బైక్ ప్రమాదంలో మరణించిన స్నేహితుడిపైనే కేసు నమోదు!

కర్నూలు జిల్లా ఉలిందకొండ పోలీస్ స్టేషన్ పరిధిలో జరిగిన రోడ్డు ప్రమాదం కేసు అనూహ్య మలుపు తిరిగింది. బైక్ ప్రమాదంలో ప్రాణాలు కోల్పోయిన శివశంకర్‌పైనే అతని స్నేహితుడు ఎర్రిస్వామి ఫిర్యాదు చేయడంతో పోలీసులు కేసు నమోదు చేశారు. తాము ఇద్దరం కలిసి మద్యం సేవించామని, శివశంకర్ నిర్లక్ష్యపు డ్రైవింగ్ వల్లే బైక్ అదుపు తప్పి కిందపడిపోయామని, ఈ ఘటనలో శివ అక్కడికక్కడే మృతి చెందాడని ఎర్రిస్వామి తన ఫిర్యాదులో పేర్కొన్నాడు. ఈ వింత ఫిర్యాదుతో పోలీసులు విచారణను వేగవంతం చేశారు.
పోలీసులకు ఎర్రిస్వామి ఇచ్చిన వివరాల ప్రకారం... ప్రమాదానికి ముందు శివశంకర్, తాను మద్యం సేవించారు. మద్యం మత్తులో శివశంకర్ బైక్ నడపడం వల్లే అది నియంత్రణ కోల్పోయిందని, దీంతో ఇద్దరూ కిందపడిపోయారని తెలిపాడు. ఈ ఘటనలో శివశంకర్ అక్కడికక్కడే మరణించగా, తాను స్వల్ప గాయాలతో బయటపడ్డానని చెప్పాడు. మృతదేహాన్ని రోడ్డు పక్కకు తీసేందుకు ప్రయత్నిస్తున్న సమయంలో, ప్రమాద స్థలంలో పడి ఉన్న తమ బైక్‌ను మరో వాహనం ఢీకొట్టి, అది రోడ్డు మధ్యలోకి వచ్చిందని వివరించాడు.
రోడ్డు మధ్యలో పడి ఉన్న బైక్‌ను గమనించకుండా వేమూరి కావేరి ట్రావెల్స్ బస్సు ఢీకొట్టి, కొంత దూరం ఈడ్చుకెళ్లిందని ఎర్రిస్వామి పేర్కొన్నాడు. బస్సు కింద బైక్ ఇరుక్కుపోయి రాపిడికి గురవడం వల్లే మంటలు చెలరేగి, బస్సు దగ్ధమైందని వివరించాడు. దీంతో శివశంకర్ నిర్లక్ష్యం, మద్యం సేవించి వాహనం నడపడం వల్లే ఈ పరిణామాలు జరిగాయని ఎర్రిస్వామి పోలీసులకు స్పష్టం చేశాడు. అతని వాంగ్మూలం ఆధారంగా ఉలిందకొండ పోలీసులు శివశంకర్‌పై సంబంధిత సెక్షన్ల కింద కేసు నమోదు చేశారు.
సాధారణంగా రోడ్డు ప్రమాదాల్లో మరణించినవారిపై కేసు నమోదు కావడం అరుదు. అయితే, మృతుడి స్నేహితుడి ఫిర్యాదు, వాంగ్మూలం, అలాగే బైక్ ప్రమాదం కారణంగానే బస్సు ప్రమాదం జరిగిందనే అంశాల నేపథ్యంలో పోలీసులు ఈ నిర్ణయం తీసుకున్నారు. రోడ్డు ప్రమాదానికి కారణమైన అసలు పరిస్థితులపై మరింత లోతుగా దర్యాప్తు చేస్తున్నారు. మద్యం సేవించి డ్రైవింగ్ చేయడం ఎంతటి ప్రమాదకర పరిణామాలకు దారితీస్తుందో ఈ ఘటన మరోసారి రుజువు చేసిందని పోలీసులు తెలిపారు.