కొత్త స్కీమ్.. రూ.125 పొదుపుతో ఒకేసారి రూ.8 లక్షలు

ప్రభుత్వ రంగ బీమా కంపెనీ లైఫ్ ఇన్సూరెన్స్ కార్పొరేషన్ ఆఫ్ ఇండియా కొత్త పాలసీ లాంచ్ చేసింది. మహిళల కోసం ప్రత్యేకంగా తీసుకొచ్చిన ఈ ప్లాన్ ఇన్సూరెన్స్‌తో పాటు సేవింగ్స్ ప్రయోజనాలు కల్పిస్తోంది. మార్కెట్ ఒడుదొడుకులతో ఎలాంటి సంబంధం లేకుండా నాన్-లింక్డ్, నాన్-పార్టిసిపేటింగ్ ప్లాన్. అయితే కంపెనీ లాభాల్లో భాగస్వామ్యం ఉండదు దీంతో ఎలాంటి బోనస్ చెల్లింపులు ఉండవు. ఇందులో బేస్ ప్లాన్ ద్వారానే ఒకేసారి రూ.8 లక్షలు అందుకునే అవకాశం లభిస్తోంది. మరి అందుకు ఏం చేయాలి? అనేది తెలుసుకుందాం.

ఈ పాలసీ మెచ్యూరిటీ టర్మ్ 25 సంవత్సరాలుగా ఉంటుంది. అయితే ప్రీమియం చెల్లింపు వ్యవధిని పాలసీదారులు ఎంచుకోవచ్చు. 7 సంవత్సరాల నుంచి 15 ఏళ్ల వరకు ప్రీమియం టర్మ్ ఎంచుకోవచ్చు. అలాగే ఈ పాలసీ కొనుగోలు చేసేందుకు కనీస వయసు 18 సంవత్సరాల నుంచి 50 ఏళ్ల వరకు ఉన్న మహిళలు అర్హులు. ఈ ప్లాన్ కనీస బీమా హామీ మొత్తం రూ. 2 లక్షలుగా నిర్ణయించారు. గరిష్ఠ పరిమితి ఏదీ లేదు. తమ స్థోమతకు తగినట్లుగా ప్రీమియం చెల్లించి బెనిఫిట్స్ పొందవచ్చు.

ఈ పాలసీలో గ్యారెంటీడ్ అడిషన్ ఉంటుంది. పాలసీదారు చెల్లించిన ప్రీమియంపై 7 శాతం చొప్పున జమ చేస్తారు. దీనిని పాలసీ పూర్తి వ్యవధిలో లెక్కిస్తారు. పాలసీ మెచ్యూరిటీ అయిన తర్వాత బీమా హామీ మొత్తం, గ్యారెంటీడ్ అడిషన్ కలిపి చెల్లిస్తారు. పాలసీ తీసుకున్న మహిళ దురదృష్టవశాత్తూ మరణిస్తే నామినీకి వార్షిక ప్రీమియానికి 10 రెట్లు లేదా ఇన్సూరెన్స్ సమ్ అష్యూర్డ్ మొత్తంలో ఏది ఎక్కువైతే అది చెల్లిస్తారు.

అలాగే ఈ పాలసీలో అవసరాలకు అనుగుణంగా సమ్ అష్యూర్డ్‌ను విడతల వారీగా తీసుకునేందుకు మూడు ఆప్షన్లు ఇచ్చారు. పాలసీ కొనుగోలు సమయంలోనే ఆప్షన్ ఎంచుకోవాలి. ఆప్షన్ ఏ ప్రకారం పాలసీ ప్రీమియం చెల్లింపు టెన్యూర్ పూర్తై తర్వాత హామీ మొత్తంలో 50 శాతం తీసుకోవచ్చు. ఆప్షన్ బీ ప్రకారం ప్రతి 2 ఏళ్లకు ఒకసారి సమ్ అష్యూర్డ్ మొత్తంలో 7.5 శాతం చొప్పున 12 సార్లు తీసుకోవచ్చు. ఆప్షన్ సీలో ప్రతి నాలుగేళ్లకు ఒకసారి హామీ మొత్తంలో 15 శాతం వెనక్కి తీసుకోవచ్చు. ఇలా 6 సార్లు వెనక్కి ఇస్తారు.

ప్రీమియం చెల్లింపు నెల, మూడు నెలలు, ఆరు నెలలు, ఏడాదికోసారి చెల్లించే ఆప్షన్ ఎంచుకోవచ్చు. జీతం పొందే మహిళలు, స్వయం ఉపాధి పొందుతోన్న మహిళలు తమ ఆదాయానికి అనుగుణంగా ప్రీమియం టర్మ్ ఎంచుకోవచ్చు. ఈ పాలసీపై అదనపు రక్షణ పొందేందుకు వివిధ రకాల రైడర్లు జోడించుకోవచ్చు. యాక్సిడెంటల్ డెత్, డిజెబిలిటీ రైడర్, న్యూ టర్మ్ అష్యూరెన్స్ రైడర్ ఉంటాయి. మహిళల కోసం క్రిటికల్ ఇల్‌నెస్ రైడర్ సైతం పొందొచ్చు.

రూ.8 లక్షలు ఎలా?

35 ఏళ్ల వయసు ఉన్న మహిళ ఈ పాలసీ తీసుకున్నారు అనుకుందాం. పాలసీ ప్రీమియం చెల్లింపు టర్మ్ 10 ఏళ్లుగా బేస్ ప్లాన్ తీసుకుంటే ప్రీమియం రోజుకు రూ.125 మేర పడుతుంది. అంటే చెల్లించిన ప్రీమియం మొత్తం రూ.4.49 లక్షల వరకు అవుతుంది. ఆప్షన్ బి ఎంచుకున్నట్లయితే గ్యారంటీడ్ అడిషన్ రూ.6.44 లక్షల వరకు జమ అవుతాయి. ప్రతి రెండేళ్లకోసారి రూ.15 వేలు వెనక్కి ఇస్తారు. ఇలా 12 సార్లు తీసుకోవచ్చు. మొత్తం రూ.1,80,000 వస్తాయి. ఇక మెచ్యూరిటీ బెనిఫిట్, గ్యారంటీడ్ అడిషన్ కలిపి రూ. 8.44 వస్తాయి.