అదృష్ట దేవత వరించింది.. రూ.16,153 కోట్ల భారీ జాక్‌పాట్ గెలుచుకున్న వ్యక్తి!

అమెరికాలో అత్యంత ప్రజాదరణ పొందిన పవర్‌బాల్ లాటరీలో ఒక వ్యక్తిని ఊహించని అదృష్టం వరించింది. క్రిస్మస్ పండుగ వేళ జరిగిన డ్రాలో ఏకంగా $1.8 బిలియన్ల (సుమారు రూ.16,153 కోట్లు) భారీ జాక్‌పాట్‌ను ఒక వ్యక్తి గెలుచుకున్నారు. పండుగ పూట ఇంతటి భారీ మొత్తంలో నగదు సొంతం కావడంతో ఆ వ్యక్తి ఆనందానికి అవధులు లేకుండా పోయాయి. కేవలం $2 పెట్టి కొన్న లాటరీ టికెట్ ఆ వ్యక్తి తలరాతను ఒక్కసారిగా మార్చేసింది.
ఈ భారీ జాక్‌పాట్ మొత్తం ఒక్కరోజులో పెరిగింది కాదు, గత మూడు నెలలుగా ఎవరూ సరైన నంబర్లను ఎంపిక చేయకపోవడంతో ఈ సొమ్ము పేరుకుపోతూ వచ్చింది. సాధారణంగా పవర్‌బాల్ లాటరీలో ఎవరూ విజేతగా నిలవకపోతే, ఆ డ్రాకు సంబంధించిన ప్రైజ్ మనీ తదుపరి డ్రాకు బదిలీ అవుతూ ఉంటుంది. ఇలా వరుసగా మూడు నెలల పాటు ఎవరికీ లక్ చిక్కకపోవడంతో, జాక్‌పాట్ విలువ రికార్డు స్థాయిలో పెరిగి చివరికి ఈ క్రిస్మస్ ఈవ్ రోజున ఒకరిని వరించింది.
లాటరీ నిర్వహణ సంస్థ తెలిపిన వివరాల ప్రకారం, విన్నర్‌గా నిలిచిన వ్యక్తికి ఈ భారీ మొత్తాన్ని రెండు పద్ధతుల్లో పొందే అవకాశం ఉంటుంది. విజేత మొత్తం సొమ్మును 30 ఏళ్ల పాటు వార్షిక వాయిదాల రూపంలో తీసుకోవచ్చు లేదా ఒకేసారి నగదు రూపంలో కొంత మొత్తాన్ని (పన్నులు మినహాయించి) తీసుకోవడానికి వీలుంటుంది. సాధారణంగా చాలా మంది ఒకేసారి పెద్ద మొత్తంలో నగదు తీసుకోవడానికే మొగ్గు చూపుతారు. ఈ భారీ గెలుపు ఇప్పుడు అంతర్జాతీయ స్థాయిలో చర్చనీయాంశంగా మారింది.
ప్రపంచవ్యాప్తంగా ఎంతో మందిని ఆకర్షించే ఈ పవర్‌బాల్ లాటరీలో గెలవడం అంటే గడ్డివాములో సూదిని వెతకడమే అని చెబుతుంటారు. ఎందుకంటే కోట్లాది మంది టికెట్లు కొనుగోలు చేసే ఈ ఆటలో జాక్‌పాట్ తగిలే అవకాశం చాలా తక్కువగా ఉంటుంది. అయినప్పటికీ, కేవలం రెండు డాలర్ల పెట్టుబడితో రాత్రికి రాత్రే కోటీశ్వరుడిగా మారిన ఈ వ్యక్తి కథ ఇప్పుడు అందరినీ ఆశ్చర్యానికి గురి చేస్తోంది. అదృష్టం ఎప్పుడు ఎవరిని ఎలా వరిస్తుందో చెప్పలేమనడానికి ఈ సంఘటనే నిదర్శనం.