ఒంగోలులో స్పా ముసుగులో వ్యభిచారం,,,కేసు నమోదు

ఒంగోలులో కొత్త యవ్వారం బయటపడింది. స్పా సెంటర్ ముసుగులో వ్యభిచారం నిర్వహిస్తున్న వైనం వెలుగుచూసింది. ఒంగోలులోని బాలాజీరావుపేట పోలేరమ్మ గుడి వద్ద ఒక డాబా ఉంది. అయితే ఈ డాబాపైన స్పా సెంటర్ పేరుతో వ్యభిచారం జరుగుతోందని పోలీసులకు సమాచారం వచ్చింది. దీంతో ఒంగోలు పోలీసులు దాడి చేశారు. పోలీసుల తనిఖీలో అక్కడ వ్యభిచారం జరుగుతున్నట్లు తెలిసింది. ఆకస్మిక తనిఖీ చేసిన సమయంలో ఒక విటుడు, ఇద్దరు మహిళలు అక్కడ ఉన్నారు. వీరిని ఒంగోలు పోలీసులు అదుపులోకి తీసుకున్నారు. అలాగే స్పా సెంటర్ నిర్వాహకులను కూడా అదుపులోకి తీసుకున్నారు. వీరిపై కేసు నమోదు చేసి.. రిమాండ్‌కు తరలించనున్నట్లు ఒంగోలు సీఐ నాగరాజు తెలిపారు. ఎక్కడైనా వ్యభిచార గృహాల నిర్వహణ, గంజాయి విక్రయాలు జరుగుతున్నట్లు గమనిస్తే వెంటనే పోలీసులకు సమాచారం ఇవ్వాలని ఒంగోలు పోలీసులు కోరారు.

దొంగను వెంటాడి కానిస్టేబుల్‌కు తీవ్రగాయాలు..

మరోవైపు ఓ దొంగను వెంటాడుతూ కానిస్టేబుల్ తీవ్రంగా గాయపడిన ఘటన గిద్దలూరులో జరిగింది. పోలీసులు చెప్పిన వివరాల ప్రకారం.. అన్నమయ్య జిల్లా మదనపల్లెలో ఓ కారు చోరీకి గురైంది. ఓ గుర్తు తెలియని వ్యక్తి కారును చోరీ చేసి.. అందులోనే బయల్దేరాడు. అతను గిద్దలూరు వైపు వస్తున్నట్లు పోలీసులకు సమాచారం వచ్చింది. దీంతో గిద్దలూరు పోలీసులు అప్రమత్తమయ్యారు. ఈ క్రమంలోనే కానిస్టేబుల్‌ రసూల్, హోంగార్డు ఖాజా గిద్దలూరులో కాపు కాశారు. ఒంగోలు రహదారిపై శనివారం తనిఖీలు నిర్వహించారు. ఈ క్రమంలోనే ఓ కారును ఆపే ప్రయత్నం చేయగా.. నిందితుడు వేగం తగ్గిస్తున్నట్లు నటించి.. ఆ తర్వాత ఉన్నట్లుండి దూసుకెళ్లే ప్రయత్నం చేశాడు.

ఈ క్రమంలోనే కానిస్టేబుల్‌ రసూల్‌ అలర్ట్ అయ్యాడు. నిందితుడి కాలర్‌ పట్టుకునే ప్రయత్నం చేశాడు. పరిగెత్తుతూ వెళ్లిన కానిస్టేబుల్ రసూల్.. నిందితుడి కాలర్ పట్టుకున్నాడు. అయితే నిందితుడు వాహనం వేగం పెంచడంతో సుమారుగా వంద అడుగుల దూరం కానిస్టేబుల్ రసూల్‌ను ఈడ్చుకెళ్లాడు. ఈ ఘటనలో రసూల్ తీవ్రంగా గాయపడ్డారు. మరోవైపు ఈ ఘటన తర్వాత నిందితుడు చోరీ చేసిన కారును స్థానిక ఆర్టీసీ బస్టాండు సమీపంలో వదిలేసి పరారయ్యాడు. ఒంగోలు పోలీసులు వాహనాన్ని స్వాధీనం చేసుకున్నారు. నిందితుడిపై కేసు నమోదు చేసుకుని దర్యాప్తు జరుపుతున్నారు.