ముహూర్తానికి ముందు విషాదం,,,గోదావరి నదిలో మునిగి యువతి మృతి

మధురమైన ప్రేమకథ విషాదంగా ముగిసింది. ఇన్‌స్టాగ్రామ్ ద్వారా పరిచయమై, కులాలను సైతం పక్కన పెట్టి పెద్దల అంగీకారంతో పెళ్లికి సిద్ధమైన ఒక ప్రేమ జంటకు.. పెళ్లి ముహూర్తానికి కొద్ది రోజుల ముందే విధి ఊహించని షాక్ ఇచ్చింది. పెళ్లికి ముందు సంప్రదాయ స్నానమాచరించేందుకు గోదావరి నదికి వెళ్లగా.. ప్రమాదవశాత్తు నీట మునిగి యువతి ప్రాణాలు కోల్పోవడం తీవ్ర విషాదాన్ని నింపింది. ఈ హృదయ విదారక ఘటన పెద్దపల్లి జిల్లా గోదావరిఖ నగర సమీపంలో చోటు చేసుకుంది.

గోదావరిఖని విఠల్ నగర్‌కు చెందిన దానవేన రవితేజ సింగరేణిలోని బోరింగ్ డిపార్ట్‌మెంట్‌లో కాంట్రాక్ట్ కార్మికుడిగా పనిచేస్తున్నాడు. పెద్దపల్లి మండలం పెద్దబొంకూరు గ్రామానికి చెందిన యువతి (17) పదవ తరగతి వరకు చదివి ప్రస్తుతం ఇంటి వద్దే ఉంటుంది. ఈ క్రమంలో.. రెండేళ్ల క్రితం ఇన్‌స్టాగ్రామ్ ద్వారా వీరిద్దరి మధ్య పరిచయం ఏర్పడి, అది ప్రేమగా మారింది. కులాలు, సంప్రదాయాలు వేరైనా రవితేజ తల్లిదండ్రులు వారి ప్రేమను అంగీకరించారు. యువతి కూడా రవితేజను వివాహం చేసుకోవాలనే ఉద్దేశంతో.. నెల రోజుల క్రితం ఇంట్లో ఎవరికీ చెప్పకుండా గోదావరిఖనిలోని రవితేజ ఇంటికి వచ్చింది. అయితే, యువతికి అప్పటికింకా 18 ఏళ్లు నిండకపోవడంతో ఇద్దరి కుటుంబ సభ్యులు కలిసి చర్చించి.. ఆమెకు 18 ఏళ్లు నిండిన తర్వాత వివాహం చేయాలని నిర్ణయించారు.

పెళ్లి చేసేందుకు పెద్దలు అంగీకరించడంతో.. వచ్చే నెల ఒకటో తేదీ వివాహ ముహూర్తాన్ని కూడా నిర్ణయించారు. దీంలో భాగంగా.. సంప్రదాయం ప్రకారం పెళ్లికి ముందు చేయాల్సిన గోదావరి నదీ స్నానానికి (గంగ స్నానానికి) యువతి, రవితేజతో పాటు వారి కుటుంబ సభ్యులు వెళ్లారు. అయితే దురదృష్టవశాత్తు నదిలో స్నానం చేస్తున్న సమయంలో ప్రేమ జంట ఇద్దరూ ప్రమాదవశాత్తు నీటిలో మునిగిపోయారు. అక్కడే ఉన్న జాలర్లు, కుటుంబ సభ్యులు వెంటనే స్పందించి వారిని బయటకు తీశారు.

రవితేజకు ప్రాణాపాయం తప్పినప్పటికీ.. యువతి మాత్రం అప్పటికే మృతి చెందింది. పెళ్లి పీటలెక్కాల్సిన కూతురు, కళ్ల ముందే విగతజీవిగా మారడంతో యువతి కుటుంబ సభ్యులు కన్నీరుమున్నీరుగా విలపించారు. మృతురాలి తల్లి ఫిర్యాదు మేరకు ఘటనపై పోలీసులు కేసు నమోదు చేసి, దర్యాప్తు ప్రారంభించారు. పెళ్లికి ముందే సంతోషం విషాదంగా మారడంతో రెండు కుటుంబాల్లోనూ తీరని దుఃఖం అలుముకుంది.