ఉల్లిపాయ దీపంతో ఇంట్లోకి వచ్చే దోమల్ని తరిమికొట్టొచ్చు

చలికాలం ప్రారంభమైంది. శీతాకాలం ప్రారంభం కావడంతో ఇంట్లో దోమల బెడద ఎక్కువైంది. సాయంత్రం కాగానే తలుపులు, కిటికీల ద్వారా ఇంట్లోకి వచ్చి దాడి చేస్తాయి. అందుకే సాయంత్రం కాగానే తలుపులు, కిటికీలు మూసివేయాలి. అయినా చిన్న చిన్న రంధ్రాల ద్వారా దోమలు ఇంట్లోకి ప్రవేశిస్తాయి.

దోమ కాటు ఆరోగ్యానికి హాని కలిగిస్తుంది. దోమ కాటు వల్ల డెంగ్యూ, మలేరియా వచ్చే ప్రమాదం పెరుగతుంది. ముఖ్యంగా పిల్లల్ని దోమల నుంచి రక్షించాలి. చాలా మంది దోమల్ని తరిమికొట్టడానికి మార్కెట్లో దొరికే ప్రొడక్ట్స్ వాడుతుంటారు. అయితే, వీటిలో ఆరోగ్యానికి హాని చేసే రసాయనాలు ఉన్నాయి.

వాటిని కాల్చినప్పుడు వచ్చే పొగ ఆరోగ్యానికి హాని చేయొచ్చు. అందుకే సహజ నివారణలు ఎంతో ముఖ్యం. ఇంట్లో దొరికే వస్తువులతో సహజంగా దోమల్ని తరిమికొట్టొచ్చు. ఇక, వంటల్లో వాడే ఉల్లిపాయతో దోమల్ని తరిమికొట్టొచ్చని కంటెంట్ క్రియేటర్ కవితా గార్గ్ తెలిపారు. ఉల్లిపాయ దీపంతో దోమల బెడద తగ్గుతుంది. ఆ రెమెడీ ఏంటో ఇప్పుడు తెలుసుకుందాం.

ఉల్లిపాయ దీపానికి కావాల్సిన పదార్థాలు

1. మీడియం సైజు ఉల్లిపాయ ఒకటి

2. కర్పూరం బిళ్లలు - ఒకటి లేదా రెండు

3. ఆవాల నూనె - రెండు టీ స్పూన్లు

4. లవంగాలు - మూడు

5. వత్తి - ఒకటి

ఉల్లిపాయ దీపం ఎలా తయారు చేయాలి?

ముందుగా ఉల్లిపాయ పై భాగాన్ని కత్తిరించండి. కత్తిని ఉపయోగించటి ఉల్లిపాయ లోపల ఒక రంధ్రం చేయండి. ఆ తర్వాత ఆవాల నూనె వేసి వత్తి ఉంచండి. ఆ తర్వాత కర్పూరం బిళ్లలు, లవంగాలు యాడ్ చేయండి. ఆ తర్వాత వత్తిని వెలిగించండి. ఇంకేముంది.. దోమల్ని తరిమికొట్టే ఉల్లిపాయ దీపం సిద్ధమైనట్టే. దీనిని ఇంట్లో, బెడ్ రూమ్, వంటగదిలో ఎక్కడైనా ఉంచవచ్చు.

ఉల్లిపాయ దీపం చిట్కా

ఈ ట్రిక్ ఎలా పనిచేస్తుంది?

ఈ దీపం ఎఫెక్ట్‌తో దోమలు నేలపై పడటం చూస్తారని కవితా గార్గ్ చెబుతున్నారు. కర్పూరం, లవంగాలు, ఉల్లిపాయల ఘాటైన వాసన భరించలేంది. ఈ ఘాటైన వాసన దోమలకు పడదు. దీంతో ఇవి ఇంటి నుంచి పారిపోతాయి. ఒక్కసారి ఉల్లిపాయ దీపాన్ని తయారు చేయడానికి ప్రయత్నించండి. హానికరమైన రసాయన ప్రొడక్ట్స్ వాడే బదులు.. ఇది మంచి పద్ధతి అని కవితా గార్గ్ చెబుతున్నారు.

ఈ చిట్కాలు కూడా ట్రై చేయండి

నిమ్మకాయ, లవంగాలు

ఈ చిట్కా ఇంట్లోకి వచ్చే దోమల్ని తరిమికొట్టొచ్చు. ఇందుకోసం ముందుగా నిమ్మకాయ తీసుకుని సగానికి కట్ చేయండి. ఆ తర్వాత లవంగాల్ని తీసుకుని సగానికి కట్ చేసిన నిమ్మకాయపై ఉంచండి. ప్రతి భాగంంలో ఒక లవంగాన్ని ఉంచండి. ఈ నిమ్మకాయలను వంటగదిలోని వివిధ మూలల్లో ఉంచండి. లవంగాల ఘాటైన వాసన దోమలను తరిమేస్తుంది.

అల్లం, వెల్లుల్లి స్ప్రే

అల్లం, వెల్లుల్లిని బాగా రుబ్బి, కొద్దిగా నీరు కలిపి పేస్టులా చేయండి. ఈ పేస్ట్‌ను స్ప్రే బాటిల్‌లో పోసి నీరు కలపండి. ఈ మిశ్రమాన్ని దోమల బెడద ఉన్న ప్రదేశాల్లో పిచికారీ చేయండి. దీని సువాసన దోమల్ని తరిమేస్తుంది. అల్లం, వెల్లుల్లి మన ఇంట్లోనే సులభంగా దొరుకుతాయి.