ప్రభుత్వ బ్యాంకులు విదేశీ సంస్థల చేతిలో..!

 దేశ ఆర్థిక వ్యవస్థకు వెన్నెముకగా నిలిచిన ప్రభుత్వ రంగ బ్యాంకులను మోడీ సర్కార్ క్రమంగా ప్రయివేటు మరియు విదేశీ పెట్టుబడిదారుల చేతికి ఇవ్వాలని యోచిస్తోంది. దీని కోసం ప్రభుత్వ బ్యాంకులలో ఎఫ్‌డిఐ పరిమితిని 20 శాతం నుండి 49 శాతం వరకు పెంచే ప్రతిపాదనలు సిద్ధం చేశారు. ఈ అంశంపై ఆర్థిక మంత్రిత్వ శాఖ, భారత రిజర్వ్ బ్యాంక్ (ఆర్‌బిఐ)తో చర్చలు జరుపుతోంది.ప్రస్తుతం, దేశంలో 12 ప్రభుత్వ రంగ బ్యాంకులు ఉన్నాయి. వీటి మొత్తం ఆస్తులు సుమారు 1.95 లక్షల కోట్ల డాలర్లుగా (దాదాపు రూ.170 లక్షల కోట్లు) ఉన్నాయి. ఈ బ్యాంకులు దేశంలోని బ్యాంకింగ్ రంగంలో 55 శాతం వాటాను కలిగి ఉన్నాయి. కేంద్రం లక్ష్యంగా పెట్టుకున్నది, ఈ బ్యాంకుల్లో కనీసం 49 శాతం వాటా విదేశీ పెట్టుబడిదారుల చేతికి వెళ్లేలా చేయడం. ఉదాహరణకు, కెనరా బ్యాంక్‌లో విదేశీ వాటా 12 శాతం మాత్రమే, యూకో బ్యాంక్‌లో దాదాపు సున్నా శాతమే ఉంది.ఇంతకుముందు కూడా, విదేశీ పెట్టుబడిదారులు భారత ప్రభుత్వ బ్యాంకులపై ఆసక్తి చూపించటం మొదలుపెట్టారు. ఇటీవల, ఎమిరేట్స్‌ ఎన్‌బిడి RBL బ్యాంక్‌లో 60 శాతం వాటాను 3 బిలియన్ డాలర్ల (రూ.26వేల కోట్లు)కు స్వాధీనం చేసుకుంది. అలాగే, జపాన్‌లోని సుమిటోమో మిత్సురు బ్యాంక్ యెస్ బ్యాంక్‌లో 20 శాతం వాటాను 1.6 బిలియన్ డాలర్ల (రూ.14వేల కోట్లు)కు కొనుగోలు చేసింది. ఈ నేపథ్యంలో, కేంద్రం ప్రభుత్వ బ్యాంకుల వాటాలను విదేశీ సంస్థలకు విక్రయించడం ద్వారా ఖజానా నింపాలని యోచిస్తోంది.నిపుణులు సూచిస్తున్నట్లుగా, సాధారణంగా ప్రయివేటు బ్యాంకులు పేద, మధ్యతరగతి ప్రజలకు చౌకమైన బ్యాంకింగ్ సేవలు అందించడం తగ్గించాయి. జన్‌ధన్ వంటి ఖాతాలను కూడా సులభంగా అందించడం లేదని వారు పేర్కొంటున్నారు. కొంతమంది బ్యాంకులు సేవింగ్ ఖాతాల్లో కనీస డిపాజిట్ రూ.10,000 పెట్టే షరతు పెట్టి ప్రజలకు భారం పెడుతున్నాయి. ఇలాంటి పరిస్థితుల్లో, ప్రభుత్వ బ్యాంకుల్లో విదేశీ పెట్టుబడులు పెరిగితే, సామాజిక ప్రయోజనాలు నష్టపోవడం వల్ల సామాన్య ప్రజలకు తీవ్ర ప్రభావం పడే అవకాశముందని నిపుణులు హెచ్చరిస్తున్నారు.సవాళ్లు లాటిన్‌ అమెరికా, ఆసియా దేశాల్లో అధిక ఎఫ్‌డిఐని అనుమతించడం వల్ల స్థానిక ఆర్థిక విధానాలపై ప్రభుత్వ నియంత్రణ తగ్గి ఆర్థిక సంక్షోభాలు ఏర్పడిన సంఘటనలు ఉన్నాయని నిపుణులు గుర్తు చేస్తున్నారు. భారత్‌లో ప్రభుత్వ రంగ బ్యాంకులు వ్యవసాయ, గ్రామీణ, ఇతర ప్రాధాన్యత రంగాల రుణాల పంపిణీలో కీలక పాత్ర పోషిస్తున్నాయి. పిఎస్‌బిల్లో ఎఫ్‌డిఐ పెరిగితే, ఈ సామాజిక లక్ష్యాలు నష్టపోవడం ద్వారా దేశవ్యాప్తంగా ప్రజలకు నష్టం కలిగే ప్రమాదం ఉందని హెచ్చరిస్తున్నారు.