డాక్టర్లకూ వాట్సాప్ సేవలు..,,ఏపీ మెడికల్ కౌన్సిల్ కీలక నిర్ణయం

ఆంధ్రప్రదేశ్ మెడికల్ కౌన్సిల్ కీలక నిర్ణయం తీసుకుంది.రాష్ట్రవ్యాప్తంగా వైద్యులకు ఉపయోగకరంగా ఉండేలా ఆర్టిఫిషియల్ ఇంటెలిజెన్స్ ఆధారిత సేవలను ప్రారంభించింది. వైద్యులు తమ రిజిస్ట్రేషన్లు, రెన్యువల్స్, ఇతర కౌన్సిల్ సేవల కోసం కార్యాలయాల చుట్టూ తిరగాల్సిన అవసరం లేకుండా, కృత్రిమ మేధ ఆధారంగా పనిచేసే వాట్సాప్ సేవలను అందుబాటులోకి తెచ్చింది.సోమవారం సచివాలయంలో జరిగిన ఒక కార్యక్రమంలో రాష్ట్ర ఆరోగ్య శాఖ మంత్రి సత్యకుమార్ యాదవ్ అధికారికంగా ఈ సేవలను ప్రారంభించారు.

డాక్టర్లు 9030999616 నంబర్‌కు మెసేజ్ చేయటం ద్వారా క్యూఆర్ కోడ్‌ను స్కాన్ చేయడం ద్వారా ఈ సేవలను పొందవచ్చు. దీని ద్వారా 10 రకాల సేవలు అందుబాటులో ఉంచారు. నూతన రిజిస్ట్రేషన్లు, సర్టిఫికేట్ పునరుద్ధరణ, అవసరమైన పత్రాల వివరాలు, స్లాట్ బుకింగ్, క్రెడిట్ పాయింట్ల వంటి మొత్తం 10 రకాల సేవలు అందించనున్నారు. మరోవైపు కేవలం టెక్స్ట్ మెసేజ్‌లే కాకుండా, వైద్యులకు సులభంగా అర్థమయ్యేలా వివరణాత్మక వీడియోలు, ప్రశ్నలు, జవాబుల ఫార్మాట్‌లో సమాచారాన్ని పొందుపరిచారు.

ఈ సందర్భంగా మాట్లాడిన ఏపీ మెడికల్ కౌన్సిల్ ఛైర్మన్ శ్రీహరి రావు.. ప్రస్తుతం కౌన్సిల్‌లో సుమారు1.3 లక్షల మంది వైద్యులు నమోదై ఉన్నారని వెల్లడించారు. వీరికి సేవలను మరింత వేగవంతం చేసేందుకు ఈ ఏఐ ఆధారిత వాట్సాప్ సేవలు తెచ్చినట్లు వెల్లడించారు. అలాగే రెన్యువల్ ప్రక్రియను డీసెంట్రలైజ్ చేసి.. జిల్లా స్థాయి సెంటర్లలో అందుబాటులోకి తెచ్చినట్లు తెలిపారు. మాండేటరీ క్రెడిట్ పాయింట్లను కూడా తగ్గించామని వివరించారు. మరోనైపు ఈ ఏఐ చాట్‌బాట్ వల్ల వైద్యులకు సమయం ఆదా అవ్వడమే కాకుండా.. 24 గంటలూ నమ్మకమైన సమాచారం అందుబాటులో ఉంటుందని అధికారులు వెల్లడించారు.

మరోవైపు ఆంధ్రప్రదేశ్ మెడికల్ కౌన్సిల్ రాష్ట్రంలో వైద్యుల రిజిస్ట్రేషన్, వైద్య విద్య ప్రమాణాలను పర్యవేక్షించే సంస్థ, వైద్యులు సరైన ప్రమాణాలతో సేవలు అందించేలా చూస్తూ ఉంటుంది, ఆరోగ్య సంరక్షణను ప్రోత్సహిస్తుంది, అలాగే వైద్యులకు జిల్లా స్థాయిలో రిజిస్ట్రేషన్, రెన్యువల్ వంటి సేవలను అందిస్తుంది. ఏపీలో వైద్య సేవలు అందించే వైద్యులందరూ ఇక్కడ రిజిస్టర్ చేసుకోవాలి.CME క్రెడిట్ పాయింట్లు, వాటికి సంబంధించిన నిబంధనలను అమలను ఆంధ్రప్రదేశ్ మెడికల్ కౌన్సిల్ పర్యవేక్షిస్తూ ఉంటుంది. వైద్యులపై క్రమశిక్షణా చర్యలు తీసుకుంటుంది, అవసరమైతే వారి లైసెన్స్‌లను సస్పెండ్ చేస్తుంది.