ఆయుష్మాన్ భారత్ ఉచిత బీమా.. 5 లక్షల నుంచి 10 లక్షలకు పెంచుకోవ

దేశంలోని పేద, మధ్యతరగతి ప్రజలకు మెరుగైన వైద్య సేవలు అందించే లక్ష్యంతో కేంద్ర ప్రభుత్వం ఆయుష్మాన్ భారత్ ప్రధానమంత్రి జన్ ఆరోగ్య యోజన పథకాన్ని తీసుకొచ్చింది. ఈ పథకం కింద ఒక్కో కుటుంబానికి ఏడాదికి రూ. 5 లక్షల ఉచిత ఆరోగ్య బీమా కల్పిస్తోంది. అయితే, పెరుగుతున్న అవసరాలకు అనుగుణంగా ఈ ఉచిత బీమా పథకంలో కీలక మార్పులు చేస్తూ వస్తోంది కేంద్ర ప్రభుత్వం. ఇప్పుడు కొన్ని కుటుంబాలు ఈ ఉచిత బీమా పరిమితి రూ.5 లక్షల నుంచి రూ. 10 లక్షల వరకు పెంచుకునే టాప్-అప్ అవకాశాన్ని కల్పిస్తోంది. ఈ విషయం చాలా మందికి తెలియదనే చెప్పాలి.ఒక్క చిన్న పని చేస్తే చాలు రూ.10 లక్షల కవరేజీ పొందవచ్చు. మరి అది ఎలాగో తెలుసుకుందాం.

రూ.10 లక్షల ఉచిత కవరేజ్ ఎలా పొందాలి?

ఆయుష్మాన్ భారత్ పథకం కేంద్ర ప్రభుత్వం అందించే నిధులతో నడుస్తుంది. అయితే, కేంద్రం భాగస్వామ్యంతో ఈ పథకాన్ని రాష్ట్రాలు అమలు చేస్తున్నాయి. కొన్ని రాష్ట్రాల్లో మాత్రమే ఈ కేంద్రం స్కీమ్ ఇంకా అమలులోకి రాలేదు. ప్రస్తుతం ఒక కుటుంబానికి ఉచితంగా రూ.5 లక్షల బీమా లభిస్తోంది. అయితే, దీనిని రూ.10 లక్షలకు పెంచుకోవచ్చు.

ఆయుష్మాన్ భారత్ పథకం ద్వారా 70 ఏళ్ల వయసు దాటిన వయోవృద్ధులకు అదనంగా రూ.5 లక్షల ఉచిత బీమా కవరేజీని కల్పిస్తోంది కేంద్రం. ఆర్థిక పరిస్థితితో సంబంధం లేకుండా ఈ బీమా కవరేజీని ఇస్తోంది. అంటే ఒక కుటుంబంలో 70 ఏళ్లు దాటిన వ్యక్తి ఉంటే ఆ కుటుంబానికి వచ్చే రూ.5 లక్షల ఉచిత బీమాతో పాటు సీనియర్ సిటిజన్ కేటగిరీలో ఆ వ్యక్తికి రూ.5 లక్షల బీమా లభిస్తుంది. అంటే మొత్తంగా రూ.10 లక్షల బీమా ఆ కుటుంబానికి లభిస్తుంది. అయితే, ఇది పొందేందుకు ఆ కుటుంబం చిన్న పని చేయాల్సి ఉంటుంది.

ఆయుష్మాన్ భారత్ కవరేజీ పొందుతోన్న కుటుంబాల్లో 70 ఏళ్ల వయసు దాటిన వ్యక్తి ఉంటే అదనపు టాప్ అప్ బెనిఫిట్ పొందవచ్చు. అందుకు ఆ కుటుంబం చేయాల్సిన ఒకే ఒక్క చిన్న పని ఆధార్ eKYC మరోసారి చేయించాల్సి ఉంటుంది. ఆధార్ ఈ-కేవైసీ మరోసారి చేసి పెంచిన కవరేజీని యాక్టివేట్ చేసుకోవాల్సి ఉంటుంది. చాలా ఇన్సూరెన్స్ కంపెనీలు వయో పరిమితి విధిస్తాయి. అయితే ఆయుష్మాన్ భారత్ స్కీమ్‌లో ఎలాంటి పరిమితి లేదు. 70 ఏళ్లు, 80 ఏళ్ల ఇలా ఎంతున్నా బీమా కవరేజీ లభిస్తుంది. 70 ఏళ్ల వ్యక్తి కోసం కేవైసీ పూర్తి చేసి రూ.5 లక్షల అదనపు టాప్ అప్ యాక్టివేట్ చేసుకోవాల్సి ఉంటుంది.