'ఖమేనీ పాలన అంతం కావాలి.. ': ట్రంప్ సంచలన కామెంట్లు

మధ్యప్రాచ్యంలో దశాబ్దాలుగా పాతుకుపోయిన ఇస్లామిక్ రిపబ్లిక్ పునాదులు కదులుతున్నాయి. ఇరాన్ సుప్రీం లీడర్ ఆయతుల్లా అలీ ఖమేనీ నేతృత్వంలోని 37 ఏళ్ల నిరంకుశ పాలనకు ముగింపు పలకాల్సిన సమయం ఆసన్నం అయిందని అగ్రరాజ్యం అమెరికా అధ్యక్షుడు డొనాల్డ్ ట్రంప్ సంచలన పిలుపునిచ్చారు. గత కొన్ని వారాలుగా ఇరాన్ వ్యాప్తంగా సాగుతున్న అల్లర్లు, వేలాది మంది నిరసనకారుల మరణాల నేపథ్యంలో ట్రంప్ చేసిన వ్యాఖ్యలు ఇప్పుడు అంతర్జాతీయ రాజకీయాల్లో పెను దుమారం రేపుతున్నాయి.

ఖమేనీ ఒక సిక్ మ్యాన్: ట్రంప్ ఘాటు విమర్శలు

మీడియాకు ఇచ్చిన ఇంటర్వ్యూలో ట్రంప్ మాట్లాడుతూ.. ఇరాన్ నాయకత్వంపై విరుచుకుపడ్డారు. "ఇరాన్‌లో కొత్త నాయకత్వం రావాలి. కేవలం అధికారాన్ని కాపాడుకోవడం కోసం వేలాది మంది సొంత ప్రజలను చంపుతున్న ఖమేనీ ఒక అనారోగ్యకరమైన వ్యక్తి. నాయకత్వం అంటే గౌరవం పొందడం, భయంతో చంపడం కాదు" అని ట్రంప్ మండిపడ్డారు. రెండు రోజుల క్రితం 800 మందికి పైగా ఉరితీయకుండా ఆపడమే ఖమేనీ తీసుకున్న అత్యుత్తమ నిర్ణయమని ఎద్దేవా చేసిన ట్రంప్.. ఇరాన్ ప్రస్తుతం ప్రపంచంలోనే నివసించడానికి వీలులేని అత్యంత దారుణమైన ప్రదేశంగా మారిందని ఆవేదన వ్యక్తం చేశారు.

మరోవైపు ఇరాన్ సుప్రీం లీడర్ ఖమేనీ ఈ ఆరోపణలను తీవ్రంగా ఖండించారు. ఇరాన్‌లో జరుగుతున్న నిరసనల వెనుక అమెరికా కుట్ర ఉందని.. దేశాన్ని ఆర్థికంగా, రాజకీయంగా అణచివేయడానికి ట్రంప్ ప్రయత్నిస్తున్నారని ఆరోపించారు. "మేము యుద్ధాన్ని కోరుకోవడం లేదు. కానీ దేశంలోని నేరస్థులను, అంతర్జాతీయ కుట్రదారులను వదిలిపెట్టం" అని ఖమేనీ తన మద్దతుదారుల సాక్షిగా హెచ్చరించారు. అయితే భద్రతా దళాల కాల్పుల్లో ఇప్పటికే 3,428 మంది నిరసనకారులు మరణించినట్లు నివేదికలు చెబుతున్నాయి.

ఇదే సమయంలో 1979 విప్లవానికి ముందు ఇరాన్‌ను పాలించిన మాజీ పాలకుల వారసుడు, బహిష్కృత యువరాజు రెజా పహ్లావీ రంగంలోకి దిగారు. ఇరాన్ ప్రజలు తమ గొంతును మరింత గట్టిగా వినిపించాలని ఆయన కోరారు. "ట్రంప్ మాట మీద నిలబడే వ్యక్తి. ఆయన ఇరాన్ ప్రజలకు అండగా ఉంటారని నేను నమ్ముతున్నాను. ఇరాన్‌లో లౌకిక ప్రజాస్వామ్యాన్ని నెలకొల్పేందుకు నేను తిరిగి స్వదేశానికి వెళ్తాను" అని పహ్లావీ ధీమా వ్యక్తం చేశారు. ఇరాన్ వీధుల్లో నిరసనకారులు పహ్లావీ పేరును నినదిస్తుండటం గమనార్హం.