"పాక్ పుట్టిన ఉద్దేశాన్ని నెరవేర్చే సమయం వచ్చింది": అసిమ్ మునీర్

పాకిస్థాన్ తీవ్ర ఆర్థిక సంక్షోభంలో కొట్టుమిట్టాడుతున్న వేళ.. ఆ దేశ ఆర్మీ చీఫ్ జనరల్ అసిమ్ మునీర్ చేసిన వ్యాఖ్యలు ఇప్పుడు కొత్త ప్రకంపనలు సృష్టిస్తున్నాయి. పాకిస్థాన్ ఆవిర్భావం వెనుక ఒక దైవిక ఉద్దేశం ఉందని.. ఆ లక్ష్యాన్ని చేరుకోవడానికి ఇప్పుడు ఒక చారిత్రాత్మక అవకాశం లభించిందని ఆయన పేర్కొన్నారు. నవాజ్ షరీఫ్ మనవడు జునైద్ సఫ్దర్ వివాహ రిసెప్షన్ సందర్భంగా మీడియా ప్రతినిధులతో మాట్లాడిన మునీర్.. అత్యంత రహస్యంగా, రెచ్చగొట్టేలా ఈ వ్యాఖ్యలు చేయడం గమనార్హం.

మతం ముసుగులో వింత వాదన

పాకిస్థాన్ కేవలం ఒక దేశం మాత్రమే కాదని, అది 'ఇస్లాం పేరుతో' సృష్టించబడిన ఒక ప్రత్యేక అస్తిత్వమని మునీర్ అభివర్ణించారు. ముస్లిం దేశాలన్నింటిలోనూ పాకిస్థాన్‌కు ఒక ప్రత్యేక హోదా, ప్రాముఖ్యత ఉందని.. అల్లాహ్ ప్రత్యేక ఆశీర్వాదాల వల్లనే దేశం అభివృద్ధి పథంలో సాగుతోందని ఆయన చెప్పుకొచ్చారు. "పాకిస్థాన్ ఏ ఉదాత్తమైన లక్ష్యం కోసమైతే పుట్టిందో.. ఆ గమ్యాన్ని చేరుకోవడానికి ఇప్పుడు దైవం మాకు గొప్ప అవకాశాన్ని ఇచ్చింది. మేము ఆ దిశగా వేగంగా అడుగులు వేస్తున్నాం" అని ఆయన ప్రకటించారు. అయితే ఆ లక్ష్యం, గమ్యం ఏమిటో ఆయన స్పష్టంగా వివరించకపోవడం గమనార్హం.ఇదీ చూడండి: పాక్ ఆర్మీ హెడ్‌క్వార్టర్స్‌లో అసిమ్ మునీర్ కుమార్తె పెళ్లి.. వరుసకు సోదరుడితో రహస్య వివాహం

అప్పుల ఊబిలో ఉన్నా.. గొప్పలే!

ఒకవైపు పాకిస్థాన్ తన చరిత్రలోనే అత్యంత దారుణమైన ఆర్థిక స్థితిలో ఉంది. ఇప్పటికే 24 సార్లు ఐఎంఎఫ్ (IMF) నుంచి బెయిలవుట్ ప్యాకేజీలను పొందింది. సౌదీ అరేబియా, గల్ఫ్ దేశాల అత్యవసర సాయం లేకపోతే ఆ దేశం ఎప్పుడో దివాళా తీసేది. ప్రస్తుతం 7 బిలియన్ డాలర్ల ఐఎంఎఫ్ ప్రోగ్రామ్ కింద నడుస్తున్నప్పటికీ.. దేశ ఆర్థిక స్థితి, అంతర్జాతీయ ప్రతిష్ట మెరుగుపడిందంటూ మునీర్ ఆశ్చర్యకరమైన వ్యాఖ్యలు చేశారు. రాబోయే ఏళ్లలో ప్రపంచం పాక్ గొప్పతనాన్ని గుర్తిస్తుందని ఆయన ధీమా వ్యక్తం చేశారు.

గతంలోనూ ఇదే ధోరణి

మునీర్ ఇలాంటి వ్యాఖ్యలు చేయడం ఇదే మొదటిసారి కాదు. గత ఏడాది మే నెలలో భారత్ నిర్వహించిన 'ఆపరేషన్ సింధూర్' సమయంలో పాక్ సైన్యం తీవ్రంగా దెబ్బతిన్నప్పటికీ.. ఆ సమయంలో తమకు దేవుడి సాయం అందిందని ఆయన చెప్పుకొచ్చారు. వాస్తవానికి దూరంగా.. కేవలం మతపరమైన భావోద్వేగాలను రెచ్చగొట్టడం ద్వారా ప్రజల దృష్టిని మళ్లించే ప్రయత్నం చేస్తున్నారని విశ్లేషకులు భావిస్తున్నారు. తీవ్రమైన అప్పులు, అంతర్గత కలహాలతో సతమతమవుతున్న దేశానికి లేనిపోని దైవిక మిషన్లను ఆపాదించడం వెనుక మరో యుద్ధ కాంక్ష ఉందా? అన్న అనుమానాలు వ్యక్తం అవుతున్నాయి.