అపార్ట్‌మెంట్‌‌లో భారీ అగ్ని ప్రమాదం.... 13 మంది మృతి

నిర్మాణంలో ఉన్న బహుళ అంతస్తుల అపార్ట్‌మెంట్ బిల్డింగ్‌లో అగ్ని ప్రమాదం చోటుచేసుకుంది. ఇది మొత్తం ఏడు భవనాలకు వ్యాపించింది. దీంతో 13 మంది మంటల్లో కాలిబూడిదయ్యారు. కనీసం 15 మంది గాయపడగా.. మరికొందరు వాటి లోపల చిక్కుకున్నారు. ఈ దుర్ఘటన హాంకాంగ్‌లోని ఓ హౌసింగ్ కాంప్లెక్స్‌లో బుధవారం (నవంబరు 26న) చోటుచేసుకుంది. ఘటనాస్థలిలోనే 9 మంది మృతిచెందారని, మరో నలుగురు ఆసుపత్రిలో చికిత్స పొందుతూ చనిపోయారని అధికారులు తెలిపారు. ఇప్పటి వరకూ 700 మందిని రక్షించి, తాత్కాలిక శిబిరాలకు తరలించినట్టు పేర్కొన్నారు.

న్యూ టెరిటరీస్‌లోని తాయ్ పో జిల్లాలోని హౌసింగ్ కాంప్లెక్స్ వెలుపలి భాగంలో ఏర్పాటు చేసిన వెదురు పరంజాలు, నిర్మాణ వలలకు మంటలు వేగంగా వ్యాపించడంతో దట్టమైన పొగ కమ్మేసింది. మొత్తం ఎనిమిది బ్లాక్‌ల్లోని దాదాపు 2,000 అపార్ట్‌మెంట్లలో 4,800 మంది నివసిస్తున్నారని రికార్డులు చూపిస్తున్నాయి. ప్రస్తుతం ఈ ఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి. మంటల్లో అనేక భవనాలు కాలిపోతున్నట్లు వీడియోల్లో కనిపిస్తోంది, చీకటి పడుతుండగా అనేక అపార్ట్‌మెంట్ల కిటికీల నుంచి మంటలు, పొగలు ఎగిసిపడుతున్నాయి. అగ్నిమాపక సిబ్బంది మంటలను అదుపుచేసి బాధితులను రక్షించేందుకు తీవ్రంగా శ్రమిస్తున్నారు..

స్థానిక కాలమానం ప్రకారం బుధవారం మధ్యాహ్నం తర్వాత మంటలు అంటుకున్నాయి. రాత్రి పొద్దుపోయిన తర్వాత ప్రమాదాన్ని లెవల్ 5‌కు అప్‌గ్రేడ్ చేశారని, ఇది అత్యంత తీవ్రమైందని అగ్నిమాపక సేవల విభాగం తెలిపింది. మంటలు ఇంకా కొనసాగుతూనే ఉన్నాయి. మొత్తం 128 ఫైర్ ఇంజిన్ల సాయంతో మంటలను ఆర్పుతున్నారు. ఘటనా స్థలిలో 57 అంబులెన్స్‌లు మోహరించారు. మృతుల్లో ఓ ఫైర్ ఫైటర్ కూడా ఉన్నట్టు అగ్నిమాపక సేవల విభాగం డైరెక్టర్ ఆండీ వైంగ్ తెలిపారు. వేడితో అస్వస్థతకు గురైన మరో ఫైటర్ ఆసుపత్రిలో చికిత్స పొందుతున్నారని చెప్పారు.

తాయ్ పోలో ఒక భవనంలో భారీ అగ్నిప్రమాదం జరిగింది. ఈ ప్రమాదంలో చాలా మంది వృద్ధులు చిక్కుకుపోయారని స్థానిక మీడియా టీవీబీకి తాయ్ పో జిల్లా కౌన్సిల్ సభ్యుడు లో హియు-ఫంగ్ తెలిపారు. అగ్నిప్రమాదం జరిగిన భవనాల్లో ప్రజలు చిక్కుకుపోయారని అనేక నివేదికలు తమకు అందాయని, అయితే మరిన్ని వివరాలు వెల్లడించలేదని పోలీసులు తెలిపారు. ఈ అగ్నిప్రమాదం వల్ల నిరాశ్రయులైన వారికి తాత్కాలిక ఆశ్రయాలను ఏర్పాటు చేశారు. "

హాంకాంగ్‌లోని న్యూ టెరిటరీస్‌లో ఉన్న ఒక శివారు ప్రాంతం. ఇది చైనాలోని షెన్‌జెన్ నగరానికి సమీపంలో ఉంది. హాంకాంగ్‌లో భవన నిర్మాణ, పునరుద్ధరణ పనుల్లో వెదురు పరంజా సాధారణంగా కనిపిస్తుంది. అయితే, భద్రతా కారణాల దృష్ట్యా నిర్మాణ పనుల్లో దీనిని దశలవారీగా తొలగిస్తామని ఈ ఏడాది ప్రారంభంలో ప్రభుత్వం ప్రకటించింది.