కడుపునొప్పంటే బాలికను ఆస్పత్రికి తీసుకెళ్లిన తల్లి.. పరీక్షల్లో షాకింగ్

భుజాలపై ఎత్తుకుని ప్రపంచాన్ని చూపేది నాన్న.. గుండెలపై పెట్టుకుని ఆడించేది నాన్న.. కాలికి మట్టి అంటకుండా కంటికి రెప్పలా కాపాడేది నాన్న.. సమాజంలోని వేటకుక్కల నుంచి రక్షించేది నాన్న.. సంతోషమైనా, సంబరమైనా.. బాధైనా, భయం కలిగినా.. మన వెంట ఉండి, మనల్ని ముందుకు నడిపించేది నాన్న.. కానీ.. ఆ బాలిక విషయంలో ఆ నాన్న, మృగాడిగా మారాడు.. మద్యం మత్తులో కన్నతండ్రే కసాయిగా, కర్కోటకుడిగా మారి.. ఓ బాలిక జీవితాన్ని చిదిమేశాడు. తాగిన మత్తులో కూతురనే విచక్షణ మరిచి ఆమెపై అఘాయిత్యానికి పాల్పడ్డాడు. కుటుంబ బంధాలనే ప్రశ్నార్థకం చేస్తూ.. సభ్యసమాజం తలదించుకునే ఈ ఘటన ప్రకాశం జిల్లాలో చోటుచేసుకుంది. కొండపి మండలంలో జరిగిన ఈ ఘటన.. సమాజంలో రోజురోజుకూ దిగజారుతున్న పరిస్థితులకు అద్దం పడుతోంది. నిందితుడిపై పోక్సో కేసు నమోదు చేసిన పోలీసులు.. అతని కోసం గాలిస్తున్నారు.

స్థానిక పోలీసులు వెల్లడించిన వివరాల ప్రకారం.. కొండపి మండలంలోని ఓ గ్రామానికి చెందిన 12 ఏళ్ల బాలికపై ఆమె తండ్రి అత్యాచారానికి పాల్పడ్డాడు. మద్యం మత్తులో ఈ దారుణానికి పాల్పడినట్లు తెలిసింది. కొన్ని రోజుల క్రితం ఇంట్లో ఎవరూ లేని సమయంలో రెండో కూతురిపై.. అఘాయిత్యానికి పాల్పడినట్లు వెల్లడైంది. అయితే తాజాగా ఆ బాలిక కడుపునొప్పిగా ఉందని చెప్పటంతో తల్లి ఆస్పత్రికి తీసుకుని వెళ్లింది. ఒంగోలులోని ఆస్పత్రికి తీసుకెళ్లగా.. వైద్యులు బాలికను పరీక్షించి, ఆమె మీద అఘాయిత్యం జరిగినట్లు గుర్తించారు. ఈ విషయాన్ని బాలిక తల్లికి తెలియజేశారు. దీంతో బాలిక తల్లికి ఏం చేయాలో తోచలేదు. కూతురిని ఇంటికి తీసుకువచ్చింది..

మిగతా కుటుంబసభ్యులకు ఈ విషయాన్ని తెలిపింది. దీంతో కుటుంబసభ్యులు అందరూ కలసి బాలికను ఏం జరిగిందనే దానిపై ఆరా తీశారు. దీంతో అసలు విషయం వెలుగులోకి వచ్చింది. కొన్ని రోజుల కిందట తండ్రి తనపై అఘాయిత్యానికి పాల్పడినట్లు బాలిక కుటుంబసభ్యులకు తెలియజేసింది. దీంతో బాలిక తల్లి కొండపి పోలీసులకు ఫిర్యాదు చేసింది. బాలిక తల్లి ఫిర్యాదు ఆధారంగా తండ్రిపై పోక్సో చట్టం కింద కేసు నమోదు చేశారు. అయితే ఈలోపే బాలిక తండ్రి పరారైనట్లు సమాచారం. దీంతో కొండపి పోలీసులు అతని కోసం గాలిస్తున్నారు.