ప్రపంచంలోనే అతిపెద్ద బుద్ధుడి బంగారు విగ్రహం

థాయ్‌లాండ్‌లోని గోల్డెన్ బుద్ధ విగ్రహం, దాని చరిత్ర ఇప్పుడు అందర్నీ ఆశ్చర్యపరుస్తోంది. ఇది కేవలం ఒక కళాఖండం మాత్రమే కాకుండా.. సుదీర్ఘ కాలం నాటి విశ్వాసం, చాకచక్యం, పునరుద్ధరణల అద్భుత గాథను వివరిస్తోంది. ప్రపంచంలోనే అతిపెద్ద ఘనమైన బంగారు బుద్ధ విగ్రహంగా గిన్నిస్ వరల్డ్ రికార్డ్స్‌లో ఈ గోల్డెన్ బుద్ధ విగ్రహం నిలిచింది. బ్యాంకాక్‌లోని వాట్ ట్రైమిట్ ఆలయంలో ఈ బుద్ధుడి విగ్రహాన్ని ప్రతిష్టించారు.

ఈ బుద్ధుడి శిల్పం సుమారు 3 మీటర్ల ఎత్తుతో ఉంది. అంతేకాకుండా దాని బరువు సుమారు 12,125 పౌండ్ల (అంటే దాదాపు 5,500 కిలోలు) ఉంటుంది. ఈ విగ్రహాన్ని దాదాపు 83 శాతం స్వచ్ఛమైన బంగారంతో తయారైంది. విగ్రహం శిరస్సు, జుట్టు భాగాలు అయితే 99 శాతం స్వచ్ఛత కలిగి ఉన్నాయి. ప్రస్తుత బంగారం ధరల ప్రకారం.. దీని విలువ 480 మిలియన్ అమెరికన్ డాలర్లు ( అంటే భారత కరెన్సీలో సుమారు రూ. 4235 వేల కోట్లు) ఉంటుందని అంచనా వేస్తున్నారు.

అయితే ఈ అపారమైన బంగారు నిధి శతాబ్దాల పాటు మందంగా ఉండే ప్లాస్టర్ (బంకమన్ను), రంగుల గాజు ముక్కల పొరతో కప్పి ఉంచారు. దండయాత్రల సమయంలో దొంగలు, శత్రువుల నుంచి రక్షించడానికి పూర్వీకులు చేసిన ప్రయత్నంగా భావిస్తున్నారు. సురక్షిత కవచం ఏర్పాటు చేయడం వల్ల సుమారు 200 సంవత్సరాల పాటు.. కేవలం ఆ విగ్రహాన్ని సాధారణ ప్లాస్టర్ విగ్రహంగానే పరిగణించారు.

ఈ విగ్రహం అసలు రహస్యం 1955లో అనుకోకుండా బయటపడింది. అప్పట్లో ఈ విగ్రహాన్ని తరలిస్తుండగా.. అది ప్రమాదవశాత్తూ ఒక్కసారిగా కిందపడిపోయింది. దీంతో ప్లాస్టర్ పైపొరలో కొంత భాగం ఊడిపోయి.. లోపల ఉన్న మెరిసే బంగారం వెలుగులోకి వచ్చింది. ప్లాస్టర్‌ను పూర్తిగా తొలగించగా.. అద్భుతమైన బంగారు బుద్ధ విగ్రహం బయటపడింది. ఈ ఆవిష్కరణ థాయ్‌లాండ్ చరిత్రలో ఒక అద్భుత ఘట్టంగా నిలిచింది.

ఆ విగ్రహం బయటపడినపుడు అది భూమిస్పర్శ ముద్ర భంగిమలో ఉంది. ఇది బౌద్ధంలో జ్ఞానోదయం, అజ్ఞానంపై విజయాన్ని సూచిస్తుంది. కళాత్మకత, ఆధ్యాత్మిక వైభవం కలగలిపిన ఈ గోల్డెన్ బుద్ధ విగ్రహం.. థాయ్‌లాండ్‌కు ఆధ్యాత్మికతతో పాటు పర్యాటకంగానూ ఎంతో ప్రాధాన్యతను తెచ్చిపెట్టింది.