భారత్‌లోని ఒక్క జిల్లాకే 2, 20,000 హెచ్-1బీ వీసాలు.. మోసాలపై అమెరికాలో కలకలం

అమెరికాలో నైపుణ్యం కలిగిన ఉద్యోగుల కోసం ఉద్దేశించిన హెచ్-1బీ వీసా కార్యక్రమంలో పెద్ద ఎత్తున మోసం జరుగుతోందని.. అమెరికా మాజీ ప్రతినిధి, ఆర్థికవేత్త డాక్టర్ డేవ్ బ్రాట్ సంచలన ఆరోపణలు చేశారు. ఈ మోసానికి సంబంధించిన ప్రధాన కేంద్రంగా భారత దేశంలోని చెన్నై జిల్లాను ఆయన పేర్కొన్నారు. స్టీవ్ బానన్ 'వార్ రూమ్' పోడ్‌కాస్ట్‌లో ఆయన చేసిన ఈ వ్యాఖ్యలు.. నైపుణ్యం కలిగిన కార్మికుల వీసాలపై ట్రంప్ ప్రభుత్వం పరిశీలనను పెంచుతున్న నేపథ్యంలో ప్రాధాన్యత సంతరించుకున్నాయి.

డాక్టర్ బ్రాట్ తన వాదనకు మద్దతుగా హెచ్-1బీ వీసాలు పొందుతున్న దరఖాస్తుదారులలోభారతీయుల నిష్పత్తిని ప్రస్తావించారు. "హెచ్-1బీ వీసాల్లో 71 శాతం భారత దేశం నుంచే వస్తున్నాయి. కేవలం 12 శాతం మాత్రమే చైనా నుంచి వస్తున్నాయి. ఇది చాలా విషయాలు చెబుతోంది" అని ఆయన అన్నారు. అంతేకాకుండా కాంగ్రెస్ ద్వారా నిర్ణయించబడిన వార్షిక హెచ్-1బీ వీసాల గరిష్ఠ పరిమితి కేవలం 85,000 మాత్రమే కాగా.. ఒక్క చెన్నై నుంచే 2,20,000 వీసాలు మంజూరు అయ్యాయని డాక్టర్ బ్రాట్ ఆరోపించారు. "ఇది కాంగ్రెస్ నిర్ణయించిన పరిమితి కంటే రెండున్నర రెట్లు ఎక్కువ. ఇదే అసలు స్కామ్" అని ఆయన అన్నారు.

2024లో చెన్నై కాన్సులేట్ దాదాపు 2,20,000 హెచ్-1బీ వీసాలను, 1,40,000 హెచ్-4 డిపెండెంట్ వీసాలను ప్రాసెస్ చేసిందని నివేదికలు చెబుతున్నాయి. ఈ కాన్సులేట్ తమిళనాడు, కర్ణాటక, కేరళ, తెలంగాణ రాష్ట్రాల నుంచి దరఖాస్తుదారులకు సేవలు అందిస్తుంది. అయితే ఈ కార్యక్రమం దుర్వినియోగం అమెరికన్ ఉద్యోగులకు ముప్పుగా మారుతోందని డాక్టర్ బ్రాట్ ఆరోపించారు. "హెచ్-1బీ వీసా అంటే.. భారతీయుల్లో చాలా మందికి వారి సోదరులు, అత్తలు, తాతలు గుర్తుకు వస్తారు. ఈ వ్యక్తుల్లో ఎవరో ఒకరు వచ్చి తమకు నైపుణ్యం ఉందని చెప్పుకుంటారు.. కానీ వారు నైపుణ్యం లేనివారు. అదే మోసం" అని బ్రాట్ ఆరోపించారు. ఈ మోసం వల్ల అమెరికన్ కుటుంబాలు తమ ఉద్యోగాలను కోల్పోతున్నాయని ఆయన పేర్కొన్నారు.

బ్రాట్ ఆరోపణలకు మద్దతుగా రెండు దశాబ్దాల క్రితం చెన్నై కాన్సులేట్‌లో పని చేసిన భారతీయ-అమెరికన్ యూఎస్ ఫారిన్ సర్వీస్ అధికారి మహ్వాష్ సిద్దిఖీ చేసిన ఆరోపణలు కూడా వినిపిస్తున్నాయి. 2005-2007 మధ్య పనిచేసిన సిద్దిఖీ.. భారతీయ దరఖాస్తుదారులకు జారీ చేయబడిన మెజారిటీ వర్కింగ్ వీసాలు మోసపూరిత మార్గాల ద్వారా పొందారని ఆరోపించారు. ఆమె అంచనా ప్రకారం.. జారీ చేయబడిన వీసాలలో 80-90 శాతం మోసపూరిత పత్రాలు లేదా తప్పుడు విద్యా ధృవీకరణ పత్రాలను కలిగి ఉన్నాయన్నారు. కొన్ని సందర్భాల్లో దరఖాస్తుదారులు అమెరికన్ అధికారులతో ఇంటర్వ్యూలను నివారించడానికి ప్రయత్నించారని, నకిలీ అభ్యర్థులు ఇంటర్వ్యూలకు హాజరు అయ్యారని.. అలాగే కొందరు హైరింగ్ మేనేజర్‌లు ఉద్యోగ ఆఫర్‌ల కోసం డబ్బు డిమాండ్ చేశారని ఆమె ఆరోపించారు.