కొత్త రూల్.. లోన్ తీసుకున్నాక కూడా వడ్డీ తగ్గించుకోవచ్చు

రిజర్వ్ బ్యాంక్ ఆఫ్ ఇండియా ఈనెలలో చేసిన కొన్ని కీలక మార్పుల వల్ల హోమ్ లోన్, పర్సనల్ లోన్, వెహికల్ లోన్స్ వంటి రుణాలు తీసుకున్న వారు తమ నెల వారీ వాయిదాలు తగ్గించుకోవడం సులభమైంది. లోన్ తీసుకున్న కొన్ని నెలలు, సంవత్సరాల తర్వాత కూడా వడ్డీ రేట్లు తగ్గించుకోవచ్చు. ఇప్పుడు అంతా రుణం తీసుకున్న వారి చేతుల్లోనే ఉంటుంది. ఒకప్పుడు ఆర్‌బీఐ వడ్డీ రేట్లను తగ్గించినప్పుడు ఆ ప్రయోజనం కేవలం కొత్త రుణ గ్రహీతలకు మాత్రమే లభించేది. పాత రుణ గ్రహీతలు మూడేళ్ల పాటు వేచి ఉండాల్సి వచ్చేది. కానీ, తాజాగా రిజర్వ్ బ్యాంక్ నిబంధనలు సడలించి అదిరే శుభవార్త చెప్పింది.

రిజర్వ్ బ్యాంక్ ఆఫ్ ఇండియా అక్టోబర్ 1వ తేదీ నుంచి రుణాలకు సంబంధించిన కీలక నిర్ణయం తీసుకుంది. దీంతో ఈఎంఐ తగ్గిపోనుంది. అది హోమ్ లోన్, కారు లోన్, పర్సనల్ లోన్ ఏదైనా పర్వాలేదు. మీరు వడ్డీ రేట్లు తగ్గించుకోవచ్చు. మీరు లోన్ తీసుకున్న తర్వాత మీ క్రెడిట్ స్కోరు పెరిగింది అనుకుందాం. అప్పుడు మీరు మీ బ్యాంకుకు వెళ్లి మెరుగైన క్రెడిట్ స్కోరును చూపించి వడ్డీ రేటును తగ్గించాలని కోరవచ్చు. దీంతో బ్యాంకులు వడ్డీ తగ్గిస్తాయి.

లోన్ వడ్డీ రేట్లు రెండు రకాలుగా ఉంటాయి. ఒక స్థిరమైన వడ్డీ రేటు, ఒక బ్యాంక్ స్ప్రెడ్ (ఫ్లోటింగ్ రేట్ వడ్డీ). ఇప్పటి వరకు ఉన్న నిబంధనల ప్రకారం మీ క్రెడిట్ స్కోర్ 650 నుంచి 780 వరకు పెరిగిందని అనుకుంటే మీరు వడ్డీ రేటు తగ్గింపు పొందాలంటే 3 సంవత్సరాల వరకు వేచి చూడాల్సి వచ్చేంది. అయితే, ఆర్‌బీఐ ఆ నిబంధనను తొలగించింది. ఇకపై మీ క్రెడిట్ స్కోర్ ఎప్పుడు మెరుగైనా మీరు బ్యాంకుకు వెళ్లి మీ వడ్డీ తగ్గించాలని కోరవచ్చు. దీంతో మీ ఈఎంఐ వెంటనే తగ్గుతుంది. ఇకపై 3 ఏళ్ల పాటు వేచి చూడడం, పెనాల్టీలు అనేవి ఉండవు. మీరు చేయాల్సిందల్లా మీ క్రెడిట్ స్కోరును మెరుగుపరుచుకోవడమే. అయితే ఇది ఆటోమేటిక్‌గా జరగదని గుర్తుంచుకోవాలి. బ్యాంకులు ఇలాంటి విషయాలను తెలియజేయవు. మీరే వెళ్లి అడగాల్సి ఉంటుంది.

మార్పులు ఏమిటి?

వడ్డీ రేటులో రెండు భాగాలుంటాయి

బెంచ్‌మార్క్ రేటు ఇది రెపో రేటు వంటి RBI రేటుపై ఆధారపడి ఉంటుంది.

బ్యాంక్ స్ప్రెడ్ ( Banks Spread ) ఇందులో రుణ గ్రహీత క్రెడిట్ ప్రొఫైల్, బ్యాంక్ మార్జిన్ వంటి అంశాలు ఉంటాయి.

గతంలో బ్యాంకులు స్ప్రెడ్ లో క్రెడిట్ రిస్క్ కాని భాగాన్ని లోన్ మంజూరైన తర్వాత కనీసం మూడేళ్ల వరకు మార్చడానికి వీలుండేది కాదు. ఇప్పుడు (అక్టోబర్ 1, 2025 నుంచి) ఈ మూడేళ్ల లాక్-ఇన్‌ను ఆర్‌బీఐ తొలగించింది. దీంతో బ్యాంకులు మెరుగైన క్రెడిట్ స్కోరు ఉన్న పాత కస్టమర్ల కోసం రేట్ల తగ్గింపు ప్రయోజనాన్ని త్వరగా అందించడానికి ఎప్పుడైనా స్ప్రెడ్‌ను తగ్గించే వెసులుబాటు లభించింది.

రుణగ్రహీతగా మీరు ఏమి చేయాలి?

ఈ కొత్త నిబంధన ఆటోమేటిక్‌గా అమలు కాదు. లోన్ తీసుకున్న వారు తమ ప్రయోజనం కోసం బ్యాంకులను సంప్రదించి అడగాలి. అందుకోసం.. క్రెడిట్ ప్రొఫైల్ తనిఖీ చేసుకోవాలి. మీ క్రెడిట్ స్కోరు మెరుగుపడిందో లేదో చూసుకోవాలి. మీ ఇతర రుణాలను తగ్గించుకోవడం ఈ ప్రక్రియకు సహాయపడుతుంది. క్రెడిట్ స్కోర్ మెరుగు పడితే బ్యాంకును సంప్రదించాలి. మీకు లోన్ ఇచ్చిన బ్యాంక్‌కు వెళ్లి 'నా మెరుగైన క్రెడిట్ స్కోరు దృష్ట్యా నా స్ప్రెడ్ కాంపోనెంట్‌ను తిరిగి లెక్కించండి' అని అడగాలి. మీ ప్రస్తుత వడ్డీ రేటును ఇతర బ్యాంకులు ఇస్తున్న కొత్త వడ్డీ రేట్లతో పోల్చి మీ బ్యాంకుతో తక్కువ వడ్డీ రేటు కోసం అడగాలి. అలాగే మీరు ఫ్లోటింగ్ రేటు నుంచి స్థిర వడ్డీ రేటుకు మారే అవకాశాన్ని సైతం ఆర్‌బీఐ కల్పించింది.