చలికాలంలో ఇబ్బంది పెట్టే చుండ్రుని పోగొట్టే చిట్కాలు

చుండ్రు వచ్చిందంటే అంత సులువుగా వదిలిపెట్టదు. మహా చిరాకు పెడుతుంది. దీన్ని పోగొట్టుకునేందుకు రకరకాల షాంపూలు, కండీషనర్లు వాడాల్సి వస్తుంది. ఇక మందులు కూడా వాడేవాళ్లు ఉంటారు. వీటి వల్ల కొంత వరకూ ప్రయోజనం ఉన్నప్పటికీ శాశ్వతంగా చుండ్రు తొలగిపోతుందన్న గ్యారెంటీ లేదు. పైగా వీటిలో ఉండే కొన్ని రకాల కెమికల్స్ కురుల ఆరోగ్యాన్ని దెబ్బ తీస్తాయి. అయితే ఇలాంటి సమస్యలు ఏవీ ఉండకూడదు అంటే సహజమైన పద్ధతిలోనే చుండ్రును వదిలించుకోవాలి. ఇంట్లో దొరికే పదార్థాలతోనే దీనిని పోగొట్టుకోవాలి. ఇలాంటి చిట్కాల గురించే ఇప్పుడు చెప్పుకోబోతున్నాం. చాలా సులువైన చిట్కాలతోనే సమస్యను దూరం చేసుకోవచ్చు. మరి ఆ ఇంటి చిట్కాలు ఏంటి. ఏం చేస్తే చుండ్రు నుంచి విముక్తి కలుగుతుంది అనే వివరాలు తెలుసుకుందాం.

నిమ్మరసంతో

​నిమ్మరసంలో అసిడిక్ గుణాలు అధికంగా ఉంటాయి. పైగా ఇందులో యాంటీ ఫంగల్ గుణాలు కూడా ఎక్కువగానే ఉంటాయి. స్కాల్ప్ పై ఎలాంటి ఇన్ఫెక్షన్ వచ్చినా, ఫంగస్ ఏర్పడినా వాటిని తొలగించడంలో నిమ్మరసం చాలా ఎఫెక్టివ్ గా పని చేస్తుంది. స్కాల్ప్ లో సాధారణంగానే నేచురల్ ఆయిల్స్ ఉత్పత్తి అవుతూ ఉంటాయి. ఎప్పుడైతే ఈ ఆయిల్స్ ఎక్కువవుతాయో అప్పడు చుండ్రు వస్తుంది. నిమ్మరసం ఈ ఆయిల్స్ ని తగ్గిస్తుంది. ఓ గ్లాసు నీటిలో నిమ్మరసం కలపాలి. షాంపూతో తలస్నానం చేసిన తరవాత ఈ నిమ్మరసాన్ని కురులకు అప్లై చేయాలి. ఇలా కనీసం వారానికి రెండు సార్లు చేయడం వల్ల స్కాల్ప్ పై ఉండే ఫంగస్ తొలగిపోవడంతో పాటు జుట్టు కూడా ఆరోగ్యంగా ఉంటుంది. ఇక రెగ్యులర్ గా వాడితే స్కాల్ప్ క్లీన్ గా ఉండడమే కాకుండా దురద తగ్గిపోతుంది. కురులకు సహజంగానే మెరుపు వస్తుంది.

కొబ్బరి నూనె

కొబ్బరి నూనె కూడా చుండ్రును తగ్గించడంలో తోడ్పడుతుంది. కొబ్బరి నూనెలో యాంటీ ఫంగల్ గుణాలు అధికంగా ఉంటాయి. పైగా స్కాల్ప్ లో తేమను పట్టి ఉంచడంలోనూ సహకరిస్తుంది. అయితే కొబ్బరి నూనెను నేరుగా కాకుండా కాస్తంత వేడి చేసి కురులకు అప్లై చేయడం మంచిది. ఇలా చేస్తే కురుల కుదుళ్ల వరకూ నూనె పడుతుంది. ముఖ్యంగా స్కాల్ప్ పొడిబారకుండా ఉంటుంది. అన్నింటి కన్నా కీలకంగా చుండ్రు రాకుండా ఇది అడ్డుకుంటుంది. సాధారణంగా చుండ్రు వచ్చినప్పుడు విపరీతంగా దురద వస్తుంది. లేదా స్కాల్ప్ లో ఏదైనా ఫంగస్ ఏర్పడినా ఇలాగే ఇచింగ్ వస్తుంది. ఈ దురద తగ్గించడంలోనూ కొబ్బరి నూనె ఎంతో ఉపయోగపడుతుంది. కేవలం చుండ్రును పోగొట్టడమే కాకుండా..కురులు ఆరోగ్యంగా పెరగడానికి కూడా ఇది సహకరిస్తుంది. అందుకే వారానికి కనీసం రెండు మూడు సార్లు ఇలా కొబ్బరి నూనె అప్లై చేసుకోవడం మంచిది.

