ఒకప్పుడు నక్సల్స్‌కు అడ్డా.. ఇప్పుడు పంట సాగుతో రూ.లక్షల్లో ఆదాయం

ఛత్తీస్‌గఢ్‌లోని కాంకేర్‌ జిల్లా ఒకప్పుడు నక్సల్స్‌కు అడ్డాగా ఉండేది. అయితే కేంద్రం చర్యలతో దేశంలో క్రమంగా నక్సల్స్ సంఖ్య తగ్గుతూ వస్తోంది. కొందరు ఎదురు కాల్పుల్లో మరణిస్తే.. మరి కొందరు లొంగిపోతున్నారు. కొందరు స్వచ్ఛందంగా బయటకు వచ్చి.. ఇతర ఉపాధి అవకాశాల వైపు దృష్టి సారిస్తున్నారు. ఇప్పుడు మనం చెప్పుకోబోయే కాంకేర్ జిల్లా కూడా ఇదే కోవలోకి వస్తుంది. ఒకప్పుడు ఈ జిల్లా నక్సల్స్‌ ప్రభావిత ప్రాంతంగా ప్రసిద్ధి చెందింది. మరి ఇప్పుడు అంటే.. ఆధునిక పద్ధతిలో వ్వవసాయం చేస్తూ.. ప్రత్యేక గుర్తింపు తెచ్చుకోవడమే కాక.. ఇక్కడి ప్రజలు ఇప్పుడు లక్షల్లో ఆదాయం సంపాదిస్తూ ఎందరికో ఆదర్శంగా నిలుస్తున్నారు.

ఒకప్పుడు నక్సల్స్‌కు అడ్డాగా ఉన్న కాంకేర్ జిల్లా.. ఇప్పుడు అత్యాధునిక వ్యవసాయంతో ప్రత్యేక గుర్తింపును తెచ్చుకుంది. ఇక్కడి స్థానిక రైతులు మిగతా వారికి భిన్నంగా లక్క సాగు చేస్తున్నారు. అది వారికి భారీ ఎత్తున లాభాలను తెచ్చిపెడుతోంది. ప్రస్తుతం కాంకేర్ జిల్లాలో ప్రతి సంవత్సరం 7 వేల మెట్రిక్ టన్నుల లక్కను ఉత్పత్తి చేస్తూ దేశంలోనే ప్రథమ స్థానంలో నిలుస్తోంది. ఇక్కడ నుంచి ఇతర రాష్ట్రాలకు విత్తనాలను కూడా పంపిణీ చేస్తున్నారు. అలా ఏటా లక్షల రూపాయలు సంపాదిస్తున్నారు.

సాధారణంగా కుసుమ, రేగు చెట్లపై లక్క సాగు చేసేవారు. కానీ కాంకేర్‌ జిల్లా రైతులు మాత్రం కొత్త మోడల్‌ను అభివృద్ధి చేశారు. వీరు మిగతా వారికి భిన్నంగా సెమియలాటా అనే మొక్కలపై లక్కను ఉత్పత్తి చేస్తున్నారు. ఈ విధానంలో.. సంవత్సరం వ్యవధిలోనే లక్కను పండించేందుకు ఈ మొక్కలు రెడీ అవుతాయి. ఇలా పండిన పంటను ప్రతి ఆరు నెలలకు ఒకసారి తీసుకోవచ్చు. అయితే ఈ విధానంలో లక్క సాగుకు ప్రారంభంలో భారీగా ఖర్చు అవుతుంది. కానీ రాను రాను ఖర్చు తగ్గుతూ ఆదాయం పెరుగుతుంది. ప్రస్తుతం ఇక్కడి రైతులు ఎకరాకు రూ.లక్ష వరకూ ఆదాయం గడిస్తున్నామని తెలిపారు. పైగా లక్క సాగుకు అటవీశాఖ ట్రైనింగ్ కూడా ఇస్తోంది.

ఈ సందర్భంగా ఓ రైతు మాట్లాడుతూ.. గత సీజన్‌లో కిలో లక్కను రూ.820కు అమ్మినట్లు తెలిపారు. దేశంలో అత్యుత్తమమైన కుసుమి లక్క కేవలం ఒక్క కాంకేర్‌లోనే ఉత్పత్తి అవుతోందని ఇక్కడి వ్యవసాయ అధికారులు వెల్లడించారు. ఇక్కడ ఉత్పత్తి చేసే లక్కను విద్యుత్తు పరికరాల ఇన్సులేటర్లు, గాజులు, సిమెంటు, చెక్క బొమ్మలతో పాటుగా గ్రామ్‌ఫోన్‌ రికార్డులు, ఆభరణాలు, ఫర్నీచర్‌ పాలిష్‌కు మాత్రమే కాక వైద్య అవసరాలకు కూడా వినియోగిస్తారని తెలిపారు. ఒకప్పుడు నక్సల్స్ ప్రభావిత ప్రాంతం.. ఇప్పుడు లక్షల ఆదాయం సంపాదిస్తూ.. అందరికి ఆదర్శంగా నిలుస్తోంది.