అత్యాచార ఆరోపణలు.. ఆస్ట్రేలియాకు పారిపోయిన ఆప్ ఎమ్మెల్యే

అత్యాచార ఆరోపణలు ఎదుర్కొంటున్న పంజాబ్ ఆమ్ ఆద్మీ పార్టీ ఎమ్మెల్యే హర్మీత్ సింగ్ పఠాన్‌ మాజ్రా దేశం విడిచి ఆస్ట్రేలియాకు పారిపోయినట్లు తెలుస్తోంది. సెప్టెంబర్ 2వ తేదీ నుంచి అజ్ఞాతంలో ఉన్న పఠాన్‌ మాజ్రా.. తాజాగా ఆస్ట్రేలియాకు చెందిన ఒక పంజాబీ వెబ్ ఛానల్‌కు వీడియో ఇంటర్వ్యూ ఇవ్వడంతో ఈ విషయం వెలుగులోకి వచ్చింది. బెయిల్ వచ్చిన తర్వాతే తాను ఇంటికి తిరిగి వస్తానని ఎమ్మెల్యే ఇంటర్వ్యూలో స్పష్టం చేశారు. ఈ పరిణామం పంజాబ్ పోలీసులకు తీవ్ర ఇబ్బందికరంగా మారింది. వివిధ ప్రాంతాల్లో గాలించినప్పటికీ దొరకని ఎమ్మెల్యే దేశం విడిచి పారిపోవడంతో.. పాటియాలా పోలీసులు ఆయనపై లుక్-ఔట్ నోటీస్‌ను జారీ చేశారు.

తనపై వచ్చిన ఆరోపణలు అన్నింటినీ ఖండించిన పఠాన్‌మాజ్రా.. తనపై దాఖలైన ఈ కేసు కేవలం రాజకీయ కుట్ర అని పేర్కొన్నారు. పంజాబ్ ప్రజల కోసం మాట్లాడే గొంతుకలను అణచివేయడమే ఈ కుట్ర వెనుక లక్ష్యమని ఆయన ఆరోపించారు. పంజాబ్‌లో కీలక అంశాలపై మంత్రులు, ఎమ్మెల్యేలకు కనీస సంప్రదింపులు జరగడం లేదని ఆయన తెలిపారు. భావ ప్రకటనా స్వేచ్ఛను అడ్డుకుంటున్నారని కూడా పేర్కొన్నారు. ఢిల్లీలో ఓడిపోయిన నాయకులే పంజాబ్‌ను హస్తగతం చేసుకొని.. ఢిల్లీలాగే ఇక్కడి వ్యవస్థను నాశనం చేస్తున్నారని తీవ్ర ఆరోపణలు చేశారు. అయితే తనకు న్యాయ వ్యవస్థపై పూర్తి విశ్వాసం ఉందని ఆయన పునరుద్ఘాటించారు.

ఈ కేసులో హాజరు కాకపోవడంతో పఠాన్‌ మాజ్రాపై పాటియాలా కోర్టు ఇప్పటికే పరారీలో ఉన్న నేరస్థుడి ప్రక్రియలను ప్రారంభించింది. అంతకుముందు పంజాబ్ పోలీసులు ఆయనను అరెస్ట్ చేయడానికి హర్యానాలోని కర్నాల్ జిల్లాలోని దబ్రీ గ్రామంలోని బంధువుల ఇంటికి వెళ్లినప్పుడు.. ఆయన పోలీసు కస్టడీ నుంచి తప్పించుకున్నారు. ఆ సమయంలో ఎమ్మెల్యే మద్దతుదారులు కాల్పులు జరిపారని, రాళ్లు రువ్వారని పోలీసులు ఆరోపించారు. అయితే ఆ కాల్పుల్లో తన ప్రమేయం లేదని.. బూటకపు ఎన్‌కౌంటర్‌లో తనను చంపేస్తారనే భయంతోనే తాను పారిపోయానని పఠాన్‌ మాజ్రా గతంలో పేర్కొన్నారు.

జిరాక్‌పూర్‌కు చెందిన ఒక మహిళ ఫిర్యాదు మేరకు సెప్టెంబర్ 1వ తేదీన ఎమ్మెల్యేపై రేప్, మోసం, నేరపూరిత బెదిరింపుల కింద కేసు నమోదు అయింది. తాను విడాకులు తీసుకున్నానని చెప్పి తనతో సంబంధం పెట్టుకున్నాడని, అయితే 2021లో తనను పెళ్లి చేసుకునే నాటికి ఆయనకు అప్పటికే వివాహమై ఉందని ఆ మహిళ ఆరోపించింది. లైంగిక దోపిడీకి, బెదిరింపులకు పాల్పడటమే కాక, అశ్లీల మెటీరియల్‌ను కూడా పంపాడని ఆమె ఫిర్యాదులో పేర్కొంది.