లాటరీలో పావు కిలో బంగారం గెలిచిన భారతీయుడు

ఏడేళ్లుగా లాటరీ టిక్కెట్లు కొంటున్నా అతడికి అదృష్టం కలిసిరాలేదు. ఒకసారి ఒక్క సంఖ్య తేడాతో దాదాపు రూ.36 కోట్ల జాక్‌పాట్ మిస్సయ్యింది. కానీ, తన కుమార్తె రూపంలో అతడికి లక్ కలిసొచ్చింది. ఆమె పేరుతో కొనుగోలుచేసిన లాటరీ టిక్కెట్‌కు పావు కిలో బంగారం గెలుచుకున్నాడు. దుబాయ్‌ బిగ్ టికెట్‌ లాటరీ భారతీయుడు 250 గ్రాముల 24 క్యారెట్ల బంగారం గెలిచాడు. వివరాల్లోకి వెళ్తే.. కర్ణాటక రాజధాని బెంగళూరుకు చెందిన మంజునాథ్ హరోహళ్లి 20 ఏళ్ల కిందట కుటుంబంతో సహా దుబాయ్ వెళ్లాడు. అక్కడ ఓ సంస్థలో స్టోర్‌ మేనేజర్‌గా పని చేస్తున్న మంజునాథ్‌.. భార్యా, ఇద్దరు పిల్లలతో ఉంటున్నాడు.

అయితే, స్నేహితుల సలహాతో గత ఏడేళ్ల నుంచి దుబాయ్ ప్రభుత్వం నిర్వహించే బిగ్‌ టికెట్‌ ఎంట్రీలను కొనుగోలు చేస్తూనే ఉన్నాడు. కానీ, ఒక్కసారిగా కూడా అదృష్టం వరించలేదు. ఎంత దుదృష్టమంటే ఒక సంఖ్య తేడాతో 15 మిలియన్‌ దిర్హామ్‌లు జాక్‌పాట్‌ మిస్సయింది. కానీ, మంజునాథ్ నిరాశకు గురికాలేదు. పట్టువదలని విక్రమార్కుడిలా ప్రయత్నిస్తూనే ఉన్నాడు. ఈ క్రమంలోనే ఇటీవల తన కుమార్తె పేరున ఓ టికెట్‌ను కొనుగోలు చేయడంతో అతడికి అదృష్టం కలిసొచ్చింది. ఆ టిక్కెట్‌కు పావుకిలో (250 గ్రాములు) 24 క్యారెట్ల బంగారం బహుమతి వచ్చింది. ఇటీవల తెలంగాణకు చెందిన ఓ రైతు రూ.240 కోట్లు లాటరీలో గెలుచుకున్న సంగతి తెలిసిందే.

దీని గురించి మంజునాథ్‌ మాట్లాడుతూ.. ‘ఇది కలా? నిజమా? అనేది నమ్మలేకపోయాను.. టిక్కెట్ నెంబరు తొలుత చూసినప్పుడు నమ్మలేదు.. ఒకటికి రెండుసార్లు చూసిన తర్వాత నిర్దారించుకున్నాను.. మా కుటుంబం చాలా సంతోషంగా ఉంది. నా కుమార్తె కోసం గిఫ్ట్ తీసుకుంటాను. ఆమె నా అదృష్టం’ అని ఆనందం వ్యక్తం చేశారు. అయితే, తన అదృష్టాన్ని పరీక్షించుకోవడం ఇంతటితో ఆగదని, మరిన్ని బిగ్‌ టికెట్‌ డ్రాల్లో పాల్గొంటానని ఆయన వెల్లడించారు. అయితే, దుబాయ్ లాటరీలో పలువురు భారతీయులు విజేతలుగా నిలిచి కోట్లు గెలుచుకున్న సందర్భాలు అనేకం ఉన్నాయి.

కాగా, ఈ నెలలోనే కేరళకు చెందిన నితిన్ కున్నత్ రాజ్ అనే యువకుడు బిగ్ టికెట్ వీక్లీ ఈ-డ్రాలో 250 గ్రాములు బంగారం గెలుచుకున్నాడు. భారత్‌లో ధరల ప్రకారం దీని విలువ దాదాపు రూ. 30 లక్షల వరకు ఉంటుంది. ఉపాధి కోసం 2016లో దుబాయ్‌కు వెళ్లిన కున్నత్ రాజ్.. తన స్నేహితులతో కలిసి టికెట్‌ కొనుగోలు చేశాడు. వీక్లీ డ్రాలో తన టిక్కెట్‌కు లాటరీ వరించిన విషయం తెలుసుకోవడానికి రాజ్‌కు కొంత సమయం పట్టింది.