భయానక రికార్డు.. 2025లో 9 నెలల్లోనే ప్రకృతి విలయం వల్ల 4,064 మంది మృతి!

ఈ ఏట (జనవరి నుంచి సెప్టెంబరు వరకు) దేశవ్యాప్తంగా ప్రకృతి వైపరీత్యాల కారణంగా 4,064 మంది ప్రాణాలు కోల్పోయారని ఢిల్లీకి చెందిన ప్రముఖ పర్యావరణ సంస్థ ‘సెంటర్ ఫర్ సైన్స్ అండ్ ఎన్విరాన్మెంట్’ (CSE) మరియు ‘డౌన్ టు ఎర్త్’ మ్యాగజైన్ ఉమ్మడిగా విడుదల చేసిన నివేదిక తెలిపింది. ఈ గణాంకాలు భారతదేశంలో వాతావరణ మార్పుల ప్రభావం ఎంత తీవ్రంగా పెరుగుతోందో స్పష్టంగా చూపిస్తున్నాయని నిపుణులు ఆందోళన వ్యక్తం చేస్తున్నారు. గత నాలుగేళ్ల సగటుతో పోల్చితే ఈ ఏడాది మరణాల సంఖ్య ఏకంగా 48 శాతం పెరిగినట్లు నివేదిక పేర్కొంది.
ప్రకృతి విపత్తులు కేవలం ప్రాణనష్టం మాత్రమే కాదు, వ్యవసాయ రంగాన్ని కూడా దారుణంగా దెబ్బతీస్తున్నాయి. ఈ 9 నెలల్లోనే 9.47 మిలియన్ హెక్టార్ల పంట పొలాలు నాశనమయ్యాయి. 2022తో పోల్చితే ఇది దాదాపు నాలుగు రెట్లు ఎక్కువ నష్టమని నివేదిక విశ్లేషించింది. వర్షాభావం, అతివృష్టి, తుఫానులు, వరదలు వంటి విపత్తులు రైతులను అతలాకుతలం చేస్తున్నాయి.
అయితే ఈ గణాంకాలు కూడా పూర్తి చిత్రాన్ని చూపించడం లేదని నిపుణులు హెచ్చరిస్తున్నారు. ఆంధ్రప్రదేశ్, పశ్చిమ బెంగాల్ వంటి ప్రధాన వ్యవసాయ రాష్ట్రాల నుంచి వచ్చిన సమాచారం అసంపూర్ణంగా, తక్కువగానే నమోదైంది. అందువల్ల నిజమైన మరణాల సంఖ్య, పంట నష్టం ఇంకా ఎక్కువగానే ఉండొచ్చని నివేదిక హెచ్చరించింది. పూర్తి డేటా సేకరణలో రాష్ట్ర ప్రభుత్వాలు మరింత బాధ్యతాయుతంగా వ్యవహరించాలని సూచిస్తోంది.
వాతావరణ మార్పులు ఇక కేవలం భవిష్యత్ ముప్పు మాత్రమే కాదు, ఇప్పటికే మన తలుపు తట్టిన భయంకర వాస్తవం అని ఈ నివేదిక మరోసారి రుజువు చేస్తోంది. మరణాలు, పంట నష్టం రెండూ ఆకాశాన్నంటుతుంటే, విపత్తుల నిర్వహణ, వాతావరణ అనుకూల వ్యవసాయ విధానాలు ఇప్పుడే అత్యవసరమని నిపుణులు ఒక్కగానే హెచ్చరిస్తున్నారు.