వారికి ఐదేళ్లు ఉచిత స్పర్శ దర్శనం.. వసతి కూడా ఫ్రీ

శ్రీశైలం దేవస్థానం భక్తుల కోసం అనేక మార్పులు తీసుకువస్తోంది. అందులో భాగంగా విరాళాల స్వీకరణ ప్రక్రియలో దేవస్థానం అధికారులు పలు మార్పులు చేశారు. ఆలయానికి విరాళాలు అందించే భక్తులకు సాధారణ రోజులలో ప్రత్యేక సదుపాయాలను కల్పించేందుకు శ్రీశైలం దేవస్థానం అధికారులు చర్యలు చేపట్టారు. తిరుమల తిరుపతి దేవస్థానం తరహాలోనే భక్తులకు దర్శనం, బహుమతులు అందించేలా చర్యలు తీసుకుంటున్నారు. శ్రీశైలం దేవస్థానానికి 50 వేల రూపాయలు విరాళంగా ఇచ్చే భక్తులకు.. విరాళం ఇచ్చిన రోజే.. వీఐపీ క్యూలైన్ ద్వారా ప్రత్యేకంగా స్పర్శ దర్శనం కల్పిస్తున్నారు. దాతతో పాటుగా ఐదుగురికి ఉచిత స్పర్శ దర్శనం అవకాశం కల్పిస్తున్నారు.

అలాగే వీరికి మరుసటి ఏడాది నుంచి ఐదేళ్ల వరకు ఏడాదిలో ఒక్కరోజు స్వామివారి ఉచిత స్పర్శ దర్శనం కల్పిస్తారు. దాతతో పాటు ఐదుగురికి అవకాశం ఉంటుంది. అలాగే విరాళం అందించిన రోజు.. స్వామివారి కుంకుమ, విభూతి, అక్షింతలు, రెండు 250 గ్రాముల లడ్డూలు, శ్రీశైలప్రభ మాసపత్రికను అందిస్తారు. ఇక ఆలయానికి లక్ష రూపాయలు విరాళం అందించే భక్తులకు.. అదే రోజు ఉచిత స్పర్శ దర్శనం ఉంటుంది. అలాగే మరుసటి ఏడాది నుంచి ఐదేళ్ల వరకూ ఏడాదిలో రెండుసార్లు ఉచిత స్పర్శ దర్శనం అవకాశం కల్పిస్తారు. ఈ సమయంలో దాతతో పాటుగా ఐదుగురికి అవకాశం ఉంటుంది. అలాగే 50 వేల విరాళం అందించిన భక్తులకు అందించే బహుమతులకు అదనంగా రెండు వంద గ్రాముల లడ్డూలు, దేవస్థానం కండువా, జాకెట్ ముక్కను అందిస్తారు.

 ఇక శ్రీశైలం ఆలయానికి ఐదు లక్షలు విరాళం అందించేవారికి.. అదే రోజున గర్భాలయంలో గోత్రనామాలతో అభిషేకం జరిపిస్తారు. మరుసటి ఏడాది నుంచి ఐదు సంవత్సరాలు ఏటా పది రోజులు.. ఉచిత స్పర్శ దర్శనం అవకాశం ఉంటుంది. అలాగే ప్రత్యేక ఏర్పాట్లలో వీరికి ప్రాధాన్యం ఉంటుంది. వీరికి లక్ష రూపాయలు విరాళం ఇచ్చే భక్తులకు అందించే వాటికి అదనంగా కైలాస కంకణాల డబ్బా, స్వామి, అమ్మవార్ల ఫొటో ఉన్న జూట్‌ బ్యాగ్‌ కిట్‌ ఇస్తారు.

ఇక పది లక్షల రూపాయలు విరాళం అందిస్తే.. వారికి గర్భాలయ అభిషేకం, కుంకుమార్చన, వేదాశీర్వచనం అందిస్తారు. ఐదేళ్లపాటు ఏటా వీఐపీ క్యూలైన్‌ ద్వారా ఉచిత స్పర్శ దర్శనం, గణేశ్‌ సదన్‌లో ఉచిత వసతి, ప్రత్యేక ఏర్పాట్లలో ప్రాధాన్యం ఉంటుంది. ఐదు లక్షల విరాళం అందించే భక్తులకు అందించే జ్యూట్ బ్యాగ్ కిట్‌నే వీరికి కూడా బహూకరిస్తారు.