అవినీతి నిరోధక అధికారులు తిరిగేందుకు.. రూ.60 లక్షల విలువైన కార్లు
national | Suryaa Desk | Published : Tue, Oct 21, 2025, 06:57 PM
అవినీతి నిరోధక అంబుడ్స్మన్ అయిన లోక్పాల్పై విమర్శలు వస్తున్నాయి. ఆ సంస్థ ఇటీవల వేసిన టెండర్ తీవ్ర విమర్శలకు దారితీస్తోంది. లోక్పాల్ చైర్మన్, మాజీ సుప్రీంకోర్టు న్యాయమూర్తి అజయ్ మాణిక్రావ్ ఖాన్విల్కర్ సహా ఆ సంస్థ సభ్యుల కోసం.. కార్లు కొనుగోలు చేయాలని లోక్పాల్ టెండర్లు పిలిచింది. అందుకోసం BMW 330 Li సిరీస్కు చెందిన 7 లగ్జరీ సెడాన్ల కోసం అక్టోబర్ 16 ఓపెన్ టెండర్లు ఆహ్వానించింది. ఆ టెండర్ ప్రకారం.. "భారత లోక్పాల్ ఏడు BMW 3 సిరీస్ Li కార్లను సరఫరా చేయడానికి ప్రముఖ ఏజెన్సీల నుండి ఓపెన్ టెండర్లను ఆహ్వానిస్తోంది. బిడ్ సమర్పణకు ప్రారంభ తేదీ అక్టోబర్ 17. నవంబర్ 6న మధ్యాహ్నం 3 గంటల వరకు బిడ్లు సమర్పించొచ్చు" అని అందులో పేర్కొంది.
ఈ కారు ఒక్కోదానికి దాదాపు రూ. 60 లక్షలు ఉన్నట్లు తెలుస్తోంది. అలాంటి 7 కార్లను రెండు వారాల్లో ఈ డెలివరీ చేయాలని టెండర్ నోటీసులో పేర్కొంది. అంతేకాకుండా టెండర్ దక్కించుకున్న సంస్థ.. లోక్పాల్ డ్రైవర్లకు, సిబ్బందికి.. కార్ల గురించి ప్రాక్టికల్, థియరెటికల్ ట్రైనింగ్ ఇవ్వాలని కండిషన్ పెట్టింది. ఈ శిక్షణను కనీసం 7 రోజులు ఇవ్వాలని తెలిపింది. క్లాస్ రూం ట్రైనింగ్తో పాటు రోడ్డుపై కారును ఎలా నడపాలో కూడా శిక్షణ ఇవ్వాలని చెప్పింది. ఈ ట్రైనింగ్కు సంబంధించిన ఖర్చు అంతా టెండర్ దక్కించుకున్నవారే భరించాలని చెప్పింది. అయితే ఈ నోటీసులో ఏమున్నా.. ఇంత లగ్జరీ కార్లకు లోక్పాల్ టెండర్లు పిలవడం తీవ్ర విమర్శలకు దారి తీసింది.
ఈ విషయం సోషల్ మీడియాలో వైరల్ అయింది. సామాజిక కార్యకర్త, లాయర్ ప్రశాంత్ భూషన్తో పాటు అనేక మంది లోక్పాల్ తీరుపై అసహనం వ్యక్తం చేస్తున్నారు. "చాలా సంవత్సరాలుగా లోక్పాల్ను ఖాళీగా ఉంచారు. లోక్పాల్ వ్యవస్థను మోదీ ప్రభుత్వం దుమ్ములా మార్చింది. విలాసాలతో సంతోషంగా ఉన్న సేవకులను లోక్పాల్ సభ్యులుగా నియమించింది. వారు ఇప్పుడు తమ కోసం రూ. 60 లక్షలు విలువ చేసే BMW కార్లను కొనుగోలు చేస్తున్నారు!" అని ప్రశాంత్ భూషన్ ఎక్స్లో పోస్టు పెట్టారు.
దీనిపై కాంగ్రెస్ కూడా స్పందించింది. ఆ పార్టీ అధికార ప్రతినిధి షామా మొహమ్మద్ కూడా లోక్పాల్ను తీవ్రంగా విమర్శించారు. “లోక్పాల్ తన కోసం రూ. 5 కోట్ల విలువైన 7 లగ్జరీ BMW కార్లను కొనుగోలు చేయాలనుకుంటోంది. అవినీతిపై పోరాడాల్సిన సంస్థ ఇదే - ‘ఇండియా అగైన్స్ట్ కరప్షన్’ అనే ఉద్యమం తర్వాత ఏర్పాటైంది. ఆ ఉద్యమం ఆర్ఎస్ఎస్ మద్దతుతో కేవలం కాంగ్రెస్ ప్రభుత్వాన్ని పడగొట్టడానికి మాత్రమే సృష్టించారు” అని ఆరోపించారు.
|
|