మౌస్ కదలకపోతే ఐడిల్.. 15 నిమిషాలు గైర్హాజర్! కాగ్నిజెంట్ కొత్త సర్వైలెన్స్ టూల్‌తో ఉద్యోగులపై కంటికి కనిపించని కన్ను

ఐటీ రంగంలో హైబ్రిడ్ పని విధానం సాధారణమైపోయింది. ఇంటి నుంచి పనిచేసే ఉద్యోగుల ప్రొడక్టివిటీని కొలవడం కంపెనీలకు పెద్ద సవాలుగా మారింది. ఈ నేపథ్యంలో ప్రముఖ ఐటీ సేవల సంస్థ కాగ్నిజెంట్ కొత్తగా ‘ప్రో-హాన్స్ స్టైల్’ అనే మానిటరింగ్ సాఫ్ట్‌వేర్‌ను తీసుకొచ్చింది. ఈ టూల్ ఉద్యోగుల కంప్యూటర్ యాక్టివిటీని నిమిషం నిమిషానికీ ట్రాక్ చేస్తూ వారి పని తీరును రికార్డు చేస్తుంది.
ఈ సాఫ్ట్‌వేర్ ప్రత్యేకత ఏమిటంటే… మౌస్ 300 సెకండ్లు (5 నిమిషాలు) కదలకపోతే ఆ ఉద్యోగి ‘ఐడిల్’ స్థితిలో ఉన్నట్లు గుర్తిస్తుంది. అంతకంటే ఎక్కువగా 15 నిమిషాల పాటు మౌస్ కదలకపోతే వ్యక్తి పని స్థలం నుంచి దూరంగా ఉన్నట్లు రిపోర్టు చేస్తుంది. అంతేకాదు, ఉద్యోగి ఏ అప్లికేషన్లు ఉపయోగిస్తున్నాడు, ఎంతసేపు వాటిపై గడిపాడు అనే వివరాలన్నీ కూడా ఈ టూల్ రికార్డు చేసి మేనేజ్‌మెంట్‌కు పంపుతుంది.
కాగ్నిజెంట్ అధికారులు మాత్రం ఇది పనితీరు అంచనా కోసం కాదని, కేవలం టూల్స్ వినియోగం, రిసోర్స్ అలాకేషన్‌ను అర్థం చేసుకోవడానికి మాత్రమే అని స్పష్టం చేస్తున్నారు. అయినప్పటికీ ఈ స్థాయి మానిటరింగ్ ఉద్యోగుల్లో ఒత్తిడి పెంచుతుందని, ప్రైవసీ హక్కులకు భంగం కలిగిస్తుందని విమర్శలు వస్తున్నాయి. టీబ్రేక్ కోసం కూడా 5 నిమిషాలకు మించి లేచి వెళితే ‘ఐడిల్’ అని ముద్ర వేయడం ఎంతవరకు సబబు అన్నది చర్చనీయాంశంగా మారింది.
ఇప్పటికే పలు ఐటీ కంపెనీలు ఇలాంటి ట్రాకింగ్ టూల్స్ ఉపయోగిస్తున్న నేపథ్యంలో కాగ్నిజెంట్ నిర్ణయం కొత్త ఏమీ కాదు. కానీ హైబ్రిడ్ పని విధానంలో నమ్మకం, ప్రైవసీ మధ్య సమతూకం ఎలా ఉండాలి అనే ప్రశ్న మాత్రం మరింత బలంగా వినిపిస్తోంది.