చలికాలంలో చర్మం దురదగా మారడానికి కారణాలేంటో తెలుసా

చలికాలంలో వాతావరణం ఆహ్లాదకరంగా ఉంటుంది. చల్లటి వాతావరణాన్ని చాలా మంది ఆస్వాదిస్తారు. ప్రతి ఉదయం వెచ్చ వెచ్చగా కాఫీ, టీలు తాగుకతుంటారు. అయితే, చలికాలంలో ఆహ్లాదకరమైన అంశాలతో పాటు చాలా మందిని ఇబ్బంది పెట్టే సాధారణ సమస్య కూడా ఉంది. అదే చర్మంపై దురద. ఉష్ణోగ్రతలు తగ్గిన వెంటనే చాలా మంది చర్మం పొడిగా, నిర్జీవంగా మారుతుంది.

దీంతో చర్మంపై దురద పెరుగుతుంది. చల్లని పొడి గాలి, తక్కువ తేమ స్నానపు అలవాట్లు వల్ల చర్మం సహజ తేమను కోల్పోతుంది. ఇది పొడిగా మారి పగుళ్లు ఏర్పర్చి దురదను కలిగిస్తుంది. చలికాలంలో మన చర్మం ఎందుకు దురదగా మారుతుంది, ఇందుకు కారణాలు, ఈ సమస్యను ఎలా తగ్గించుకోవాలో డాక్టర్ సునీల్ కుమార్ ప్రభు, చర్మవ్యాధి నిపుణుడు (ఆస్టర్ RV హాస్పిటల్) చెప్పారు. ఆ పూర్తి వివరాలు గురించి ఇప్పుడు తెలుసుకుందాం.

శీతాకాలంలో చర్మంపై దురద పెరగడానికి కారణాలు

శీతాకాలపు దురదకు ప్రధాన కారణం పొడిబారడం. బయట ఉన్న చల్లని వాతావరణం, ఇంటి లోపల తేమ తక్కువగా ఉండటం వల్ల చర్మం నిర్జీవంగా మారుతుంది. అంటే చర్మం తేమను కోల్పోతుంది. దీంతో చర్మం పొడిబారి నిస్తేజంగా మారుతుంది. చివరికి దురద మొదలవుతుందని డాక్టర్ చెబుతున్నారు.

అంతేకాకుండా శీతాకాలంలో రక్తప్రసరణ విధానం కూడా మారుతుంది. చలిగా ఉన్నప్పుడు శరీరం కోర్ ఉష్ణోగ్రతకు ప్రాధాన్యత ఇస్తుంది. అందుకే చర్మానికి తక్కువ రక్తం వెళుతుంది. దీంతో చర్మం పొడిబారుతుంది. చర్మం ఎండిపోతుంది. దీంతో.. చర్మంపై దురద పెరుగుతుంది.

ఉన్ని స్వెటర్లు లేదా స్కార్ఫ్‌లు ధరించడం వల్ల కూడా చర్మపు చికాకు కలుగుతుందని డాక్టర్ చెబుతున్నారు. ఉన్ని దుస్తులు నిరంతరం రాపిడికి గురికావడానికి కారణమవుతాయి. ఇంట్లో వాడే ఇండోర్ హీటర్లు కూడా గాలిని పొడిగా చేస్తాయి. దీంతో, చర్మం పొడిగా మారి దురద వస్తుందని డాక్టర్ చెబుతున్నారు.

తామర, సోరియాసిస్ లేదా అలెర్జీలు వంటి చర్మ సమస్యలతో బాధపడుతున్నవారికి చలికాలంలో ఈ లక్షణాలు మరింత తీవ్రంగా మారొచ్చని డాక్టర్ అంటున్నారు.

శీతాకాలంలో దురదను తగ్గించడానికి మార్గాలు

హైడ్రేషన్: శీతాకాలంలో వాతావరణం కారణంగా చాలా మంది తక్కువ నీటిని తాగుతుంటారు. అయితే చర్మానికి తేమ అవసరం. గోరువెచ్చని నీరు తాగాలని నిపుణులు చెబుతున్నారు. అంతేకాకుండా రోజుకు కనీసం 3 లీటర్ల నీరు తాగాలని డాక్టర్ చెబుతున్నారు. చర్మం నుంచి తేమ బయటకు రాకుండా స్నానం చేసిన వెంటనే లోషన్ అప్లై చేయాలి.

