ఇదెక్కడి కవలల ఫ్యామిలీరా బాబు.. అక్కాచెళ్లెల్లను పెళ్లి చేసుకున్న అన్నాదమ్ముళ్లు

చైనాలో జరిగిన ఒక అరుదైన వివాహం ప్రస్తుతం సోషల్ మీడియాలో తెగ చక్కర్లు కొడుతోంది. ఈ కవలల పెళ్లిలో ఒకే కుటుంబానికి చెందిన ఇద్దరు కవల అన్నదమ్ములు.. మరొక కుటుంబానికి చెందిన ఇద్దరు కవల అక్కాచెల్లెళ్లను పెళ్లాడారు. ఈ వింత కవలల కలయిక అక్కడితో ఆగకుండా.. ఆ రెండు కుటుంబాలకు కవలలైన బాబాయ్‌లు కూడా ఉండటం విశేషం. చైనాలోని అన్హుయి ప్రావిన్స్‌లో గల ఫుయాంగ్ నగరంలో ఈ వింత పెళ్లి జరిగింది.

షాన్ అనే ఇద్దరు కవల అక్కాచెల్లెళ్లను.. సాంగ్ అనే ఇద్దరు కవల అన్నదమ్ములు వివాహం చేసుకున్నారు. 2022లో ఒక పెళ్లిళ్ల బ్రోకర్ ద్వారా వీరి పరిచయం జరిగింది. అయితే పెళ్లి రోజున ఈ రెండు కుటుంబాల మధ్య ఉన్న మరొక అరుదైన విషయం వెలుగులోకి వచ్చింది. వధూవరుల ఇరు కుటుంబాల్లోనూ కవలలైన బాబాయ్‌లు కూడా ఉన్నారని తెలిసి అతిథులు ఆశ్చర్యపోయారు.

  చూడడానికి తమ ఇద్దరి రూపాలు ఒకేలా ఉండటంతో.. అత్తమామలు తనను, తన సోదరిని గుర్తుపట్టడంలో తరచుగా పొరబడుతుంటారని వధువుల్లో ఒకరు తెలిపారు. అలాగే తమ తల్లిదండ్రులు కూడా అల్లుళ్లను చూసి తికమక పడుతూ ఉంటారట. అయితే.. వధూవరులు మాత్రం తమ భాగస్వాముల స్వభావం, అలవాట్లను బట్టి ఒకరినొకరు సులభంగానే గుర్తుపడతామని చెబుతున్నారు.

గిన్నిస్ రికార్డు కోసం ప్రయత్నాలు

గత 60 ఏళ్లుగా ఆ ఫుయాంగ్ గ్రామంలో నివసిస్తున్న పెద్దలు కూడా ఇలాంటి అద్భుతమైన దృశ్యాన్ని తాము ఎప్పుడూ చూడలేదని ఆశ్చర్యం వ్యక్తం చేశారు. ప్రస్తుతం ఈ రెండు జంటలు వేర్వేరు ఇళ్లలో నివసిస్తున్నాయి. ఒకే కుటుంబంలో ఇలా 4 జంటలు కవలలే ఉండటంతో.. తాము గిన్నిస్ వరల్డ్ రికార్డ్ కోసం దరఖాస్తు చేయాలని భావిస్తున్నట్లు ఆ రెండు కుటుంబాలకు చెందిన వారు తెలిపారు.