పూణేలోని కోట వద్ద ముస్లిం మహిళల నమాజ్.. గోమూత్రంతో శుద్ధి చేసిన బీజేపీ ఎంపీ

చారిత్రక ప్రాధాన్యత కలిగిన పూణేలోని శనివార్ వాడ కోట ప్రాంగణంలో కొందరు ముస్లిం మహిళలు నమాజ్‌ చేస్తూ కనిపించిన వీడియో క్లిప్‌, మహారాష్ట్ర రాజకీయాల్లో పెద్ద దుమారాన్ని రేపింది. ఈ ఘటనపై తీవ్ర ఆగ్రహం వ్యక్తం చేసిన అధికార బీజేపీ ఎంపీ మేధా కులకర్ణి నేతృత్వంలోని హిందూ సంస్థల బృందం, ఆ ప్రదేశాన్ని 'శుద్ధి' చేసేందుకు ప్రయత్నించడంతో వివాదం మరింత రాజుకుంది.

నమాజ్ చేసిన ప్రదేశాన్ని ఎంపీ మేధా కులకర్ణి, ఇతర హిందూ సంఘాల నాయకులతో కలిసి ఆ ప్రదేశాన్ని గోమూత్రంతో శుద్ధి చేసి శివ స్తుతి నిర్వహించారు. "శనివార్ వాడ కేవలం ఒక కోట కాదు, ఇది మరాఠా సామ్రాజ్యానికి, ప్రతీ పుణెకర్‌కు గర్వకారణమని భావోద్వేగాల కేంద్రమని అలాంటి చోట నమాజ్ చేయడం దురదృష్టకరమని కులకర్ణి వ్యాఖ్యానించారు. మహారాష్ట్ర మంత్రి నితేష్ రాణే కూడా ఈ ఘటనను ఖండించారు. శనివార్ వాడ కోట హిందూ సమాజానికి పవిత్రమైనదని, ప్రార్థనలు చేయాలంటే మసీదులకు వెళ్లాలని సూచించారు. హజీ అలీ వంటి ముస్లిం పుణ్యక్షేత్రాల్లో హిందువులు హనుమాన్ చాలీసా లేదా హారతి చేస్తే ముస్లింల మనోభావాలు దెబ్బతినవా అని ఆయన ప్రశ్నించారు.

అయితే బీజేపీ ఎంపీ చర్యపై ప్రతిపక్షాలు తీవ్ర స్థాయిలో విరుచుకు పడ్డాయి. ఎన్సీపీ ప్రతినిధి రూపాలి పాటిల్ థోంబ్రే మాట్లాడుతూ.. పూణేలో రెండు వర్గాలు సామరస్యంగా జీవిస్తున్నాయని, కులకర్ణి మత ఉద్రిక్తతలను రెచ్చగొట్టే ప్రయత్నం చేస్తున్నారని ఆరోపించారు. కులకర్ణిపై కేసు నమోదు చేయాలని పోలీసులను డిమాండ్ చేశారు. కులకర్ణి చర్య భారత లౌకికవాదాన్ని ధ్వంసం చేయడమేనని ఏఐఎంఐఎం ప్రతినిధి వారిస్ పఠాన్ అన్నారు. మూడు నిమిషాల నమాజ్ వల్ల ఎవరికీ ఎలాంటి ఇబ్బంది కలగదని, కానీ బీజేపీ నాయకులు తమ మనస్సుల్లోని ద్వేషాన్ని శుద్ధి చేసుకోవాలని పఠాన్ ఘాటుగా విమర్శించారు. రాజ్యాంగంలోని ఆర్టికల్ 25 ప్రకారం మత స్వేచ్ఛ హక్కు ఉందని ఆయన గుర్తు చేశారు.

ఈ వివాదంపై స్పందించిన పూణే నగర పోలీసులు, ఆర్కియాలజికల్ సర్వే ఆఫ్ ఇండియా అధికారి ఫిర్యాదు మేరకు కోట వద్ద నమాజ్ చేసిన గుర్తు తెలియని మహిళలపై కేసు నమోదు చేశారు. కోట చుట్టూ భద్రతను పెంచారు. ఏఎస్ఐ రక్షిత స్మారక చిహ్నాల్లో మతపరమైన ప్రార్థనలకు అనుమతి లేదని స్పష్టం చేశారు. ఏఎస్ఐ అధికారుల ఫిర్యాదు ఆధారంగా తదుపరి చర్య తీసుకుంటున్నామని.. భద్రతా లోపాలు లేకుండా చూసుకుంటామని పోలీసులు స్పష్టం చేశారు.