దేశంలోనే అత్యంత ఖరీదైన రిజిస్ట్రేషన్ ఫ్యాన్సీ నెంబరు

తమకు ఇష్టమైన కార్లు కొనుగోలు చేసేందుకు రూ.లక్షలు, రూ.కోట్లు ఖర్చుచేస్తుంటారు. అయితే, వాటికి ఫ్యాన్సీ నంబర్‌ కోసం చాలా మంది లక్షలు పోసి, వేలం దక్కించుకోడానికి తెగ పోటీ పడుతుంటారు. ఎంతైనా పెట్టి సొంతం చేసుకుంటారు. తాజాగా, వేలంలో ఓ ఫ్యాన్సీ నెంబరు ఏకంగా రూ.1.17 కోట్లు పలికింది. దీంతో దేశంలోనే అత్యంత ఖరీదైన వాహన రిజిస్ట్రేషన్ నెంబర్‌గా ఇది రికార్డుల్లోకి ఎక్కింది. హర్యానా రవాణా శాఖ వీఐపీ లేదా ఫ్యాన్సీ నెంబర్లకు వారం వారం ఆన్‌లైన్‌లో వేలం నిర్వహిస్తుంది. ఈ వారం నిర్వహించిన వేలంలో 'HR88B8888' నెంబరు రికార్డు ధరకు ఓ వ్యక్తి దక్కించుకున్నారు.

ఫ్యాన్సీ నెంబరు వేలంలో పాల్గొనాలనుకునేవారు శుక్రవారం సాయంత్రం 5 గంటల నుంచి సోమవారం ఉదయం 9 గంటల వరకు దరఖాస్తు చేసుకోవాల్సి ఉంటుంది. ఆ తర్వాత నుంచి వేలం మొదలై.. బుదవారం సాయంత్రం 5 గంటలకు ఫలితాలను వెల్లడిస్తారు. ఈ ప్రక్రియ మొత్తం ఆన్‌లైన్‌లో హర్యానా రవాణా శాఖ అధికారిక వెబ్‌సైట్ fancy.parivahan.gov.inలో జరుగుతుంది. ఈ వారం ‘HR88B8888’ ఫ్యాన్సీ నెంబరుకు మొత్తం 45 దరఖాస్తులు వచ్చాయి. దీనికి ప్రారంభ దర రూ.50 వేలుగా నిర్ణయించారు. కానీ, దీనిని సొంతం చేసుకోడానికి పోటీపడి, లక్షల నుంచి కోట్లకు తీసుకెళ్లారు. బుధవారం సాయంత్రం 5 గంటలతో సమయం ముగియగా.. ఓ వ్యక్తి రూ.1.17 కోట్లకు నెంబర్‌ను సొంతం చేసుకున్నాడు. ఇక్కడో చెప్పుకోదగ్గ విషయం ఏంటంటే మధ్యాహ్నం 12 గంటలకు ఇది రూ.88 లక్షలుగా ఉంది. కాగా, గతవారం ‘HR22W2222’ నెంబరును వేలంలో ఓ వ్యక్తి రూ.37.91 లక్షలకు దక్కించుకున్నాడు.

హెచ్ఆర్88బీ8888.. ఏంటీ నెంబరు ప్రత్యేకత?

HR 88B8888 అనే నంబర్‌ ప్రత్యేకమైంది లేదా బిడ్డింగ్ ద్వారా కొనుగోలు చేసిన VIP నంబర్‌గా పరిగణిస్తారు. HR అంటే అది హర్యానా రాష్ట్రంలో రిజిస్ట్రేషన్ అయిన వాహనం. 88 అంటే హర్యానాలో ఒక ప్రత్యేక RTO (రీజినల్ ట్రాన్స్‌పోర్ట్ ఆఫీస్) లేదా జిల్లా కోడ్. B అనేది ఆ RTO పరిధిలోని వాహన సిరీస్ కోడ్‌ను సూచిస్తుంది. 8888 అనేది ఆ వాహనానికి కేటాయించిన ప్రత్యేక నాలుగు అంకెల రిజిస్ట్రేషన్ నంబర్. ఈ నంబర్‌ ప్రత్యేకంగా ఉండటానికి పెద్ద అక్షరంలో ‘B’ కూడా ‘8’ లా కనిపించమే. మొత్తం నంబర్‌ ఒక వరుస ఎనిమిదుల్లా కనిపిస్తుంది. అదనంగా, ఒకే అంకె (8) పునరావృతం కావడం వల్ల ఇది ఎంతో అరుదుగా, ఆకర్షణీయమైన నంబర్‌గా మారుతుంది.

కాగా, ఈ ఏడాది ఏప్రిల్‌లో కేరళకు చెందిన బిలియనీర్ వెను గోపాలకృష్ణన్ తాను కొత్తగా కొనుగోలుచేసిన లంబోర్గిని వాహనం ఫ్యాన్సీ నెంబరు ‘KL 07 DG 0007’‌ను రూ. 45.99 లక్షలకు దక్కించుకున్నారు. వేలంలో దీని ప్రారంభ ధర రూ. 25,000లుగా నిర్ణయించారు. భారీగా పోటీ పడటంతో రూ.45.99 లక్షలు పలికింది. ‘0007’ నెంబరు జేమ్స్ బాండ్ కోడ్‌‌ను గుర్తు చేసేలా ఉండటం ఒక ప్రత్యేకత. ఈ కారణంగా గోపాలకృష్ణన్‌ పోటీపడి మరి నెంబర్‌ను సొంతం చేసుకున్నారు.