అలోవెరాతో

అలోవెరా జెల్ కూడా చుండ్రుని పోగొట్టడంలో చాలా బాగా పని చేస్తుంది. కలబందలో యాంటీ మైక్రోబయల్ గుణాలు అధికంగా ఉంటాయి. ఇవి స్కాల్ప్ ని శుభ్రపరుస్తాయి. అలోవెరా జెల్ ని నేరుగా కురులకు అప్లై చేయాల్సి ఉంటుంది. ఇలా చేయడం ద్వారా స్కాల్ప్ పై ఇరిటేషన్ తగ్గుతుంది. ముఖ్యంగా ఫంగస్ ఏమైనా ఉంటే అది పూర్తిగా తొలగిపోతుంది. ఈ ఫంగస్ కారణంగానే డాండ్రఫ్ వస్తుంది. ఎప్పుడైతే ఫంగస్ తొలగిపోతుందో అప్పుడు సహజంగానే చుండ్రు తగ్గిపోతుంది. అయితే అలోవెరా జెల్ అప్లై చేసిన తరవాత కనీసం అరగంట పాటు అలాగే ఉంచాలి. ఆ తరవాత తలస్నానం చేయాలి. అలోవెరా జెల్ లో ఉండే కూలింగ్ ఎఫెక్ట్ ఇన్ ఫ్లమేషన్ ని తగ్గిస్తుంది. రెగ్యులర్ గా వాడడం వల్ల చుండ్రు తొలగిపోవడంతో పాటు కురులు సాఫ్ట్ గా మారిపోతాయి. నేచురల్ గానే మెరుపు కూడా వస్తుంది.

బేకింగ్ సోడా స్క్రబ్ 

బేకింగ్ సోడాను ఎన్నో విధాలుగా వాడుతుంటారు. ముఖ్యంగా మరకలు వదిలించడం కోసం వినియోగిస్తారు. అయితే చుండ్రు తొలగించడం కోసం కూడా ఇది బాగానే ఉపయోగపడుతుంది. డెడ్ స్కిన్ సెల్స్ ని తొలగించి స్కాల్ప్ ని శుభ్రంగా ఉంచడంలో తోడ్పడుతుంది. అంతే కాదు. స్కాల్ప్ లో ఫంగస్ ఏర్పడకుండా అడ్డుకుంటుంది. అయితే ఈ చిట్కా పాటించే ముందుగా తలను మామూలు నీళ్లతో ఓ సారి శుభ్రం చేసుకోవాలి. ఆ తరవాత కాస్తంత బేకింగ్ సోడా తీసుకోవాలి. నేరుగా స్కాల్ప్ పై వేసి అప్లై చేయాల్సి ఉంటుంది. ఇలా అప్లై చేసిన తరవాత కాసేపటి వరకూ అలాగే ఉంచాలి. తరవాత శుభ్రం చేసుకోవాలి. చుండ్రు ఎక్కువగా ఉంటే ఈ బేకింగ్ సోడా కారణంగా అదంతా తగ్గిపోతుంది. అంతే కాదు. వారానికి ఓసారి ఇలా చేస్తే చుండ్రు నుంచి శాశ్వతంగా పరిష్కారం లభిస్తుంది.

యాపిల్ సైడర్ వెనిగర్

యాపిల్ సైడర్ వెనిగర్ కూడా చుండ్రును తొలగించడంలో చాలా బాగా ఉపయోగపడుతుంది. ఫంగస్ పూర్తిగా తొలగిపోయేందుకు సహకరిస్తుంది. యాపిల్ సైడర్ వెనిగర్, నీళ్లు సమపాళ్లలో కలిపి కురులకు అప్లై చేయాల్సి ఉంటుంది. ఇందులో ఉండే యాంటీ బ్యాక్టీరియల్ గుణాలు స్కాల్ప్ ని శుభ్రంగా ఉంచుతాయి. అంతే కాదు. నేచురల్ ఆయిల్స్ ఎక్కువగా ఉత్పత్తి కాకుండా చూస్తాయి.

దీంతో పాటు మెంతుల పేస్ట్ కూడా బాగానే పని చేస్తుంది. మెంతుల్లో ప్రొటీన్, నికోటిన్ యాసిడ్ ఎక్కువగా ఉంటాయి. ఇవి స్కాల్ప్ ఆరోగ్యాన్ని కాపాడతాయి. రెండు టేబుల్ స్పూన్ల్ మెంతులను రాత్రంతా నీటిలో నానబెట్టాలి. మరుసటి రోజు ఉదయం వాటిని మిక్సీ పట్టాలి. పేస్ట్ లా తయారైన తరవాత ఈ మిశ్రమాన్ని కురులకు అప్లై చేయాలి. కనీసం అరగంట పాటు అలాగే ఉంచాలి. ఆ తరవాత షాంపూతో తలస్నానం చేయాలి. ఇలా చేయడం వల్ల క్రమంగా చుండ్రు తగ్గిపోతుంది.