చేవెళ్ల ఆర్టీసీ బస్సు ఘటన.. రెస్క్యూ కోసం వెళ్లిన సీఐకి తీవ్ర గాయాలు

రంగారెడ్డి జిల్లా చేవెళ్ల మండలం మీర్జాగూడ వద్ద ఇవాళ ఘోర రోడ్డు ప్రమాదం జరిగిన సంగతి తెలిసిందే. తాండూరు నుంచి హైదరాబాద్ వెళ్తున్న ఆర్టీసీ బస్సును కంకర లోడ్‌తో ఉన్న టిప్పర్ లారీ ఢీకొట్టడంతో 19 మంది మృతి చెందారు. మరికొందరు ఆసుపత్రిలో చికిత్స పొందుతూ ఉండగా.. మృతుల సంఖ్య పెరిగే అవకాశం ఉందని అధికారులు వెల్లడించారు. అయితే ఘటన జరిగిన వెంటనే సకాలంలో పోలీసులు యాక్సిడెంట్ స్పాట్‌కు చేరుకున్నారు. సహాయక చర్యలు ముమ్మరం చేశారు. సహాయక చర్యలు కొనసుగుతున్న క్రమంలో అనుకోని విధంగా ఓ పోలీస్ అధికారి ప్రమాదానికి గురయ్యారు. ప్రయాణికులను కాపాడే ప్రయత్నంలో సీఐ శ్రీధర్‌ తీవ్రంగా గాయపడ్డారు.

టిప్పర్ ఢీకొట్టడంతో బస్సుపై భారీగా కంకర లోడు పడి ప్రయాణికులు అందులో కూరుకుపోయారు. వారిని బయటకు తీయడం అత్యంత కష్టంగా మారడంతో.. పోలీసులు హుటాహుటిన జేసీబీ యంత్రాన్ని రంగంలోకి దించారు. కంకరను తొలగిస్తూ.. మృతదేహాలను వెలికితీసే రెస్క్యూ ఆపరేషన్‌ను సీఐ శ్రీధర్ పర్యవేక్షిస్తున్నారు. ఈ సమయంలో ప్రమాదవశాత్తూ రెస్క్యూ ఆపరేషన్ కోసం ఉపయోగించిన జేసీబీ యంత్రం ఆయన కాళ్లపై నుంచి దూసుకెళ్లింది. ఈ ఊహించని ఘటనలో సీఐ శ్రీధర్‌ కాలికి తీవ్ర గాయాలయ్యాయి. వెంటనే స్పందించిన తోటి పోలీసులు, సహాయక సిబ్బంది ఆయనను చికిత్స నిమిత్తం హుటాహుటిన సమీపంలోని ప్రభుత్వ ఆసుపత్రికి తరలించారు. ప్రస్తుతం ఆయనకు చికిత్స కొనసాగుతోంది.

ఈ బస్సు ప్రమాద ఘటన పలు కుటుంబాల్లో తీవ్ర విషాదాన్ని నింపింది. ఘటనపై సీఎం రేవంత్ రెడ్డి, ప్రధాని మోదీ, ఏపీ సీఎం చంద్రబాబు, తెలంగాణ మంత్రులతో పాటు పలువురు విచారం వ్యక్తం చేశారు. ఈ దురదృష్టకర ఘటన తమను తీవ్రంగా కలిచివేసిందని సోషల్ మీడియా వేదికగా వెళ్లడించారు. జరిగిన ఘటనపై తెలంగాణ ప్రభుత్వం విచారణకు ఆదేశించింది. మృతుల కుటుంబాలకు తెలంగాణ ప్రభుత్వం తరపున రూ. 5 లక్షలు, ఆర్టీసీ తరపున రూ. 2 లక్షలు ఎక్స్ గ్రేషియా ప్రకటించారు. క్షతగాత్రులకు రూ.2 లక్షలు అందిస్తామని మంత్రి పొన్నం వెల్లడించారు. ఇక కేంద్రం కూడా మృతులకు రూ.2 లక్షలకు, క్షతగాత్రులకు రూ.50 వేల చొప్పున పరిహారం ప్రకటించింది. ప్రస్తుతం మృతదేహాలకు చేవెళ్ల ప్రభుత్వ ఆసుపత్రిలో శవపరీక్షలు నిర్వహిస్తున్నారు. పోస్టుమార్టం తర్వాత బాధిత కుటుంబాలకు అప్పగించనున్నారు.