆ బహుమతి డబ్బాలను కంపెనీ గేటు వద్దే విసిరిపారేసిన దృశ్యం ఇప్పుడు సోషల్ మీడియాలో వైరల్‌గా మారింది.

హ‌ర్యానా రాష్ట్రంలోని గ‌న్నౌర్ పారిశ్రామిక ప్రాంతంలో ఉన్న ఒక ప్రైవేట్ కంపెనీలో ఈ ఘటన జరిగింది. దీపావళి సందర్భంగా యాజమాన్యం తమ సిబ్బందికి 'సోన్ పాపిడి' డబ్బాలను అందించింది. సాధారణంగా దీపావళి బోనస్ లేదా విలువైన గిఫ్ట్‌లను ఆశించిన ఉద్యోగులకు ఈ బహుమతి నిరాశకు గురిచేసింది. బోనస్ ఇవ్వకుండా కేవలం సోన్ పాపిడి డబ్బా ఇవ్వడం పట్ల తీవ్ర అసంతృప్తికి గురైన ఉద్యోగులు.. ఆ స్వీట్ ప్యాకెట్‌లను పట్టుకుని వచ్చి కంపెనీ గేటు ముందు పడేశారు. బోనస్‌కు బదులు సోన్ పాపిడి ఇచ్చారు అంటూ ఉద్యోగులు నిరసన తెలిపినట్లు సమాచారం.

భారతీయ కంపెనీల్లో దీపావళి బహుమతులుగా స్వీట్లు, డ్రై ఫ్రూట్స్ ఇవ్వడం ఒక సంప్రదాయంగా వస్తున్నప్పటికీ, ఈ రోజుల్లో ఉద్యోగులు ఈ పద్ధతి పట్ల పెద్దగా మొగ్గు చూపడం లేదు. హర్యానా ఘటన ఉద్యోగుల్లో పెరుగుతున్న అసంతృప్తికి నిదర్శనంగా నిలిచింది. పండుగ సందర్భంగా ఖర్చుల కోసం గానీ, తమ అవసరాలకు తగ్గట్టుగా గానీ నగదు రూపంలో బోనస్ లేదా ఆన్‌లైన్ గిఫ్ట్ కార్డులను ఇవ్వాలని ఉద్యోగులు కోరుకుంటున్నారు.

ఉద్యోగుల్లో వస్తున్న ఈ మార్పును అనేక సర్వేలు వెల్లడిస్తున్నాయి. తాజాగా నిర్వహించిన ఒక సర్వేలో ఎక్కువ మంది ఉద్యోగులు స్వీట్లు, డ్రై ఫ్రూట్స్‌కు బదులుగా క్యాష్ బోనస్ లేదా తమకు నచ్చిన వస్తువులు కొనుగోలు చేసుకునేందుకు వీలైన ఆన్‌లైన్ గిఫ్ట్ కార్డులను కోరుకుంటున్నట్లు తేలింది. సుమారు 48 శాతానికి పైగా ఉద్యోగులు స్వీట్స్, డ్రై ఫ్రూట్స్ బహుమతులుగా అవసరం లేదని స్పష్టం చేసినట్లు ఆ సర్వే నివేదిక తెలిపింది.

మరోవైపు దేశంలో కొన్ని ప్రముఖ కంపెనీలు దీపావళి సందర్భంగా తమ ఉద్యోగులకు ఖరీదైన కార్లు, అపార్ట్‌మెంట్‌లు, విదేశీ పర్యటనలు, ఎలక్ట్రానిక్ గాడ్జెట్‌లు, ట్రాలీ బ్యాగ్‌ల వంటి విలువైన బహుమతులు అందిస్తున్న వార్తలు వింటూనే ఉన్నాం. ఈ నేపథ్యంలో కేవలం సోన్ పాపిడి లాంటి బహుమతులతో సరిపెట్టే కంపెనీల పట్ల ఉద్యోగుల్లో తీవ్ర వ్యతిరేకత వ్యక్తం అవుతోంది.