చలికాలంలో పిల్లలకు చెవి నొప్పి ఎందుకు వస్తుందో తెలుసా

చలికాలం ప్రారంభమైంది. చలికాలం అనేక ఆరోగ్య సమస్యల్ని తీసుకువస్తుంది. వయసుతో సంబంధం లేకుండా శీతాకాలంలో ప్రతి ఒక్కరూ ఏదో ఒక రకమైన అనారోగ్యానికి గురయ్యే ప్రమాదం ఉంది. అయితే వృద్ధులు, పిల్లలు చలికాలంలో అనారోగ్యం బారిన పడే ప్రమాదం ఎక్కువగా ఉంటుంది. ముఖ్యంగా చలికాలంలో పిల్లల్ని రక్షించడం చాలా ముఖ్యం. వాళ్ల రోగనిరోధక శక్తి తక్కువ ఉంటుంది.

దీంతో.. వాళ్లు వివిధ రకాల ఇన్ఫెక్షన్లకు గురయ్యే అవకాశం ఎక్కువగా ఉంటుంది. ముఖ్యంగా పిల్లలకు జలుబు వస్తుంది. జలుబు వచ్చినప్పుడు.. పిల్లలకు చెవి నొప్పి వస్తుంది. దీంతో, తల్లిదండ్రులు భయపడి రకరకాల ఇంటి చిట్కాలు ట్రై చేస్తారు.

కొందరు నొప్పిని తగ్గించడానికి తమ పిల్లల చెవుల్లో నూనె, నెయ్యి వంటి పదార్థాల్ని వేస్తారు. అయితే, ఇలా చేయడం పిల్లలకు హానికరం. చలికాలంలో పిల్లలకు చెవి నొప్పి ఎందుకు వస్తుంది, ఈ నొప్పిని తగ్గించడానికి ఏం చేయాలో డాక్టర్ సయ్యద్ హుస్సేన్ చెప్పారు. ఆ పూర్తి వివరాలు ఇప్పుడు తెలుసుకుందాం.

చెవి నొప్పి

ప్రతి చెవినొప్పి ఇన్ఫెక్షన్ వల్ల రాదని డాక్టర్ సయ్యద్ వివరిస్తున్నారు. ముఖ్యంగా జలుబు సమయంలో ఒత్తిలో మార్పు పిల్లల చెవిలో తేలికపాటి నొప్పిని కలిగిస్తుందని ఆయన చెప్పారు. చెవి లోపల యుస్టాచియన్ ట్యూబ్ అనే సన్నని గొట్టం ఉంటుంది.

ఇది చెవి, ముక్కు వెనుక భాగాన్ని కలుపుతుంది. పిల్లలకు జలుబు వచ్చినప్పుడు ఈ గొట్టం ఉబ్బుతుంది. దీంతో అది సరిగ్గా ఓపెన్ అవ్వదు. అంతేకాకుండా క్లోజ్ అవ్వదు. ఇది చెవి లోపల, బయట ఒత్తిడిలో వ్యత్యాసాన్ని సృష్టిస్తుంది. ఈ ఒత్తిడి చెవిపోటును విస్తరించి నొప్పిని కలిగిస్తుంది.

చెవి ఇన్ఫెక్షన్‌తో సంబంధం లేదు

వైద్యులు చెప్పేదాని ప్రకారం 60–70% మంది పిల్లలు జలుబు సమయంలో ఈ నొప్పిని అనుభవిస్తారు. కానీ ఇది ఎల్లప్పుడూ చీము, ఉత్సర్గ లేదా ఇన్ఫెక్షన్‌తో సంబంధం కలిగి ఉండదని డాక్టర్ సయ్యద్ హుస్సేన్ చెబుతున్నారు. ఇది కేవలం ఒత్తిడికి సంబంధించిన ఓటల్జియా లేదా ఒత్తిడి వల్ల కలిగే చెవి నొప్పి అని తెలిపారు. జలుబు తగ్గినప్పుడు నొప్పి దానంతట అదే తగ్గిపోతుంది.

తల్లిదండ్రులు ఏం చేయాలి?

పిల్లలకు చెవి నొప్పి ఉంటే వైద్యుడిని సంప్రదించిన తర్వాత పారాసెటమాల్ వంటి సాధారణ నొప్పి నివారిణిని ఇవ్వొచ్చు.

అంతేకాకుండా పిల్లలు ఆవిరి పీల్చేలా చేయండి. ఇది ముక్కును తెరిచి ఒత్తిడిని సమతుల్యం చేయడానికి సాయపడుతుంది.

ముక్కు, చెవి గొట్టాలపై తక్కువ ఒత్తిడి ఉండేలా పిల్లల్ని నిటారుగా నిద్రపోయేలా చేయండి.

చెవి చుట్టూ తేలికపాటి వెచ్చని కంప్రెస్ చేయడం వల్ల నొప్పి నుంచి ఉపశమనం లభిస్తుంది.

డాక్టర్‌ని ఎప్పుడు సంప్రదించాలి?

​నొప్పి తీవ్రంగా ఉండి.. పిల్లలు నిరంతరం ఏడుస్తుంటే వైద్యుణ్ని సంప్రదించడం మంచిది.

పిల్లలకు నొప్పితో పాటు జ్వరం వస్తే డాక్టర్ సలహా తీసుకోవడం ముఖ్యం

చెవి నుంచి నీరు, చీము, రక్తం రావడం

పిల్లలకు నొప్పితో పాటు వినికిడి లోపం ఉంటే వైద్యుణ్ని సంప్రదించండి.

ఒకటి, రెండు రోజులైనా నొప్పి తగ్గకపోతే అలర్ట్ అవ్వండి.

తల్లిదండ్రులు చేయకూడని తప్పులు

పిల్లలకు చెవి నొప్పి ఉంటే తల్లిదండ్రులు టెన్షన్ పెడతారు. ఈ భయంలో ఇంటి చిట్కాల్ని ఫాలో అవుతుంటారు. ముఖ్యంగా నూనె, నెయ్యి వంటివి వేస్తుంటారు. లేదంటే.. మార్కెట్లో ఈయర్ డ్రాప్స్ కొని.. వేస్తుంటారు. అయితే, వైద్యుణ్ని సంప్రదించకుండా ఈయర్ డ్రాప్స్ వేయడం మంచిది కాదు. తప్పుడు చుక్కల్ని ఉపయోగించడం హానికరం. పిల్లలకు చెవి నొప్పి ఎక్కువగా ఉంటే.. వెంటనే వైద్యుణ్ని సంప్రదించడం మంచిది.