టోల్‌గేట్‌ల వద్ద క్యాష్ పేమెంట్స్ రద్దు.. కేవలం ఫాస్టాగ్, యూపీఐ మాత్రమే

జాతీయ రహదారులపై ప్రయాణించే వాహనదారులకు కేంద్ర ప్రభుత్వం బిగ్ అప్‌డేట్ ఇచ్చింది. టోల్ చెల్లింపులకు సంబంధించి.. కేంద్ర రోడ్డు రవాణా, రహదారుల మంత్రిత్వ శాఖ కీలక ఆదేశాలు జారీ చేసింది. ఏప్రిల్ 1వ తేదీ నుంచి దేశవ్యాప్తంగా జాతీయ రహదారులపై ఉన్న అన్ని టోల్ ప్లాజాల వద్ద నగదు చెల్లింపులను పూర్తిగా నిషేధించాలని కేంద్ర ప్రభుత్వం యోచిస్తోంది. ఏప్రిల్ 1వ తేదీ నుంచి టోల్ ప్లాజాల వద్ద నగదు తీసుకునే క్యాష్ లేన్లు ఉండవని కేంద్ర ప్రభుత్వం తేల్చి చెప్పింది. వాహనదారులు ఇక నుంచి తమ టోల్ ఛార్జీలను కేవలం ఫాస్టాగ్, యూపీఐ యాప్‌ల ద్వారానే చెల్లించాల్సి ఉంటుంది.

హైవేపై ప్రయాణించే వాహనానికి ఉన్న ఫాస్టాగ్ ద్వారా అకౌంట్ నుంచి ఆటోమేటిక్‌గా డబ్బులు కట్ అవుతాయి. ఫాస్టాగ్ లేని వారు లేదా పని చేయని వారు క్యూఆర్ కోడ్ స్కాన్ చేసి యూపీఐ ద్వారా చెల్లించవచ్చు. కేంద్ర ప్రభుత్వం మల్టీ లేన్ ఫ్రీ ఫ్లో.. అనే అత్యాధునిక టోలింగ్ వ్యవస్థ వైపు అడుగులు వేస్తోంది. ఇందులో భాగంగానే ఈ కీలక నిర్ణయం తీసుకున్నారు. హైవేలపై టోల్ గేట్ల వద్ద నగదు చెల్లించేటప్పుడు చిల్లర సమస్యల వల్ల ఏర్పడే ట్రాఫిక్ జామ్‌లను అరికట్టడమే కేంద్ర ప్రభుత్వ ప్రధాన లక్ష్యం.

వాహనాలు ఆగకుండా ప్రయాణించడం వల్ల ఇంధనం ఆదా అవ్వడమే కాకుండా ప్రయాణ సమయం కూడా తగ్గుతుందని కేంద్ర ప్రభుత్వ వర్గాలు చెబుతున్నాయి. ఫాస్టాగ్, యూపీఐల ద్వారా టోల్ ఛార్జీలు చెల్లించడం వల్ల ప్రతీ ట్రాన్సాక్షన్ డిజిటల్‌గా రికార్డ్ అవుతుంది. తద్వారా అక్రమాలకు చోటు ఉండదని పేర్కొంటున్నాయి. ఇప్పటివరకు ఫాస్టాగ్ లేకుండా హైవేలపై ప్రయాణించే వాహనదారులు నగదు చెల్లిస్తే వారి వద్ద నుంచి టోల్ ఛార్జీని రెట్టింపు వసూలు చేస్తున్నారు. ఒకవేళ ఫాస్టాగ్ లేకపోయినా.. యూపీఐ ద్వారా చెల్లిస్తే కేవలం 1.25 రెట్లు మాత్రమే ఛార్జీ పడుతుంది.

వాహనదారులు చేయాల్సిన పని

ముందుగా ఇప్పటివరకు ఉన్న ఫాస్టాగ్‌ను అప్‌డేట్ చేసుకోవాలి. ఫాస్టాగ్ యాక్టివ్‌గా ఉందో లేదో సరిచూసుకోవాలి. ఇక ఫాస్టాగ్ కేవైసీ వివరాలను ఫిబ్రవరి 1వ తేదీ లోపు అప్‌డేట్ చేసుకోండి. టోల్ గేట్ వద్దకు వాహనం వెళ్లడానికి ముందే ఫాస్టాగ్ వాలెట్‌లో తగినంత బ్యాలెన్స్ ఉండేలా చూసుకోవాలి. ఏదైనా అత్యవసర సమయాల్లో ఉపయోగించడానికి మొబైల్‌లో యూపీఐ యాప్‌లను సిద్ధంగా ఉంచుకోండి.