రహస్యంగా స్కూల్ నడుపుతోన్న మార్క్ జుకర్‌బర్గ్,,,,నెలల పాటు ఆందోళనలు కొనసాగడంతో చర్యలు

ఫేస్‌బుక్ మాతృ సంస్థ మెటా వ్యవస్థాకులు మార్క్‌ జుకర్‌బర్గ్‌ వివాదంలో ఇరుకున్నారు. నాలుగేళ్లు తన నివాసంలో ఎలాంటి అనుమతుల్లేకుండా రహస్యంగా స్కూల్‌ నడిపినట్టు ఆరోపణలు వెల్లువెత్తాయి. దీనిపై దుమారం రేగడంతో ఆ స్కూల్‌ను అధికారులు మూసివేయించాయని పేర్కొంటూ ఈ మేరకు అంతర్జాతీయ మీడియా కథనాలు వెలువరించాయి. కాలిఫోర్నియా రాష్ట్రం పాలో ఆల్టో సిటీలోని తన నివాస ప్రాంగణంలో జుకర్‌బర్గ్‌ 2021లో ఈ స్కూల్‌ను ప్రారంభించినట్లు నివేదికలు పేర్కొన్నాయి. ‘బికెన్‌ బెన్‌ స్కూల్‌’ పేరుతో మాంటిస్సోరీ విధానంలో 30 నుంచి 40 విద్యార్థులకు అందులో బోధించేవారట.

అక్కడ పాఠశాల నిర్వహిస్తున్న విషయం ముందు ఎవరికీ తెలియదు. కానీ, ప్రతిరోజు ఉదయాన్నే ఆ వీధిలోకి వరుసగా కార్లు వచ్చి జుకర్‌బర్ట్ నివాసం వద్ద పిల్లలను దింపి వెళ్లడం చూసి స్థానికులు మొదట ఆశ్చర్యానికి గురయ్యారు. కానీ, చివరకు ఆ ఇంట్లో పూర్తి స్థాయిలో పాఠశాలను నిర్వహిస్తున్న విషయాన్ని వారు గ్రహించారు. ఎటువంటి అనుమతులు తీసుకొకుండా స్కూల్ నడుపుతున్న విషయాన్ని ఏడాది తర్వాత 2022 అధికారుల దృష్టికి తీసుకెళ్లారు. కానీ, అధికారులు ఎటువంటి చర్యలు తీసుకోకపోవడంతో నిరసనలకు దిగారు.

నిబంధనలకు విరుద్ధంగా జుకర్‌బర్గ్‌ స్కూల్‌ను నడుపుతున్నా.. అధికారులు స్పందించడంలేదని ఆందోళన వ్యక్తం చేశారు. మొత్తానికి 2024లో అధికారికంగా ఫిర్యాదు అందడంతో అధికారులు చర్యలు తీసుకోక తప్పలేదు. పాఠశాలను మూసివేయాలని లేదంటే చట్టపరంగా చర్యలు తీసుకోవాల్సి ఉంటుందని హెచ్చరిస్తూ ఈ మార్చిలో జుకర్‌బర్గ్‌కు స్థానిక అధికారులు నోటీసులు జారీ చేశారు. దీంతో ఆగస్టులో స్కూల్‌ను జుకర్‌బర్గ్ అధికారికంగా మూసివేసినట్లు రికార్డుల్లో పేర్కొన్నారు. కానీ, స్కూల్‌ను పూర్తిగా మూసివేయలేదని, దానిని ఇంకో చోటుకు మార్చారని మెటా సంస్థ అధికారిక ప్రతినిధి బ్రియాన్‌ బేకర్‌ వెల్లడించినట్టు మీడియా నివేదించింది. కఅయితే, స్కూల్‌ను ఎక్కడకు తరలించారనే విషయాన్ని మాత్రం వాళ్లు చెప్పలేదట.

కాగా.. సిలికాన్‌ వ్యాలీలోని స్థానికులు జుకర్‌బర్గ్‌పై ఆరోపణలు చేయడం ఇదేం మొదటిసారి కాదు. ఆయన ఎస్టేట్‌లో నిరంతరాయంగా నిర్మాణాలు కొనసాగుతుంటాయని, ఆ శబ్దాలతో తాము ఇబ్బందులు పడుతున్నామని పదేళ్లుగా ఆరోపణలు చేస్తున్నారు. ఈ ప్రాంతంలో 11 ప్రాపర్టీలను కొనుగోలు చేసిన జుకర్‌బర్గ్.. వాటన్నింటినీ కలిసి భారీ ఎస్టేట్‌గా మార్చేశారు.