భరణం ఎగ్గొట్టేందుకు రూ.6 కోట్ల జీతం వచ్చే ఉద్యోగం మానేశాడు

విడాకులు తీసుకున్న ఓ వ్యక్తి.. భార్య, పిల్లల పోషణ కోసం నెలకు రూ.16 లక్షలు భరణం చెల్లించడానికి అంగీకరించాడు. అయితే, ఈ మొత్తాన్ని ఎగ్గొటేందుకు కన్నింగ్ ప్లాన్ వేశాడు. ఎక్కువ జీతం వచ్చే ఉద్యోగాన్ని వదిలేసి తన సొంతదేశానికి వెళ్లిపోయాడు. అయితే, అతడికి న్యాయస్థానం ఝలక్ ఇచ్చింది. మొత్తం రూ.4 కోట్లు బకాయిలు చెల్లించాలని ఆదేశించింది. వివరాల్లోకి వెళ్తే.. కెనడాకు చెందిన వ్యక్తి.. సింగ్‌పూర్‌లో ఓ సంస్థలో సీనియర్ ఎగ్జిక్యూటివ్‌గా పనిచేస్తున్నాడు. భార్యతో కలిసి 2013లో సింగపూర్‌కు వచ్చారు. ఈ వ్యక్తి వార్షిక సంపాదన రూ.6 కోట్లకుపైగా ఉంటుంది. విబేధాలతో భార్య నుంచి విడిపోవాలని నిర్ణయించుకున్న అతడు.. విడాకుల కోసం కోర్టుకు వెళ్లారు. ఈ క్రమంలో భార్య, నలుగురు పిల్లల పోషణ కోసం నెలకు 25 వేల డాలర్లు (రూ.16 లక్షలు) చెల్లించడానికి అంగీకరించాడు.

 తన భార్యకు నెలకు 20,000 డాలర్లు (సుమారు రూ.14 లక్షలు) ఇవ్వడానికి, పిల్లల స్కూల్, బస్ ఫీజులు, ఇంటి అద్దె కూడా చెల్లించడానికి అంగీకరించాడు. ఆ తర్వాత ఆ మొత్తాన్ని నెలకు 11,000 డాలర్లకు (సుమారు 8 లక్షల రూపాయలకు) తగ్గించాడు. భరణం సక్రమంగా ఇవ్వకపోవడంతో ఆమె కోర్టుకు వెళ్లింది. భార్య కేసు వేసిన వెంటనే, సింగపూర్‌లో అధిక జీతం వచ్చే ఉద్యోగం వదిలేసి, కుటుంబ పోషణ భారం తప్పించుకోవడానికి స్వదేశానికి వెళ్లిపోయాడు. కోర్టు విచారణకు హాజరుకాకపోవడంతో అతడిపై అరెస్ట్ వారెంట్ కూడా జారీ అయింది.

తాజాగా ఈ కేసుపై విచారణ చేపట్టిన సింగ్‌పూర్ జిల్లా న్యాయమూర్తి ఫాంగ్ హ్సియావో చుంగ్... కుటుంబ నిర్వహణ కోసం భార్య కేసు వేసిన వెంటనే ఉద్యోగం మానేయడం బాధ్యతారాహిత్యమని వ్యాఖ్యానించారు. ఒక బాధ్యతాయుతమైన తండ్రి, కుటుంబాన్ని పోషించడానికి కొత్త ఉద్యోగం చూసుకున్న తర్వాతే రాజీనామా చేయాలని ఆయన అన్నారు.

కోర్టు తీర్పు ప్రకారం ఆ వ్యక్తి సెప్టెంబర్ 2023 నుంచి సెప్టెంబర్ 2025 వరకు చెల్లించాల్సిన బకాయి మొత్తం 634,000 సింగపూర్ డాలర్లు (సుమారు రూ.4 కోట్లు ). అక్టోబర్ 2024 నుంచి ప్రతి నెలా 23,500 సింగపూర్ డాలర్లు (సుమారు రూ.16 లక్షలు) చెల్లించాలి. కెనడాలో కొత్త ఉద్యోగంలో అతని ఆదాయం సుమారు 315,500 డాలర్లకు (సుమారు రూ.2 కోట్లు) తగ్గడంతో, భవిష్యత్తులో తల్లిదండ్రులు ఇద్దరూ కుటుంబ ఖర్చులకు సమానంగా సహకరించాలని న్యాయమూర్తి తీర్పు చెప్పారు.

అయితే, భార్య ఫార్ములా వన్ టిక్కెట్లు, ఖరీదైన విహారయాత్రలు, కాస్మెటిక్ చికిత్సల వంటి వాటిపై అధికంగా ఖర్చు చేస్తుందని అతడి తరపు న్యాయవాదులు వాదించారు. కెనడాలో విద్య, వైద్యం ఉచితం కాబట్టి అక్కడికి వచ్చేయాలని కోరాడు. కానీ,, సింగపూర్‌ జీవనశైలికి పిల్లలు అలవాటుపడ్డారని, అదే కొనసాగించాలని భార్య వాదించింది. చివరికి, భార్య కూడా తన జీవనశైలికి తగ్గట్టుగా ఉద్యోగం వెతుక్కోవాలని న్యాయమూర్తి సూచించినా, తండ్రి తన ఆర్థిక బాధ్యతల నుంచి తప్పించుకోలేడని స్పష్టం చేశారు.