కర్నూలు బస్సు ప్రమాదం.. కంట్రోల్ రూమ్స్ ఏర్పాటు

కర్నూలు జిల్లాలో ప్రైవేట్ ట్రావెల్స్ బస్సు ఘోర ప్రమాదానికి గురైంది. చిన్న టేకూరు వద్ద బస్సు.. ఓ బైక్‌ను ఢీకొట్టడంతో ఈ ప్రమాదం జరిగింది. బైక్‌ను ఢీకొట్టడం, వెంటనే బస్సులో మంటలు చెలరేగటంతో బైక్ మీద ఉన్న వ్యక్తితో పాటు బస్సులోని పలువురు ప్రాణాలు కోల్పోయారు. ఈ ఘటనలో ఇప్పటి వరకూ 19 మృతదేహాలను అధికారులు వెలికితీశారు. ఘటనాస్థలికి చేరుకున్న ఫోరెన్సిక్‌ బృందాలు మృతదేహాలను బస్సులో నుంచి వెలికితీశాయి.

మరోవైపు ఈ ఘటనపై సీఎం నారా చంద్రబాబు నాయుడు దిగ్ర్భాంతిని వ్యక్తం చేశారు. దుబాయ్ పర్యటనలో ఉన్న ఆయన.. రవాణా మంత్రి మండిపల్లి రాంప్రసాద్ రెడ్డి. ఇతర అధికారులతో వీడియో కాన్ఫరెన్స్ నిర్వహించారు. కర్నూలు బస్సు ప్రమాదంపై ఇతర రాష్ట్రాల రవాణా శాఖ మంత్రులు, అధికారులతో విచారణ చేయించాలని ఆదేశించారు. అలాగే ఈ ఘటనలో చనిపోయిన వారి వివరాలు గుర్తించాలని.. బాధిత కుటుంబాలకు తక్షణ సాయం అందించాలని అధికారులను చంద్రబాబు ఆదేశించారు. ప్రమాదంలో గాయపడిన వారికి మెరుగైన వైద్య చికిత్సలు అందేలా చూడాలని ఆదేశించారు.

 మరోవైపు ఏపీ హోం మంత్రి వంగలపూడి అనిత ఘటనాస్థలికి పరిశీలించారు. కర్నూలు జిల్లా కల్లూరు మండలం చిన్నటేకూరు వద్ద ప్రమాద స్థలాన్ని డీజీపీ హరీష్ కుమార్ గుప్తా , ఇంటెలిజెన్స్ చీఫ్ మహేష్ చంద్ర లడ్డాలతో కలిసి పరిశీలించారు. ప్రైవేట్ బస్సు ప్రమాదానికి గల కారణాలపై స్థానిక పోలీసు అధికారులను అడిగి తెలుసుకున్నారు. ప్రమాదంలో మృతి చెందిన వారిని గుర్తించేందుకు అవసరమైతే ఘటనాస్థలంలోనే డీఎన్ఏ పరీక్షలు నిర్వహించాలని ఆదేశించారు. బస్సుప్రమాదం అత్యంత బాధాకరమన్న వంగలపూడి అనిత.. ప్రాణాలు కోల్పోయిన వారి కుటుంబ సభ్యులకు ప్రగాఢ సానుభూతి తెలియజేశారు. గాయపడిన వారు త్వరగా కోలుకోవాలని ప్రార్థిస్తున్నట్లు పేర్కొన్నారు.

కర్నూలు ప్రైవేట్ బస్సు ప్రమాదం.. కంట్రోల్ రూమ్స్ ఏర్పాటు

మరోవైపు కర్నూలు జిల్లాలో జరిగిన ప్రైవేట్ బస్సు ప్రమాదంలో పలువురు చనిపోగా.. కొంతమంది గాయపడి ఆస్పత్రిలో చికిత్స పొందుతున్నారు. మరికొందరి ఆచూకీ తెలియాల్సి ఉంది. ఈ నేపథ్యంలో బాధిత కుటుంబాల కోసం ప్రభుత్వం కంట్రోల్ రూమ్స్ ఏర్పాటు చేసింది. కర్నూలు కలెక్టరేట్, కర్నూలు ఆస్పత్రి, ఘటనాస్థలం వద్ద హెల్ప్ లైన్ నంబర్లు ఏర్పాటు చేసింది.

కంట్రోల్ రూమ్స్ నంబర్లు ఇవే..

కర్నూలు కలెక్టరేట్ - 0858 -277305

కర్నూలు ప్రభుత్వ జనరల్ ఆస్పత్రి - 9121101059

ఘటనా స్థలం వద్ద కంట్రోల్ రూమ్ -9121101061

కర్నూలు పోలీస్ కంట్రోల్ రూమ్ -9121101075

కర్నూలు ప్రభుత్వ జనరల్ ఆస్పత్రి హెల్ప్ డెస్క్ -9494609814, 9052951010

బాధితుల కుటుంబసభ్యులు వివరాలు కావాలంటే ఈ నంబర్లను సంప్రదించాలని సూచించింది.