ఆయుష్ బదోని ఎంపికపై ప్రశ్నలు.. భారత మాజీ క్రికెటర్ సంచలన వ్యాఖ్యలు

న్యూజిలాండ్‌తో వన్డే సిరీస్‌కు ముందు టీమిండియాకు ఎదురుదెబ్బ తగిలింది. స్పిన్ ఆల్‌రౌండర్ వాషింగ్టన్ సుందర్ గాయంతో జట్టుకు దూరమవ్వడంతో, అతని స్థానంలో ఢిల్లీకి చెందిన యువ ఆటగాడు ఆయుష్ బదోనిని సెలెక్టర్లు ఎంపిక చేశారు. అయితే ఈ నిర్ణయంపై మాజీ భారత క్రికెటర్ కృష్ణమాచారి శ్రీకాంత్ తీవ్ర అసంతృప్తి వ్యక్తం చేశారు. ఇది సరైన ఎంపిక కాదంటూ ఆయన బహిరంగంగా విమర్శించారు.దేశవాళీ క్రికెట్‌లో బదోని ప్రదర్శన ఆశించిన స్థాయిలో లేకపోయినా ఎలా ఎంపిక చేశారన్నది తనకు అర్థం కావడం లేదని శ్రీకాంత్ వ్యాఖ్యానించారు.‘ఒక ఆటగాడి విషయంలో పరుగులు చేస్తేనే జట్టులో చోటు అంటారు. మరో ఆటగాడి విషయంలో మాత్రం పరుగులు చేయకున్నా అవకాశం ఇస్తున్నారు. ఐపీఎల్‌లో బదోని ఆడిన అద్భుత ఇన్నింగ్స్ ఏదైనా ఉంటే చెప్పండి. ఐపీఎల్ ప్రదర్శనను వన్డేలకు ప్రామాణికంగా తీసుకోకూడదు. కేవలం మూడు వికెట్లు తీసుకున్నంత మాత్రాన అతను ఆల్‌రౌండర్ అవుతాడా? ఐపీఎల్‌లో అతను ఎన్నిసార్లు బౌలింగ్ చేశాడు? అతను బౌలింగ్ చేయడం ఎవరైనా చూశారా?’ అంటూ సెలెక్టర్లను శ్రీకాంత్ నిలదీశారు.అలాగే రుతురాజ్ గైక్వాడ్‌ను ఎంపిక చేయకపోవడంపైనా ఆయన ప్రశ్నలు సంధించారు. ‘గత వన్డే సిరీస్‌లో రుతురాజ్ గైక్వాడ్ సెంచరీ చేశాడు. అయినా అతనికి ఎందుకు అవకాశం ఇవ్వలేదు? అతను ఏం తప్పు చేశాడు? ఒకవేళ ఆల్‌రౌండర్ అవసరమైతే అక్షర్ పటేల్‌ను తీసుకోవాల్సింది’ అని శ్రీకాంత్ అభిప్రాయపడ్డారు.ఇదే అంశంపై మాజీ ఓపెనర్ ఆకాశ్ చోప్రా కూడా విమర్శలు గుప్పించారు. లిస్ట్ ఏ క్రికెట్‌లో ఆయుష్ బదోని ఇప్పటివరకు కనీసం వెయ్యి పరుగులు కూడా చేయలేదని, అలాగే అతని ఖాతాలో వికెట్ల సంఖ్య కూడా పెద్దగా లేదని పేర్కొన్నారు. నితీష్ కుమార్ రెడ్డికి అవకాశాలు ఎందుకు ఇవ్వడం లేదని ప్రశ్నించారు. అతన్ని కేవలం చివర్లో బ్యాటింగ్‌కు పంపించడం, కొన్ని ఓవర్లు మాత్రమే బౌలింగ్ చేయించడం సరైన విధానం కాదని అభిప్రాయపడ్డారు.ఈ విమర్శలపై టీమిండియా బ్యాటింగ్ కోచ్ సితాన్షు కోటక్ స్పందించారు. భారత్-ఏ తరఫున బదోని మెరుగైన ప్రదర్శన చేయడమే అతని ఎంపికకు కారణమని తెలిపారు. ఐపీఎల్‌లోనూ అతను నిలకడగా రాణించాడని గుర్తు చేశారు. అయితే బదోని జట్టులోకి వచ్చినప్పటికీ న్యూజిలాండ్‌తో జరిగిన రెండో వన్డేలో అతనికి తుది జట్టులో చోటు దక్కలేదు. వాషింగ్టన్ సుందర్ స్థానంలో నితీష్ కుమార్ రెడ్డిని ఆడించినట్లు వెల్లడైంది.