ఏపీలోని ఆ ఉద్యోగులకు సూపర్ న్యూస్.. ఫోటో కొట్టు, ప్రైజ్ పట్టు

ఏపీ ట్రాన్స్‌కో తమ ఉద్యోగులకు మంచి ఆఫర్ ఇచ్చింది. ఉద్యోగులకు ఫోటోగ్రఫీ పోటీలు నిర్వహిస్తోంది ఏపీ ట్రాన్స్‌కో . ఈ పోటీలో గెలిచిన వారికి నగదు బహుమతి కూడా ఇవ్వనున్నారు. ట్రాన్స్‌కో కార్యకలాపాలను హైలెట్ చేయడానికి ఈ పోటీలు నిర్వహించాలని ఏపీ ట్రాన్స్‌కో నిర్ణయించింది. ఉద్యోగులలో సృజనాత్మకతను వెలికితీయడమే కాకుండా వారి భాగస్వామ్యాన్ని ప్రోత్సహించడం, రాష్ట్రంలో నిరంతరాయంగా విద్యుత్ అందించేందుకు సిబ్బంది చేసే కృషిని గుర్తించడమే ఈ పోటీ ప్రధాన ఉద్దేశమని AP ట్రాన్స్‌కో జాయింట్ మేనేజింగ్ డైరెక్టర్ సూర్య సాయి ప్రవీణ్ చంద్ వివరించారు.ఈ పోటీలో పాల్గొనేందుకు ఉద్యోగులతో పాటుగా.. సాధారణ ప్రజలకు కూడా అవకాశం కల్పించారు. ప్రజలకు సేవలు అందించడంలో ట్రాన్స్‌కో ఇంజనీర్లు, సాంకేతిక నిపుణులు, సిబ్బంది అంకితభావం, ఇన్నోవేషన్, సామర్థ్యం ప్రతిబింబించేలా ఫోటోలు తీసి పంపాలని ఏపీ ట్రాన్స్‌కో సూచించింది.

మరోవైపు ఈ పోటీలో పాల్గొనేవారు తమ ఫోటోలను photocontest@aptransco.gov.in కు పంపాలని ఏపీ ట్రాన్స్‌కో కోరింది. అలాగే భవిష్యత్తులో AP ట్రాన్స్‌కో తమ ఫోటోలు ఉపయోగించుకునేందుకుతమకు ఎటువంటి అభ్యంతరం లేదని పేర్కొంటూ ఒక అంగీకార పత్రం కూడా పంపాలని కోరింది. విద్యుత్ మౌలిక సదుపాయాలు, సవాలుతో కూడిన పరిస్థితుల్లో పనిచేసే సిబ్బంది, 400 కెవి సబ్‌స్టేషన్లు, 220 కెవి సబ్‌స్టేషన్లు, 132 కెవి సబ్‌స్టేషన్లు, హాట్ లైన్లు వంటి ఇతివృత్తాలపై స్వయంగా తీసిన ఒరిజినల్ ఫోటోలను పంపించాలని ఏపీ ట్రాన్స్‌కో జాయింట్ మేనేజింగ్ డైరెక్టర్ సూచించారు. డ్రోన్ షాట్‌లకు కూడా అనుమతి ఉందన్నారు. ఈ పోటీలో గెలుపొందిన వారికి మొదటి బహుమతికి రూ. 10,000, రెండవ బహుమతిగా రూ. 5,000, మూడవ బహుమతి కింద రూ. 3,000 నగదు బహుమతి లభిస్తుంది. అలాగే పాల్గొనే వారందరికీ కూడా పార్టిసిపేషన్ సర్టిఫికేట్లు అందిస్తామని అధికారులు తెలిపారు.

మరోవైపు ఫోటోలు హై-రిజల్యూషన్ డిజిటల్ ఫార్మాట్ (JPEG/PNG)లో ఉండాలని అధికారులు సూచించారు. అలాగే 300 DPI రిజల్యూషన్, 16:9 రేషియోతో ఉండాలని సూచించారు. పాల్గొనేవారు డిక్లరేషన్‌తో పాటు గరిష్టంగా రెండు ఛాయాచిత్రాలను సమర్పించవచ్చు. నవంబర్ 15 లోపు ఎంట్రీలను photocontest@aptransco.gov.in కు పంపాలి, పాల్గొనేవారి చిరునామా, ఫోన్ నంబర్, ఈమెయిల్ IDతో పాటు పంపాలి. నవంబర్ 15 తర్వాత వచ్చిన వాటిని పరగణనలోకి తీసుకోమని అధికారులు తెలిపారు. ప్రత్యేక కమిటీ ఈ ఫోటోలను పరిశీలించి విజేతలను ఎంపిక చేస్తుంది. ఈ వివరాలను AP ట్రాన్స్‌కో వెబ్‌సైట్‌లో ప్రదర్శిస్తారు.