నేపాల్‌లో మొబైల్స్, కాన్పూర్‌లో సిమ్‌‌లు కొనుగోలు,,,,మరో ముగ్గురు వైద్యులను అరెస్ట్ చేసిన ఎన్ఐఏ

ఢిల్లీలోని ఎర్రకోట వద్ద గతవారం చోటుచేసుకున్న పేలుడు ఘటనపై దర్యాప్తులో విస్తుపోయే నిజాలు వెలుగులోకి వస్తున్నాయి. కుట్రదారులు తెలివికి దర్యాప్తు అధికారులే షాకవుతున్నారు. దేశవ్యాప్తంంగా పేలుళ్ల కోసం సెకెన్ హ్యాండ్ మొబైల్ ఫోన్లను నేపాల్‌లోనూ.. సిమ్ కార్డులను ఉత్తర్ ప్రదేశ్‌లోని కాన్పూర్ నగరంలో కొనుగోలుచేసినట్టు గుర్తించారు. నేపాల్‌లో ఏడు పాత ఫోన్లను కొన్నట్టు విశ్వసనీయ వర్గాలు తెలిపాయి. మొత్తం 17 సిమ్‌ కార్డులను వినియోగించిన ఉగ్రమాడ్యూల్.. వీటిలో ఆరింటిని కాన్పూర్‌లో కొనుగోలుచేసినట్టు వివరించాయి. ఇందులో రెండు సిమ్‌లను సెంట్రల్ కాన్పూర్‌లోని బెకాన్‌గంజ్ ప్రాంతానికి చెందిన ఐడీలతో కొన్నట్టు తెలిసింది. దీంతో వారిని పట్టుకోడానికి భద్రతా బలగాలు రంగంలోకి దిగాయి.

అలాగే, ఢిల్లీ కారు పేలుడుకు పాల్పడిన డాక్టర్ ఉమర్ మహమ్మద్ అలియాస్ ఉమర్-నబీతో మరో ముగ్గురు వైద్యులు కాంటాక్ట్ అయినట్టు తాజాగా బయటపడింది. వారిని డాక్టర్ పర్వేజ్, డాక్టర్ మహమ్మద్ అరిఫ్, డాక్టర్ ఫరూక్ అహ్మద్ దార్‌‌లుగా గుర్తించారు. వీరిలో డాక్టర్ పర్వేజ్.. అల్-ఫలాహ్ యూనివర్సిటీ వైద్యురాలు డాక్టర్ షహీన్ సయ్యద్‌కు సోదరుడు. అతడు లక్నోలోని ఇంటిగ్రల్ యూనివర్సిటీలో అసిస్టెంట్ ప్రొఫెసర్‌గా పనిచేస్తున్నాడు. డాక్టర్ మహమ్మద్ ఆరిఫ్ కాన్పూర్ ప్రభుత్వ జీఎస్వీఎం మెడికల్ కాలేజీలో డీఎం (కార్డియాలజీ) మొదటి ఏడాది విద్యార్థి. ఫరూక్ అహ్మద్ దార్ జీఎస్ మెడికల్ కాలేజీలో అసిస్టెంట్ ప్రొఫెసర్.

అలాగే, డాక్టర్ షహీన్, డాక్టర్ ముజామిల్‌లతోనూ నవంబరు 8 ఉదయం వరకూ ఉమర్ నేరుగా సంప్రదింపులు జరిపినట్టు వెల్లడయ్యింది. నిందితులు స్విస్ యాప్ త్రీమా ద్వారా కమ్యూనికేషన్ జరిపినట్టు ఇప్పటికే గుర్తించారు. ఎర్రకోట పేలుడుకు నిందితుడు నాలుగు వారాల ముందు నుంచి సిద్ధమైనట్టు నిఘా వర్గాలు పేర్కొన్నాయి. అక్టోబరు 2న బ్లూప్రింట్ ప్రిపరేషన్ మొదలుపెట్టి.. అక్టోబరు 28న పూర్తిచేశాడు. కాన్‌గంజ్‌లో బట్టల దుకాణం నడుపుతోన్న డాక్టర్ పర్వేజ్ బావమరిది ఉస్మాన్‌ను ఢిల్లీ పోలీస్ ప్రత్యేక సెల్ అధికారులు ప్రశ్నించారు. ఆరు గంటల పాటు అతడ్ని విచారించగా.. ఎటువంటి సమాచారం రాలేదని తెలుస్తోంది. కాన్పూర్‌కు వెళ్లినప్పుడు డాక్టర్ పర్వేజ్ కల్నల్‌గంజ్‌, జీఎస్వీ మెడికల్ కాలేజీ, బాబూపూర్వా, మంధానాల్లోని తన స్నేహితులను కలిసినట్టు గుర్తించారు. అలాగే, డాక్టర్ షహీన్ కూడా అక్టోబరులో కాన్పూర్‌కు వెళ్లినట్టు దర్యాప్తులో గుర్తించారు.