గాయపడ్డ వారిని ఆస్పత్రికి తరలిస్తుండగా.. కుప్పకూలిన విమానం, ఐదుగురి మృతి

ఓ పసిబిడ్డ ప్రాణాలను కాపాడేందుకు అత్యవసర వైద్య సహాయంతో బయలుదేరిన మెక్సికన్ నేవీ విమానం ఘోర ప్రమాదానికి గురైంది. అమెరికాలోని టెక్సాస్ తీర ప్రాంతమైన గాల్వెస్టన్ బే సమీపంలో సోమవారం మధ్యాహ్నం కుప్పకూలిపోయింది. ఈ హృదయవిదారక ఘటనలో కనీసం ఐదుగురు ప్రాణాలు కోల్పోయినట్లు అమెరికా కోస్ట్ గార్డ్ అధికారులు ధృవీకరించారు. ప్రాణాపాయ స్థితిలో ఉన్న ఒక చిన్నారిని ఆసుపత్రికి తరలిస్తుండగా ఈ విపత్తు సంభవించడం అందరినీ కలచివేస్తోంది.

మెక్సికన్ నేవీ అందించిన సమాచారం ప్రకారం.. ఈ విమానంలో మొత్తం ఎనిమిది మంది ప్రయాణిస్తున్నారు. వీరిలో నలుగురు నేవీ అధికారులు కాగా.. మిగిలిన నలుగురు సామాన్య పౌరులు. తీవ్రమైన కాలిన గాయాలతో బాధపడుతున్న ఒక చిన్నారిని మెరుగైన చికిత్స కోసం గాల్వెస్టన్‌లోని 'శ్రైనర్స్ చిల్డ్రన్ హాస్పిటల్'కు తరలిస్తుండగా ఈ ప్రమాదం జరిగింది. 'మిచౌ అండ్ మౌ' అనే స్వచ్ఛంద సంస్థ సమన్వయంతో ఈ మెడికల్ మిషన్ కొనసాగుతోంది. ఈ సంస్థ కాలిన గాయాలతో ఉన్న పిల్లలకు అత్యవసర రవాణా సౌకర్యాలను కల్పిస్తుంది.

ప్రమాదం ఎలా జరిగింది?

గాల్వెస్టన్ ద్వీపాన్ని ప్రధాన భూభాగంతో కలిపే కాజ్‌వే సమీపంలో విమానం ల్యాండింగ్ కావడానికి సిద్ధం అవుతుండగా ఈ ప్రమాదం జరిగినట్లు మెక్సికో నేవీ తెలిపింది. అయితే ప్రమాదానికి గల కచ్చితమైన కారణాలు ఇంకా తెలియరాలేదు. ప్రస్తుతం ఈ ఘటనపై అమెరికాకు చెందిన ఫెడరల్ ఏవియేషన్ అడ్మినిస్ట్రేషన్, నేషనల్ ట్రాన్స్‌పోర్టేషన్ సేఫ్టీ బోర్డ్ అధికారులు లోతుగా దర్యాప్తు చేస్తున్నారు. అయితే ప్రమాద సమయంలో గాల్వెస్టన్ ప్రాంతంలో వాతావరణం అనుకూలంగా లేదని సమాచారం. జాతీయ వాతావరణ విభాగం నివేదిక ప్రకారం.. ప్రమాదం జరిగిన సోమవారం మధ్యాహ్నం సుమారు 2.30 గంటల సమయంలో పొగమంచు తీవ్రత పెరిగి, విజిబులిటీ కేవలం అర మైలుకు పడిపోయింది. ఈ ప్రతికూల పరిస్థితులే విమానం కూలిపోవడానికి ప్రధాన కారణం కావచ్చని ప్రాథమికంగా అనుమానిస్తున్నారు.

విమానం నీటిలో పడిపోవడంతో గాల్వెస్టన్ కౌంటీ షెరీఫ్ కార్యాలయానికి చెందిన డైవ్ టీమ్, డ్రోన్ యూనిట్, క్రైమ్ సీన్ యూనిట్లు రంగంలోకి దిగాయి. మరణించిన ఐదుగురు ఎవరనేది అధికారులు ఇంకా అధికారికంగా ప్రకటించలేదు. ఈ విషాద ఘటనపై మెక్సికో నేవీ తీవ్ర సంతాపం వ్యక్తం చేస్తూ.. మృతుల కుటుంబాలకు తమ ప్రగాఢ సానుభూతిని తెలియజేసింది. హ్యూస్టన్‌కు ఆగ్నేయంగా 50 మైళ్ల దూరంలో ఉన్న ఈ ప్రముఖ పర్యాటక ప్రాంతంలో విమాన ప్రమాదం జరగడంతో స్థానికంగా భయాందోళనలు వ్యక్తం అయ్యాయి.