సరైన మాయిశ్చరైజర్: షియా బటర్, సెరామైడ్‌లు, హైలురోనిక్ ఆమ్లం, గ్లిజరిన్, బాదం నూనె లేదా కొబ్బరి నూనెను ప్రధాన పదార్థంగా కలిగి ఉన్న మాయిశ్చరైజ్ క్రీముల్ని ఎంచుకోవాలి. మోచేతులు, మోకాలు, పాదాలకు కూడా ప్రత్యేక ప్రాధాన్యత ఇవ్వాలి. రోజుకు రెండు సార్లు మాయిశ్చరైజర్ అప్లై చేసుకోవాలి.

స్నానానికి వేడి నీరు వద్దు: చలికాలంలో చలిని తట్టుకోవడానికి చాలా మంది వేడి వేడి నీటితో స్నానం చేస్తుంటారు. అయితే, దీని వల్ల చర్మం దెబ్బతింటుందని డాక్టర్ చెబుతున్నారు. గోరు వెచ్చని నీటితో స్నానం చేయాలని డాక్టర్ సూచిస్తున్నారు. అంతేకాకుండా సున్నితమైన, సువాసన లేని బాడీ వాష్ ఉపయోగించాలి.

చలికాలంలో చర్మ సమస్యలు ఎక్కువ

శీతాకాలంలో చర్మ సమస్యలు ఎక్కువగా ఉంటాయని డాక్టర్ చెబుతున్నారు. చలికాలంలో పొడి చర్మం లేదా జీరోసిస్, చర్మం గరుకుగా మారడం, దురద రావడం, పొలుసులు ఊడిపోవడం లాంటివి జరుగుతుంటాయి. ముఖ్యంగా సున్నితమైన చర్మంతో బాధపడేవారు ఎక్కువ సమస్యలు ఎదుర్కొంటారు. తామర కూడా చల్లని వాతావరణంలో మరింత తీవ్రమవుతుంది.

సోరియాసిస్ తక్కువ సూర్యరశ్మి, చర్మం పొడిబారడం వల్ల వచ్చే అవకాశం ఉంది. దీనివల్ల పొలుసులుగా ఉండే మచ్చలు ఏర్పడతాయి. చలికాలంలో వచ్చే చర్మ సమస్యల్లో చుండ్రు ఒకటి. ఎందుకంటే తల చర్మం పొడిగా, చికాకుగా మారుతుంది. ఫలితంగా పొరలుగా, దురద వస్తుంది.

ఫంగల్ ఇన్ఫెక్షన్లు

శీతాకాలంలో ఫంగల్ ఇన్ఫెక్షన్లు కూడా వస్తాయని డాక్టర్ అంటున్నారు. ఎందుకంటే బిగుతుగా ఉండే దుస్తులు ధరించడం, వేరు దుస్తులపై స్వెటర్లు ధరించడం వల్ల చెమట పట్టడం జరుగుతుంది. దీంతో ఫంగస్ పెరగడానకి అనువైన తేమ వాతావరణం ఏర్పడుతుంది. కెరాటోసిస్ పిలారిస్ లేదా చికెన్ స్కిన్ ఎక్కువగా కనిపిస్తుంది. చర్మం పొడిబారడం వల్ల చిన్నటి ఎర్రగడ్డలు కనిపిస్తాయి. పెదాలు కూడా పొడిగా మారి పగుళ్లు ఏర్పడతాయి.

తరచుగా మాయిశ్చరైజర్‌ను అప్లై చేయడం, తగినంత నీరు తాగడం, తీవ్రమైన వాతావరణం నుంచి రక్షించుకోవడం వంటి సులభమైన పద్ధతులతో దురదతో పాటు చర్మ సమస్యల్ని నివారించవచ్చని డాక్టర్ అంటున్నారు.