అభిమానం చూపించుకున్న వారిపై కక్ష కట్టి దేశ ద్రోహుల్లాగా చూస్తారా?

ఫ్లెక్సీల వద్ద జంతుబలులు, రక్త తర్పణాల జాడ్యం మొదలు పెట్టిందే టీడీపీ కాగా, ఇప్పుడు కూటమి ప్రభుత్వ పెద్దలు అనవసరంగా వైయ‌స్ఆర్‌సీపీని నిందిస్తున్నారని, ఆ పార్టీ కృష్ణా జిల్లా అధ్యక్షుడు, మాజీ మంత్రి పేర్ని వెంకట్రామయ్య (నాని) ఆక్షేపించారు. ఈ ప్రభుత్వ పాలనలో మొత్తం ప్రజలకు భయం కలిగే పరిస్ధితులు నెలకున్నాయని, అంతా భయభ్రాంతులకు గురవుతున్నారని ఆయన తెలిపారు. చంద్రబాబు మానసిక స్దితి చూస్తుంటే.. ఎట్టి పరిస్ధితుల్లోనూ వైద్య రంగాన్ని ప్రైవేటువరం చేసేందుకు వెంపర్లాడుతున్నట్లు కనిపిస్తోందని చెప్పారు.అయన మాట్లాడుతూ... జగన్‌గారి పుట్టినరోజు సందర్భంగా ఒకటి రెండు చోట్ల ఫ్లెక్సీల వద్ద పొట్టేళ్లు నరికి రక్తతర్పణం చేశారని, ఆ విధంగా రాష్ట్రంలో హింసా ప్రవృత్తిని ప్రేరేపిస్తున్నారని సీఎం చంద్రబాబు, హోం మంత్రి అనిత గొంతు చించుకుంటున్నారు. దాన్ని పట్టుకుని రక్తాభిషేకం అని, అలా సమాజాన్ని భయపెడుతున్నారని, వాటిని ఉపేక్షించబోమని, అవసరమైతే రాష్ట్ర బహిష్కరణ చేస్తామని చంద్రబాబు, హోం మంత్రి అనిత చెబుతున్నారు. హెచ్చరిస్తున్నారు. దీంతో మరో అడుగు ముందుకేసిన పోలీసులు.. ఆ పని చేసిన జగన్‌గారి అభిమానులను అదుపులోకి తీసుకుని.. తమ స్టైల్‌లో హింసించి, నడిరోడ్డుపై నడిపించుకుంటూ తీసుకుపోయారు. అసలు వారు ఏ నేరం చేశారు? ఆ పిల్లలు హంతకులా? దేశద్రోహులా? వారిని అంత దారుణంగా హింసించి, అవమానించాలా? బహిరంగ ప్రదేశాల్లో పొట్టేళ్ల వధ, ఫ్లెక్సీలకు రక్తతర్పణం చేస్తే, కేసులు పెడతామని ఒకరిద్దరు ఎస్పీలు ప్రకటించారు. మరి గ్రామ ఉత్సవాలు, జాతరల్లో బహిరంగంగా జంతు బలులు ఇస్తారు కదా? మరి అక్కడా వారిపై కేసులు పెడతారా?.నిజానికి ఫ్లెక్సీల వద్ద జంతుబలులు, రక్త తర్పణాల జాడ్యం మొదలుపెట్టిందే తెలుగుదేశం పార్టీ. అదే ఇప్పుడు కొనసాగుతోంది. ఈ రాష్ట్రంలో మీరు రెడ్‌బుక్‌ పేరుతో బెదిరింపులకు దిగడం వల్లే మా పార్టీ వాళ్లు ఆ విధంగా స్పందిస్తూ.. రప్పా రప్పా అంటున్నారు. గదిలో పెట్టి పిల్లి కూడా తిరగబడుతుంది. మీరు ఆ స్థాయిలో కక్ష సాధిస్తూ, హింసా ప్రవృత్తి కొనసాగిస్తుంటే.. ఎవరైనా ఎంత కాలం భరిస్తారు? అని ప్రశ్నించారు.