మెట్రో ఫేజ్-2కు కేంద్రం గ్రీన్‌సిగ్నల్.. రూ.10 వేల కోట్ల ప్రాజెక్ట్

మహారాష్ట్రలోని పూణే నగరానికి కేంద్రంలోని నరేంద్ర మోదీ ప్రభుత్వం శుభవార్త చెప్పింది. పూణే నగర ప్రజారవాణాను సమూలంగా మార్చేందుకు ఉద్దేశించిన పూణే మెట్రో రైల్ ప్రాజెక్ట్ ఫేజ్-2కు.. బుధవారం సమావేశమైన కేంద్ర మంత్రివర్గం ఆమోద ముద్ర వేసింది. ఈ ప్రాజెక్టు కింద కొత్తగా రెండు కారిడార్లు నిర్మించనున్నారు. ఇప్పటికే ఆమోదం పొందిన లైన్ 2ఏ, 2బీ లకు అదనంగా ఈ రెండు లైన్లను పూణే నగరంలో మెట్రో నెట్‌వర్క్‌ను భారీగా విస్తరించనున్నాయి. లైన్ 4 కింద ఖరాడి–హడప్సర్–స్వామ్‌గేట్–ఖడక్‌వాస్లా మార్గం.. లైన్ 4ఏ కింద నాల్ స్టాప్–వార్జే–మాణిక్ బాగ్ మార్గంలో మొత్తం 31.636 కిలోమీటర్ల రెండు కొత్త కారిడార్లకు కేంద్రం ఆమోదం తెలిపింది. ఈ రెండు లైన్లలో 28 ఎలివేటెడ్ స్టేషన్లను ఏర్పాటు చేయనున్నారు.

భారీ వ్యయం, ఐదేళ్లలో పూర్తి

ఈ మెగా ప్రాజెక్టు అంచనా వ్యయం రూ. 9,857.85 కోట్లు అని సంబంధిత వర్గాలు తెలిపాయి. ఈ నిధులను కేంద్ర ప్రభుత్వం, మహారాష్ట్ర ప్రభుత్వంతోపాటు విదేశీ ద్వైపాక్షిక ఏజెన్సీలు సంయుక్తంగా సమకూర్చనున్నాయి. ఈ ప్రాజెక్టును వచ్చే 5 ఏళ్లలో పూర్తి చేసి.. పూణే నగరవాసులకు ఈ మెట్రో మార్గాన్ని అందుబాటులోకి తీసుకురావాలని లక్ష్యంగా పెట్టుకున్నారు.

ఈ కొత్త లైన్లు సోలాపూర్ రోడ్, సింహగడ్ రోడ్, కర్వే రోడ్, ముంబై–బెంగళూరు హైవే వంటి పూణేలోని అత్యంత రద్దీ మార్గాల గుండా వెళ్లనుండటంతో.. ఆ మార్గాల్లో భారీగా ట్రాఫిక్ తగ్గిపోతుందని అంచనా వేస్తున్నారు. ఖరాడి బైపాస్, నాల్ స్టాప్, స్వామ్‌గేట్ వద్ద ఇప్పటికే ఉన్నవాటితోపాటు కొత్తగా ఆమోదించబడిన కారిడార్లతో ఈ కొత్త లైన్లు కలవనున్నాయి. హడప్సర్ రైల్వే స్టేషన్ వద్ద ఇంటర్‌ఛేంజ్ ఏర్పాటు చేయనున్నారు. ఈ కొత్త మెట్రో లైన్ల ద్వారా ఖరాడి ఐటీ పార్క్, హడప్సర్ ఇండస్ట్రియల్ ఏరియా నుంచి వార్జే, ఖడక్‌వాస్లాలోని పర్యాటక ప్రాంతాలకు సులభంగా చేరుకోవచ్చు.

ఈ కొత్త లైన్లు 4, 4ఏలలో మొత్తం కలిపి.. 2028 నాటికి రోజువారీగా 4.09 లక్షల ప్రయాణికులు రాకపోకలు సాగిస్తారని అంచనా వేస్తున్నారు. ఇది 2058 నాటికి 11.7 లక్షలకు పైగా పెరుగుతుందని ప్రభుత్వ నివేదిక పేర్కొంది. ఈ మెట్రో ఫేజ్-2 నిర్మాణ పనుల బాధ్యతను ఇప్పటికే ప్రాథమిక సర్వే, డిజైన్ పనులను ప్రారంభించిన మహారాష్ట్ర మెట్రో రైల్ కార్పొరేషన్ లిమిటెడ్‌కు అప్పగించారు.