తిరుమలలో వైసీపీ నేతలకు వైకుంఠ ద్వార దర్శనాలు

తిరుమల కొండ శ్రీవారి నామస్మరణతో మార్మోగుతోంది. వైకుంఠ ఏకాదశిని పురస్కరించుకుని ఇవాళ్టి నుంచి (డిసెంబర్ 30) జనవరి 8వ తేదీ వరకూ తిరుమల శ్రీవారి ఆలయంలో వైకుంఠ ద్వార దర్శనాలు కల్పిస్తున్నారు. వైకుంఠ ఏకాదశి పర్వదినం కావటంతో మంగళవారం రోజున పలువురు ప్రముఖులు శ్రీవారిని వైకుంఠ ద్వార దర్శనం చేసుకున్నారు. రాజకీయ, సినీ, క్రీడా ప్రముఖులు పలువురు తిరుమల స్వామివారిని దర్శించుకున్నారు. అయితే తిరుమలకు సంబంధించి సోషల్ మీడియాలో జరిగే ప్రచారంపై ఎప్పటికప్పుడు క్లారిటీ ఇచ్చే తిరుమల తిరుపతి దేవస్థానం.. తాజాగా తిరుమల వైకుంఠ ద్వార దర్శనాలపై ప్రచారమవుతున్న ఓ వార్తపై క్లారిటీ ఇచ్చింది.

వైకుంఠ ఏకాదశి సందర్భంగా తిరుమల శ్రీవారిని మంగళవారం రోజున పలువురు వైసీపీ ప్రముఖులు దర్శించుకున్నారు. పెద్దిరెడ్డి రామచంద్రారెడ్డి, మిథున్ రెడ్డి, తలశిల రఘురాం, దేవినేని అవినాష్, వరుదు కళ్యాణి, భరత్ వంటి ప్రముఖులు శ్రీవారిని దర్శించుకున్నారు. అయితే నిబంధనలకు విరుద్ధంగా వైసీపీ నేతలకు దర్శనాలు కల్పిస్తున్నారంటూ సోషల్ మీడియాలో ప్రచారం జరుగుతోంది. ఈ నేపథ్యంలో ఈ వ్యాఖ్యలపై టీటీడీ క్లారిటీ ఇచ్చింది. వైకుంఠ ఏకాదశి సందర్భంగా వైసీపీ నేతలకు దర్శనాలపై సోషల్ మీడియాలో వచ్చే వార్తలు అవాస్తవమని టీటీడీ క్లారిటీ ఇచ్చింది. ఎమ్మెల్యే, ఎంపీ, ఎమ్మెల్సీ కోటాలో మాత్రమే ఇతరుల మాదిరిగానే వారికి కూడా దర్శనాలు కల్పించినట్లు టీటీడీ స్పష్టం చేసింది.

తిరుమల స్వర్ణ రథోత్సవం..

మరోవైపు వైకుంఠ ఏకాదశి సందర్భంగా తిరుమలలో స్వర్ణ రథోత్సవం కార్యక్రమం వైభవంగా నిర్వహించారు. శ్రీదేవి, భూదేవి సమేత మలయప్పస్వామి స్వర్ణ రథంపై విహరిస్తూ భక్తులకు దర్శనం ఇచ్చారు. మరోవైపు వైకుంఠ ద్వార దర్శనాల కోసం చేసిన అలంకరణ ఏర్పాట్లతో తిరుమల దేదీప్యమానంగా వెలుగుతోంది. అలాగే టీటీడీ ఉద్యానవనశాఖ ఆధ్వర్యంలో తిరుమలలో చేపట్టిన పూల అలంకరణలు కూడా భక్తులను కట్టిపడేస్తున్నాయి.

ముఖ్యంగా వైకుంఠ దర్శన మార్గంలో ఏర్పాటుచేసిన పూల అలంకరణ కట్టిపడేస్తోంది. భక్తులకు దైవలోకాన్ని చూసిన అనుభూతి కలిగేలా వీటిని సిద్ధం చేశారు. వైకుంఠ ద్వార దర్శనాల నేపథ్యంలో తిరుమల వ్యాప్తంగా 50 టన్నుల పుష్పాలు, 10 టన్నుల పండ్లు, నాలుగు టన్నుల కట్‌ ఫ్లవర్స్‌లను టీటీడీ ఉపయోగించనుంది.