ఒక కప్పు కాఫీ తాగితే ఫ్యాటీ లివర్‌ ముప్పు తగ్గడమే కాదు, కాలేయం ఆరోగ్యంగా

బీపీ, షుగర్‌ మాదిరిగానే ఫ్యాటీ లివర్‌ సమస్య కూడా ఈ మధ్యకాలంలో ఎక్కువగా వినిపిస్తోంది. కాలేయంలో కొద్దిగానే కొవ్వు ఉంటుంది. కానీ ఈ కొవ్వు, కాలేయం మొత్తం బరువులో పది శాతానికి మించి ఉంటే దాన్ని ఫ్యాటీ లివర్‌గా పరిగణిస్తారు. ఇది తీవ్రమైన సమస్యలను కలిగిస్తుంది. ప్రస్తుత లైఫ్‌స్టైల్‌, చెడు ఆహార అలవాట్లు, అధిక మోతాదులో మద్యం తీసుకోవడం, ఊబకాయం, డయాబెటిస్‌.. ఫ్యాటీ లివర్‌కు ప్రధాన కారణం అని నిపుణులు అంటున్నారు.

ఫ్యాటీ లివర్‌ రెండు రకాలు.. మద్యపానం కారణంగా వచ్చే.. ఆల్కహాలిక్‌ ఫ్యాటీ లివర్‌, మద్యపానం కారణంగా వచ్చే ఆల్కహాలిక్ ఫ్యాటీ లివర్‌తో పాటు, మద్యం తాగకపోయినా వచ్చే నాన్ ఆల్కహాలిక్ ఫ్యాటీ లివర్. ముఖ్యంగా నాన్‌ ఆల్కహాలిక్‌ ఫ్యాటీ లివర్‌ డిసీజ్‌ నిశ్శబ్దంగా ఆరోగ్యాన్ని దెబ్బతీస్తోందని నిపుణులు అంటున్నారు.

ఈ నేపథ్యంలో సోషల్ మీడియాలో ‘ద లివర్ డాక్’ పేరుతో ప్రసిద్ధి పొందిన హెపటాలజిస్ట్ డా. సైర్యాక్ అబ్బీ ఫిలిప్స్ కొన్ని ముఖ్యమైన సూచనలు చేశారు. ఆయన చెప్పిన చిన్న చిన్న ఆహార, జీవనశైలి మార్పులు పాటిస్తే, ఫ్యాటీ లివర్‌ను నియంత్రించడం, తిరిగి ఆరోగ్యంగా మార్చుకోవడానికి సహాయపడతాయని నిపుణులు అంటున్నారు.

 ఫ్యాటీ లివర్‌ నివారణకు ఆహారం ఎలాంటి పాత్ర పోషిస్తుంది?

మనం తీసుకునే ఆహారం, జీవనశైలి లివర్‌ ఆరోగ్యానికి ఎంతో కీలకం. లీవర్‌లోని కొవ్వు సామర్థ్యం అయిన 5 శాతానికి మించి కొవ్వు పేరుకుపోయినప్పుడు ఫ్యాటీ లివర్‌ అభివృద్ధి చెందుతుంది.

కాలక్రమేణా ఇది పోషకాలను ప్రాసెసింగ్, టాక్సిన్ తొలగింపు, రక్తంలో చక్కెర నియంత్రణ వంచి జీవక్రియ విధులకు అంతరాయం కలిగిస్తుంది. మన డైట్‌లో అనారోగ్యకరమైన ఆహారాన్ని దూరం పెట్టి, పోషకాహారం తీసుకుంటే ఫ్యాటీ లివర్‌ను నియంత్రించవచ్చని డాక్టర్‌ ఫిలిప్స్‌ అన్నారు.

లివర్‌ ఆరోగ్యానికి ఏ ఆహారానికి దూరంగా ఉండాలి?

కొన్ని ఆహారాలు ఫ్యాటీ లివర్‌ ముప్పును పెంచుతాయని డాక్టర్‌ ఫిలిప్స్‌ అన్నారు. స్వీట్స్, చక్కెర పానీయాలు ఎక్కువగా తీసుకుంటే లివర్‌లో కణాలలో ఇన్సుపలిన్‌ నిరోధకత, కొవ్వు నిల్వ పెరుగుతుంది. ఇది నాన్‌ఆల్కహాల్‌ ఫ్యాటీ లివర్‌ వ్యాధి ముప్పును గణనీయంగా పెంచుతుంది.

భారతీయ వంటకాల్లో కొబ్బరి నూనె, పామాయిల్, వెన్న, నెయ్యి ఎక్కువగా వాడుతుంటాం. అయితే, వీటిలోని సంతృప్త కొవ్వులు లివర్‌లో కొవ్వు పేరుకునేలా చేస్తాయి. లివర్‌ పనితీరును దెబ్బతీస్తాయి. వీటిని తక్కువగా తీసుకుంటే లివర్‌ ఆరోగ్యానికి మంచిది అని డా. ఫిలిప్స్‌ సూచించారు.

ఆల్కహాల్ వద్దే వద్దు

​ఆల్కహాల్ లివర్‌ దెబ్బతినడానికి అతిపెద్ద కారణాలలో ఒకటిగా ఉంది. ఆల్కహాల్‌ తక్కువగా తీసుకున్నా లివర్‌ ఆరోగ్యాన్ని దిగజారుస్తుందని నిపుణులు అంటున్నారు. లివర్‌ ఆరోగ్యాన్ని రక్షించుకోవడానికి, ఫ్యాటీ లివర్‌ ముప్పును తగ్గించుకోవడానికి ఆల్కహాల్‌ను పూర్తిగా విడిచిపెట్టడమే మంచిది అని డాక్టర్‌ ఫిలిప్స్‌ అన్నారు.

కాఫీ నిజంగా మీ లివర్‌కు సహాయపడుతుందా?

బ్లాక్‌ కాఫీ లివర్‌ ఆరోగ్యానికి మేలు చేస్తుందని డాక్టర్‌ ఫిలిప్స్‌ అన్నారు. ఇది లివర్‌ పనితీరుకు మద్దతు ఇస్తుందని, కొవ్వు పేరుకుపోవడాన్ని తగ్గిస్తుందని, వాపును తగ్గిస్తుందని అధ్యయనాలు చూపిస్తున్నాయి.

యాంటీఆక్సిడెంట్లు, బయోయాక్టివ్ సమ్మేళనాలతో సమృద్ధిగా ఉన్న బ్లాక్ కాఫీ ఇన్సులిన్ సెన్సిటివిటీని, మొత్తం జీవక్రియ సమతుల్యతను మెరుగుపరుస్తుంది. రోజూ ఒక కప్పు బ్లాక్‌ కాఫీ తాగితే నాన్‌ ఆల్కాహాలిక్‌ ఫాటీ లివర్, ఆల్కహాలిక్ ఫ్యాటీ లివర్‌ ముప్పును తగ్గించుకోవచ్చు.