యూకేలో జాతి వివక్షతో భారత సంతతి యువతిపై అత్యాచారం

బ్రిటన్‌లో భారతీయ మూలాలున్న మహిళలపై జాత్యహంకార ప్రేరేపిత లైంగిక దాడులు స్థానికంగా తీవ్ర కలకలం సృష్టిస్తున్నాయి. గత నెలలో సిక్కు మహిళపై జరిగిన దారుణ ఘటన మరవక ముందే.. తాజాగా మరో 20 ఏళ్ల భారతీయ యువతిపై అమానుష అత్యాచార ఘటన వెలుగులోకి వచ్చింది. పశ్చిమ మిడ్‌లాండ్‌లోని వాల్సల్ ప్రాంతంలో ఈ దారుణం చోటు చేసుకోగా.. కేసు నమోదు చేసుకున్న పోలీసులు నిందితుడిని పట్టుకునేందుకు యుద్ధ ప్రాతిపదికన గాలింపు చర్యలు చేపట్టారు.

యూకే కాలమానం ప్రకారం.. శనివారం రోజు సాయంత్రం జరిగిన ఈ ఘటన ఆలస్యంగా వెలుగులోకి వచ్చింది. ఘటన జరిగిన రోజే వాల్సల్ ప్రాంతంలో ఒక యువతిపై లైంగిక దాడి జరిగినట్లు వెస్ట్ మిడ్‌లాండ్స్ పోలీసులకు సమాచారం అందింది. వెంటనే స్పందించిన పోలీసులు ఘటనా స్థలానికి చేరుకుని.. బాధితురాలిని చికిత్స నిమిత్తం ఆసుపత్రికి తరలించారు. ఆపై దర్యాప్తు చేపట్టారు. ఈక్రమంలోనే పోలీసులు సంఘటనా స్థలానికి చేరుకోగా.. ఆ ప్రాంతంలోని సీసీటీవీ దృశ్యాలను క్షుణ్ణంగా పరిశీలించారు.

ప్రాథమిక పరిశీలనలో సుమారు 30 ఏళ్ల వయసు కలిగిన ఓ శ్వేత జాతీయుడే ఈ దారుణానికి పాల్పడినట్లు నిర్ధారణకు వచ్చారు. సేకరించిన దృశ్యాల ఆధారంగా ఆ అనుమానితుడి ఆచూకీ కోసం గాలిస్తున్నారు. నిందితుడిని వీలైనంత త్వరగా అరెస్టు చేసి చట్టపరమైన చర్యలు తీసుకుంటామని వెస్ట్ మిడ్‌లాండ్స్ పోలీసు అధికారులు మీడియాకు తెలిపారు.

సిక్కు ఫెడరేషన్ యూకే వెల్లడించిన వివరాల ప్రకారం.. బాధితురాలు ఒక పంజాబీ యువతి. దుండగుడు ఆమె నివాసం ఉండే ఇంటి తలుపును బద్దలు కొట్టి లోపలికి చొరబడి మరీ ఈ అమానుషానికి పాల్పడినట్లు పేర్కొన్నారు. అంతకుముందు నెలలోనే ఓల్డ్‌బరీ ప్రాంతంలో కూడా ఇదే తరహాలో ఒక సిక్కు యువతిపై లైంగిక దాడిజరిగింది. వరుసగా భారతీయ యువతులపై జరుగుతున్న ఈ దాడులను పలువురు యూకే రాజకీయ నాయకులు, పౌర హక్కుల సంఘాల నేతలు తీవ్రంగా ఖండిస్తున్నారు. మైనారిటీ వర్గాల రక్షణకు ప్రభుత్వం తక్షణ చర్యలు తీసుకోవాలని డిమాండ్ చేస్తున్నారు.